କାହିଁକି ପୁଷ୍ପା-୨ର ନାଇଟ୍ ଶୋ’ ହେଲା ବାତିଲ ?

ନୂଆଦିଲ୍ଲୀ: ବହୁ ପ୍ରତୀକ୍ଷିତ ପ୍ୟାନ୍ ଇଣ୍ଡିଆ ଫିଲ୍ମ ‘ପୁଷ୍ପା ୨’ ଆଜି ପ୍ରେକ୍ଷାଳୟରେ ରିଲିଜ୍ ହୋଇଛି। ଅଲ୍ଲୁ ଅର୍ଜୁନ ପୁଣି ଥରେ ଫିଲ୍ମରେ ‘ପୁଷ୍ପରାଜ’ ଭାବରେ ନଜର ଆସିଛନ୍ତି। ସୁକୁମାରଙ୍କ ନିର୍ଦ୍ଦେଶିତ ‘ପୁଷ୍ପା ୨’ ରିଲିଜ ପୂର୍ବରୁ ବହୁ ଅସୁବିଧାର ସମ୍ମୁଖୀନ ହୋଇଛି।

ପ୍ରଥମେ ଫିଲ୍ମର ସୁଟିଂ ସମୟରେ ବସ୍ ଦୁର୍ଘଟଣା, ତା’ପରେ ଅଲ୍ଲୁ ଅର୍ଜୁନଙ୍କ ଗ୍ରାଣ୍ଡ ଫିଲ୍ମର ରିଲିଜ୍ ତାରିଖ କ୍ୟାନସେଲ୍ ହେବା। ତଥାବି  ଅସୁବିଧା ଏଠାରେ ଶେଷ ହେଲା ନାହିଁ । ନିର୍ମାତାଙ୍କ ଶେଷ ମୁହୂର୍ତ୍ତର ନିଷ୍ପତ୍ତି ପରେ, ଏହି ଚଳଚ୍ଚିତ୍ରର 3D ରିଲିଜକୁ ସ୍ଥଗିତ ରଖାଯାଇଥିଲା । ବର୍ତ୍ତମାନ, ଫିଲ୍ମକୁ ନେଇ ଆଉ ଏକ ସମସ୍ୟା ମୁଣ୍ଡ ଟେକିଛି। କାରଣ କନ୍ନଡ ଚଳଚ୍ଚିତ୍ରର ପରମ୍ପରା ହେତୁ ପୁଷ୍ପା ଫିଲ୍ମର ନାଇଟ୍ ଶୋ’କୁ ବନ୍ଦ କରିଦିଆଯାଇଛି ।

ସାଉଥ ଫିଲ୍ମ ସୁପରଷ୍ଟାର ଆଲ୍ଲୁ ଅର୍ଜୁନଙ୍କ ଷ୍ଟାରଡମ ବିଷୟରେ ଆମେ ସମସ୍ତେ ଅବଗତ। ଏଭଳି ପରିସ୍ଥିତିରେ ତାଙ୍କ ଆକ୍ସନ୍ ଫିଲ୍ମ ପୁଷ୍ପା-୨ ର ମଧ୍ୟରାତ୍ରିର ଶୋ ମଧ୍ୟ ଅନେକ ସହରରେ ଉପଲବ୍ଧ । ବେଙ୍ଗାଲୁରୁରେ ଫିଲ୍ମର କ୍ରେଜକୁ ଦେଖି ଏହାକୁ ମଧ୍ୟରାତ୍ରିରେ ମୁକ୍ତିଲାଭ କରିବାକୁ କୁହାଯାଉଥିଲା। ତେବେ ବର୍ତ୍ତମାନ ବେଙ୍ଗାଲୁରୁ ଜିଲ୍ଲା ପ୍ରଶାସନ ଏହାର ମଧ୍ୟରାତ୍ରି ସ୍କ୍ରିନିଂ ବନ୍ଦ କରିବାକୁ ନିର୍ଦ୍ଦେଶ ଦେଇଛି।

ଦକ୍ଷିଣର ଫେମସ୍ ଟ୍ରେଡ୍ ଆନାଲିଷ୍ଟ ବିଜୟବାଲାନ ତାଙ୍କ ଅଫିସିଆଲ୍ ଏକ୍ସ ଆକାଉଣ୍ଟରେ ବେଙ୍ଗାଲୁରୁରେ ‘ପୁଷ୍ପା-୨’ର ରାତ୍ରି ଶୋ’ର ବାତିଲ ସମ୍ପର୍କରେ ସୂଚନା ଦେଇଛନ୍ତି। ସେ କହିଛନ୍ତି ଯେ, କନ୍ନଡ ଚଳଚ୍ଚିତ୍ର ନିର୍ମାତା ସଂଘ  ‘ପୁଷ୍ପା-୨’ ବିରୋଧରେ ପିଟିସନ୍ ଆବେଦନ କରିବା ପରେ ବେଙ୍ଗାଲୁରୁ ଜିଲ୍ଲା ପ୍ରଶାସନ ଏହି ନିଷ୍ପତ୍ତି ନେଇଛି। ଆସୋସିଏସନ କହିଛି ଯେ କନ୍ନଡ ସିନେମାର ସର୍ବଦା ପରମ୍ପରା ରହିଆସିଛି ଯେ ସକାଳ ୬ ଟା ପୂର୍ବରୁ କୌଣସି ଫିଲ୍ମ ରିଲିଜ ହେବା ଉଚିତ ନୁହେଁ। ପୁଷ୍ପା ପାଇଁ ଏହି ପରମ୍ପରା ଭାଙ୍ଗିବା ଉଚିତ୍ ନୁହେଁ ।

ଜିଲ୍ଲା ପ୍ରଶାସନର ଏହି ନିଷ୍ପତ୍ତି ପରେ ବେଙ୍ଗାଲୁରୁରେ ଥିବା ଅଲ୍ଲୁଙ୍କ ଫ୍ୟାନ୍ସମାନେ ନିରାଶ ହୋଇଛନ୍ତି। ଫ୍ୟାନ୍ସମାନେ ଦୀର୍ଘ ଦିନ ଧରି ନିଜ ପ୍ରିୟ ସୁପରଷ୍ଟାରଙ୍କ ଫିଲ୍ମକୁ ଅପେକ୍ଷା କରି ରହିଥିବା ବେଳେ ନାଇଟ୍ ଶୋକୁ ବନ୍ଦ କରିଦିଆଯାଇଛି।