ନୂଆଦିଲ୍ଲୀ : ୱାକଫ ବିଲ୍ ଚିଠା ଜେପିସିରେ ଗୃହୀତ ହୋଇଛି । ବହୁମତ ଭିତ୍ତିରେ ଏହା ଗୃହୀତ ହୋଇଛି । ଚିଠା ବିଲକୁ ୧୬ ଜଣ ସଦସ୍ୟ ସମର୍ଥନ କରିଥିବା ବେଳେ ବିରୋଧ କରିଥିଲେ ୧୧ ଜଣ । ସଂଶୋଧିତ ଚିଠା ବିଲ୍ କୁ ଆସନ୍ତାକାଲି ଲୋକସଭାର ବାଚସ୍ପତିଙ୍କ ନିକଟରେ ଦାଖଲ କରାଯିବ ବୋଲି ଜେପିସିର ଅଧ୍ୟକ୍ଷ ଜଗଦମ୍ଵିକା ପାଲ୍ କହିଛନ୍ତି। ବିରୋଧ କରିଥିବା ସଭ୍ୟମାନେ ହେଲେ ଟିଏସିର କଲ୍ୟାଣ ବାନାର୍ଜୀ, ଡିଏମକେର ଏ ରାଜା, ଆପ୍ ର ସଂଜୟ ସିଂହ ଓ ଉଦ୍ଧବ ଶିବସେନାର ଅରବିନ୍ଦ ଆୱନ୍ତ ।
ବିରୋଧୀ ସାଂସଦ କହିଛନ୍ତି, ଆମେ ଯେଉଁ ପ୍ରସ୍ତାବ ଦେଇଥିଲୁ, ତାକୁ ଶାସକ ଗୋଷ୍ଠୀ ଖାରଜ କରିଦେଇଥିଲେ। ଯେଉଁ ସବୁ ସଂଶୋଧନ ପାଇଁ କହିଥିଲୁ, ତାକୁ ମଧ୍ୟ ରଖିଲେ ନାହିଁ। ସରକାରଙ୍କ ଇଚ୍ଛା ଅନୁସାରେ ବିଲ୍ ପ୍ରସ୍ତୁତ ହୋଇଛି। ଜେପିସିର କିଛି ମହତ୍ତ୍ଵ ନାହିଁ। ଅସାମ୍ବିଧାନିକ ସଂଶୋଧନ ସବୁ ବିଲରେ ରଖାଯାଇଛି। ସଂଖ୍ୟାଲଘୁଙ୍କୁ ଟାର୍ଗେଟ କରି ଏପରି କରାଯାଇଥିବା ବିରୋଧୀ ସାଂସଦ କହିଛନ୍ତି। ନିର୍ବାଚିତ ପ୍ରତିନିଧିମାନେ ଯେତେବେଳେ ନିଜକୁ ରାଜା ବୋଲି ଭାବନ୍ତି, ସେତେବେଳେ ଏପରି କାମ ସବୁ ହୋଇଥାଏ। ଗତ ବର୍ଷ ଅଗଷ୍ଟରେ ୱାକଫ୍ ବିଲ୍ କୁ ଲୋକସଭାରେ ଆଗତ କରିଥିଲେ କେନ୍ଦ୍ର ସଂସଦୀୟ ବ୍ୟାପାର ମନ୍ତ୍ରୀ କିରଣ ରିଜିଜୁ। ଅଗଷ୍ଟ ୮ ତାରିଖରେ ବିଲକୁ ଜେପିସିକୁ ପଠା ଯାଇଥିଲା।
