ଶିଶୁ, କିଶୋର ଓ ଯୁବବର୍ଗଙ୍କ ମଧ୍ୟରେ ଘାତକ ସାବ୍ୟସ୍ତ ହେଉଛି ମସ୍ତିସ୍କ ପକ୍ଷାଘାତ, ଜାଣନ୍ତୁ ଏହା ପଛର କାରଣ

ନନ୍ଦିଘୋଷ ବ୍ୟୁରୋ: ଅତ୍ୟଧିକ ମାନସିକ ଚାପ, ଫାଷ୍ଟ୍ ଫୁଡ୍, ନିଶା ସେବନ ଯୋଗୁ ବଢୁଛି ମସ୍ତିଷ୍କ ପକ୍ଷାଘାତ। ସ୍କୁଲ ପିଲାଙ୍କ  ପାଠପଢା ଟେନ୍ସନ୍ ମଧ୍ୟ ମସ୍ତିଷ୍କ ପକ୍ଷାଘାତର କାରଣ ପାଲଟିଛି। ମସ୍ତିଷ୍କ ପକ୍ଷାଘାତ ଯୋଗୁ ଭାରତରେ ୧୯ ପ୍ରତିଶତ ଛୋଟ ପିଲା ଓ ଯୁବକ ମସ୍ତିଷ୍କଜନିତ ରୋଗର ଶିକାର ହେଉଥିବା ଏକ ସର୍ଭେରୁ ଜଣାପଡ଼ିଛି। ଏହାସହିତ ମୋବାଇଲର ବହୁଳ ବ୍ୟବହାର ମଧ୍ୟ ପିଲାଙ୍କ ମସ୍ତିଷ୍କ ଉପରେ ଚାପ ସୃଷ୍ଟି କରୁଛି। ଯାହାକୁ ନେଇ ଚିନ୍ତା ବଢୁଛି। ନିୟମିତ ଶାରିରୀକ ବ୍ୟାୟାମ, ଧ୍ୟାନ, ଯୋଗ ସହ ସନ୍ତୁଳିତ ଆହାର ନେଲେ ମସ୍ତିଷ୍କ ପକ୍ଷାଘାତରୁ ମିଳିବ ମୁକ୍ତି।

ଫାଷ୍ଟ୍ଫୁଡ୍ ବଢାଉଛି ଖରାପ କୋଲେଷ୍ଟ୍ରୋଲ। ବ୍ୟାହତ ହେଉଛି ମସ୍ତିଷ୍କକୁ ରକ୍ତ ସଞ୍ଚାଳନ। ଛୋଟ ବୟସର ପିଲାଙ୍କୁ ହେଉଛି ମସ୍ତିଷ୍କ ପକ୍ଷାଘାତ। ମସ୍ତିଷ୍କର ଯେ କୌଣସି ଅଂଶକୁ ରକ୍ତ ସଞ୍ଚାଳନ ବନ୍ଦ ହେଲେ ମସ୍ତିଷ୍କ ପକ୍ଷାଘାତ ହୁଏ। ଭାରତରେ ବାର୍ଷିକ ୧୫ରୁ ୪୦ ବର୍ଷ ବୟସ ମଧ୍ଯରେ ୧୯ ପ୍ରତିଶତ କିଶୋର-କିଶୋରୀ ଓ ଯୁବକ ମସ୍ତିଷ୍କ ପକ୍ଷାଘାତର ଶିକାର ହେଉଥିବା ସର୍ଭେରୁ ଜଣାପଡ଼ିଛି। ଯାହା ଏବେ ବଡ଼ ଚାଲେଞ୍ଜ ସୃଷ୍ଟି କରିଛି। ସ୍କୁଲରେ ଭଲ ନମ୍ବର ରଖି ପାସ୍ କରିବା ପାଇଁ ଛାତ୍ରଛାତ୍ରୀ ମାନସିକ ଚାପଗ୍ରସ୍ତ ହେଉଛନ୍ତି। ଅତ୍ୟଧିକ ସ୍ମାର୍ଟଫୋନ ବ୍ୟବହାର ମଧ୍ୟ ପିଲାଙ୍କ ମସ୍ତିଷ୍କ ରକ୍ତ ସଞ୍ଚାଳନକୁ ବ୍ୟାହତ କରୁଛି। ସେହିପରି ଅତ୍ୟଧିକ ମଦ୍ୟପାନ, ନାକରେ ନିଶା ଔଷଧ ଆଘ୍ରାଣରୁ ନଷ୍ଟ ହେଉଛି ମସ୍ତିଷ୍କର ରକ୍ତବାହୀ ନଳୀ। ଫଳରେ ଅଚାନକ ଘଟୁଛି ମସ୍ତିଷ୍କ ପକ୍ଷାଘାତ ଆଉ ଚାଲିଯାଉଛି ଜୀବନ। ବିଶେଷଜ୍ଞଙ୍କ ମତରେ ହୃଦଘାତ ଯେତିକି ପ୍ରାଣଘାତୀ ମସ୍ତିଷ୍କ ପକ୍ଷାଘାତ ବି କିଛି କମ ନୁହେଁ। ଟେନସନ୍ ଯୋଗୁ କେବଳ ବଡ଼ ଲୋକ ନୁହନ୍ତି ଛୋଟ ପିଲା ବି ମସ୍ତିଷ୍କ ପକ୍ଷାଘାତର ଶିକାର ହେଉଛନ୍ତି। ରାତି ଅନିଦ୍ରା ହୋଇ ପାଠପଢିବା ଓ କାମର ଚାପ ଯୋଗୁ ମସ୍ତିଷ୍କ ଉପରେ ପ୍ରଭାବ ପଡ଼ୁଛି।

