‘ଆଳୁ ଦର ନିୟନ୍ତ୍ରଣ କରିବା ବଦଳରେ ହାତ ଟେକିଦେଇଛନ୍ତି ରାଜ୍ୟ ସରକାର’

ଭୁବନେଶ୍ବର : କମୁନି ଆଳୁ ଟେନସନ୍ । ପୁଣି ଉପରମୁହାଁ ଦର । ୪୦ ଟଙ୍କାରେ ମିଳୁଛି କେଜିଏ । ପର୍ଯ୍ୟାପ୍ତ ପରିମାଣରେ ଆଳୁ ମାର୍କେଟକୁ ଆସୁନଥିବାରୁ ଦର କମିବାର ନାଁ ନେଉନାହିଁ । ଆଳୁ ଦର ନିୟନ୍ତ୍ରଣ କରିବା ବଦଳରେ ହାତ ଟେକିଦେଇଛନ୍ତି ରାଜ୍ୟ ସରକାର । ମହଙ୍ଗା ମାଡ଼ରେ ଖାଉଟି ହନ୍ତସନ୍ତ ହେଉଥିବା ବେଳେ ଆଳୁ ପାଇଁ ଆମେ କାହା ପାଖରେ ହାତ ପତାଇବୁ ନାହିଁ ବୋଲି କହିଛନ୍ତି ଯୋଗାଣ ମନ୍ତ୍ରୀ । ସ୍ଵାବଲମ୍ଵୀ କରାଇବା ଆଳରେ ନିଜର ଦାୟିତ୍ଵକୁ ଜାଣିଜାଣି ଏଡ଼ାଇ ଯାଉଛନ୍ତି ଯୋଗାଣ ମନ୍ତ୍ରୀ । ବଜାରରେ ଆଳୁ ଦରରେ ନିଆଁ ଲାଗିଥିବା ବେଳେ କେବେ ପରିସ୍ଥିତି ସ୍ବାଭାବିକ ହେବ ସେ ଉତ୍ତର ଯୋଗାଣ ମନ୍ତ୍ରୀଙ୍କ ପାଖରେ ନାହିଁ । ପଶ୍ଚିମବଙ୍ଗ ସରକାର ଆଳୁ ଦେଉନଥିବାରୁ ରାଜ୍ୟରେ ଆଳୁ ସଂଙ୍କଟ ରହିଛି କି ବୋଲି ପ୍ରଶ୍ନ ହେବାରୁ ମନ୍ତ୍ରୀ କହୁଛନ୍ତି ପଶ୍ଚିମ ବଙ୍ଗ ସରକାର ନିଜ ପଲିସିରେ କାମ କରୁଛନ୍ତି, ଓଡ଼ିଶା ତା ପଲିସିରେ କାମ କରୁଛି। ଯୋଗାଣ ମନ୍ତ୍ରୀ ଆଳୁ ଦର ନେଇ ଗାଲୁଆ ଗପ କହୁଛନ୍ତି ବୋଲି ବିଜେଡ଼ି କହିଛି । ବିଜେଡ଼ି ବିଧାୟକ ସାରଦା ଜେନା କହିଛନ୍ତି ଯେ ୪ ମାସ ହେବ ଆଳୁ ଦର ନିୟନ୍ତ୍ରଣ ବାହାରେ ଥିବାବେଳେ ଯୋଗାଣ ମନ୍ତ୍ରୀ ବେଫିକର ବୟାନ ଦେବାରେ ଲାଗିଛନ୍ତି । ଯାହା ଫଳରେ ଲୋକେ ହନ୍ତସନ୍ତ ହେଉଛନ୍ତି । ସେପଟେ କଂଗ୍ରେସ କହିଛି ବିଜେପି ସରକାର ଦରଦାମ ନିୟନ୍ତ୍ରଣରେ ବିଫଳ ।

ଆଳୁ ଦର କେବେ ନିୟନ୍ତ୍ରଣକୁ ଆସିବ ସେ ଉତ୍ତର ରାଜ୍ୟ ସରକାରଙ୍କ ପାଖରେ ନାହିଁ । ଅନ୍ୟପଟେ ଦର ଉଚ୍ଚା ଥିବାରୁ ଗରିବଙ୍କ ହାଣ୍ଡିଶାଳରୁ ଉଭେଇ ଯାଇଛି ଆଳୁ । ସାଧାରଣ ଲୋକଙ୍କ ଖାଦ୍ୟ ଥାଳିରେ ଆଳୁ ଆବଶ୍ୟକତା ଥିବାରୁ କେଜି ବଦଳରେ ୫୦୦ ଗ୍ରାମ ନେଇ ଘରକୁ ଫେରୁଛନ୍ତି ।  ବିଜେପିକୁ ଭୋଟ ଦେଇ ମହଙ୍ଗା ମାଡ଼ର ଶିକାର ହୋଇଥିବା କହିଛନ୍ତି ସାଧାରଣ ଲୋକ । ଆଳୁରେ ଓଡ଼ିଶା କେବେ ଆତ୍ମନିର୍ଭର ହେବ ଓ ଦର କମିବ ତାକୁ ନେଇ ଯୋଗାଣ ମନ୍ତ୍ରୀଙ୍କ ବୟାନ ସାଧାରଣରେ ଅସନ୍ତୋଷ ସୃଷ୍ଟି କରିଛି । ନିକଟରେ ଦରଦାମ ନିୟନ୍ତ୍ରଣ କରିବା ପାଇଁ ବିଜେଡ଼ି ଆନ୍ଦୋଳନ ମାଧ୍ୟମରେ ସରକାରଙ୍କ ଉପରେ ଚାପ ପକାଇଛି ।c