କାହିଁକି ହଲରେ ରିଲିଜ୍ ହେଲାନି ‘ପୁଷ୍ପା-୨’: ହଲ୍ ମାଲିକଙ୍କୁ ହତ୍ୟା ଧମକ ଦେଲା ପାଗଳ ଫ୍ୟାନ୍
1 min read
ତେଲେଙ୍ଗାନା: ସାରା ଦେଶରେ ଏବେ ପୁଷ୍ପା ଆଉ ପୁଷ୍ପା । ପୂର୍ବରୁ ପଶ୍ଚିମ, ଉତ୍ତରରୁ ଦକ୍ଷିଣ ପୁଷ୍ପା-୨କୁ ନେଇ କ୍ରେଜ୍ । ଫିଲ୍ମ ରିଲିଜ ହେଉ ହେଉ ସବୁ ରେକର୍ଡ ଭାଙ୍ଗି ଛପର ଫାଡ଼ ବିଜନେସ ଆରମ୍ଭ କରିଛି । ଗୁରୁବାର ଦେଶର ବିଭିନ୍ନ ହଲରେ ଏହା ମୁକ୍ତିଲାଭ କରିଛି । ଫିଲ୍ମ ଓ ଅଲ୍ଲୁ ଅର୍ଜୁନଙ୍କୁ ନେଇ ଦର୍ଶକଙ୍କ ପାଗଳାମୀ କିଛି ସ୍ଥାନରେ ଆଇନଶୃଙ୍ଖଳା ପରିସ୍ଥିତି ସୃଷ୍ଟି କରିଛି । ପୁଷ୍ପା-୨କୁ ନେଇ ତେଲେଙ୍ଗାନରୁ ଏମିତି ଏକ ଖବର ଆସିଛି, ଯାହା ଶୁଣିଲେ ଆପଣ ବି ଆଶ୍ଚର୍ଯ୍ୟ ହୋଇଯିବ । ଆଜ୍ଞା ହଁ, ଫିଲ୍ମ ରିଲିଜ ନହେବାରୁ ଜଣେ ଦର୍ଶକ ହଲର ପଶି ଭଙ୍ଗାରୁଜା କରିବା ସହ ମାଲିକଙ୍କୁ ହତ୍ୟା କରିବାକୁ ଧମକ ଦେଇଛନ୍ତି । ଅଭିଯୋଗ ପାଇବା ପରେ ପୋଲିସ ସମ୍ପୃକ୍ତ ବ୍ୟକ୍ତିଙ୍କ ନାଁରେ ଏକ ମାମଲା ରୁଜୁ କରିଛି ।
ରିପୋର୍ଟ ଅନୁସାରେ, ତେଲେଙ୍ଗାନାର ମଞ୍ଚେରିଅଲ ଜିଲ୍ଲା ଚେନ୍ନୁର ଟାଉନରୁ ଆସିଛି ଅଭିଯୋଗ । ଚେନ୍ନୁରରେ ଥିବା ଶ୍ରୀନିବାସ ହଲରେ ଅଲ୍ଲୁ ଅର୍ଜୁନଙ୍କ ପୁଷ୍ପା-୨ ଚାଲି ନଥିଲା । ଯାହାକୁ ନେଇ ଜଣେ ବ୍ୟକ୍ତିଙ୍କ ରାଗ ପଞ୍ଚମ ହୋଇଯାଇଥିଲା । ହଲ କର୍ମଚାରୀଙ୍କ ବିରୋଧ ସତ୍ତ୍ବେ, ବ୍ୟକ୍ତି ଜଣଙ୍କ ନିଜ ସାଙ୍ଗଙ୍କ ସହ ହଲ ଭିତରକୁ ଜବରଦସ୍ତ ପଶି ଝରକା କାଚ ଭାଙ୍ଗି ଦେଇଛନ୍ତି ।
ଏତିକିରେ ବ୍ୟକ୍ତି ଜଣଙ୍କ ଶାନ୍ତ ହୋଇ ନଥିଲେ । ହଲ ମାଲିକ ରାଜାମଲ ଗୌଡ଼ଙ୍କୁ ହତ୍ୟା ଧମକ ଦେବାକୁ ବି ପଛାଇ ନଥିଲେ । ଏନେଇ ହଲ ମାଲିକ ଅଭିଯୋଗ କରିବା ପରେ ଏକାଧିକ ଧାରା ଲଗାଇ ପୋଲିସ ସମ୍ପୃକ୍ତ ବ୍ୟକ୍ତିଙ୍କ ନାଁରେ ମାମଲା ରୁଜୁ କରିଛି ।