ପ୍ରତିଯୋଗିତାରେ ପ୍ରଥମ ହେବାକୁ ପିଲାଙ୍କ ଉପରେ ବଢୁଛି ଚାପ। ଛୁଟି ଦିନରେ ବି ସ୍କୁଲ ହୋମଓ୍ବାର୍କରେ  ସମୟ ଯାଉଛି। ଶାରିରୀକ ବ୍ୟାୟାମ, ଖେଳକୁଦ ନ କରିବାରୁ ଶରୀର ଓ ମସ୍ତିଷ୍କକୁ ରକ୍ତ ସଞ୍ଚାଳନ ବ୍ୟାହତ ହେଉଛି। ଏହାସହ ବାୟୁ ପ୍ରଦୂଷଣ ମଧ୍ୟ ମସ୍ତିଷ୍କ ଜନିତ ରୋଗ ସୃଷ୍ଟି କରୁଛି। ଉଚ୍ଚରକ୍ତଚାପ ଯୋଗୁ ମସ୍ତିଷ୍କର ଧମନୀ ଫାଟିଯିବା ସମ୍ଭାବନା ରହିଛି। ଟାଇପ-୨ ମଧୁମେହ ରୋଗୀ ହୃଦଘାତ ସହ ମସ୍ତିଷ୍କ ପକ୍ଷାଘାତର ବି ଶିକାର ହେଉଛନ୍ତି। ବେରୋଜଗାର ଯୁବଗୋଷ୍ଠୀ ମାନସିକ ଚାପଗ୍ରସ୍ତ ହୋଇ ବିଭିନ୍ନ ନିଶାଦ୍ରବ୍ୟ ସେବନ କରୁଛନ୍ତି। ଫଳରେ ମସ୍ତିଷ୍କରେ ଥିବା ହାଇପୋଥାଲାମସ୍ ଅତିମାତ୍ରାରେ ପ୍ରତିକ୍ରିୟାଶୀଳ ହୋଇଥାଏ। ଏପରିକି ମଦ୍ୟପାନ କରି ଦୁର୍ଘଟଣାଗ୍ରସ୍ତ ବ୍ୟକ୍ତିର ଯଦି ମସ୍ତିଷ୍କରେ ଶକ୍ତ ଆଘାତ ଲାଗିଥାଏ ତାହେଲେ ପରବର୍ତ୍ତୀ ଅବସ୍ଥାରେ ସେହି ବ୍ୟକ୍ତି ପକ୍ଷାଘାତର ଶିକାର ହୋଇଥାନ୍ତି। ମସ୍ତିଷ୍କ ପକ୍ଷାଘାତରୁ ବର୍ତ୍ତିବାକୁ ସନ୍ତୁଳିତ ଆହାର ସହ ମର୍ଣ୍ଣିଂ ଓ୍ବାକ୍, ଯୋଗ, ଧ୍ୟାନ ଓ  ଶାରିରୀକ ବ୍ୟାୟାମ ଆବଶ୍ୟକ। ଜିମ୍ ଅପେକ୍ଷା ଖୋଲାପଡ଼ିଆ ଖେଳକୁଦ ଅଧିକ ଲାଭଦାୟକ ହୋଇଥାଏ।

ମସ୍ତିଷ୍କ ପକ୍ଷାଘାତ ଆଗାମୀ ଦିନରେ ବଡ଼ ଚାଲେଞ୍ଜ ସୃଷ୍ଟି କରିବାକୁ ଯାଉଛି। ଜାତୀୟ ଭେଷଜ ଲାଇବ୍ରେରୀ ରିପୋର୍ଟ କହୁଛି, ଜୀବନଶୈଳୀରେ ପରିବର୍ତ୍ତନ ନ କଲେ ଭାରତରେ ୨୦୫୦ ବେଳକୁ ୮୦ ପ୍ରତିଶତ ବ୍ୟକ୍ତି ହୃଦଘାତ ଓ ମସ୍ତିଷ୍କଜନିତ ରୋଗରେ ଆକ୍ରାନ୍ତ ହୋଇପାରନ୍ତି।