ସୁନ୍ଦରଗଡ଼ରେ ତୀବ୍ର ହେଉଛି ଅସନ୍ତୋଷ : ମୁଖ୍ୟମନ୍ତ୍ରୀଙ୍କ ବିବୃତ୍ତିକୁ ସବୁ ମହଲରେ ନିନ୍ଦା

ସୁନ୍ଦରଗଡ଼ : ସୁନ୍ଦରଗଡ଼ରେ ତୀବ୍ର ହେଉଛି ଅସନ୍ତୋଷ। କଂଗ୍ରେସର ବିକ୍ଷୋଭ ଓ ପ୍ରତିବାଦ ପରେ ଆଜି କଡ଼ା ଭାଷାରେ ନିନ୍ଦା କରିଛି ପଶ୍ଚିମ ଓଡ଼ିଶା ଯୁବ ମଞ୍ଚ। ମୁଖ୍ୟମନ୍ତ୍ରୀଙ୍କ ବିବୃତ୍ତି ପ୍ରତ୍ୟାହାର ନହେଲେ ଆନ୍ଦୋଳନ କରିବାକୁ ଧମକ। ସୁନ୍ଦରଗଡକୁ କାହିଁକି ଉତ୍ତର ଓଡିଶା ବିକାଶ ପରିଷଦରେ ସାମିଲ କରାଯିବ । ଭୌଗୋଳିକ ଓ ସାଂସ୍କତିକ ଦୃଷ୍ଟିରୁ ସୁନ୍ଦରଗଡ଼ବାସୀ ପଶ୍ଚିମ ଓଡ଼ିଶା ସହ ଅଛନ୍ତି ଓ ରହିବେ । କେଉଁ ସ୍ବାର୍ଥରେ ପଶ୍ଚିମ ଓଡିଶାର ଏହି ଖଣି ଖାଦାନ ଓ ଶିଳ୍ପ ବହୁଳ ଜିଲ୍ଲାକୁ ଉତ୍ତର ଓଡିଶାରେ ସାମିଲ କରାଯାଉଛି । ତାକୁ ନେଇ ପ୍ରଶ୍ନ ଉଠିଥିବା ବେଳେ, ଜୋର ଧରିବାରେ ଆନ୍ଦୋଳନ ଓ ପ୍ରତିବାଦ । ଗତକାଲି ଜିଲ୍ଲା କଂଗ୍ରେସ ମୁଖ୍ୟମନ୍ତ୍ରୀଙ୍କ କୁଶପୁତ୍ତଳିକା ଦାହ କରିଥିବା ବେଳେ, ଆଜି ପଶ୍ଚିମ ଓଡିଶା ଯୁବ ମଞ୍ଚ ପକ୍ଷରୁ ଜିଲ୍ଲାପାଳଙ୍କୁ ଦାବିପତ୍ର ପ୍ରଦାନ କରାଯାଇଛି। ମୁଖ୍ୟମନ୍ତ୍ରୀ ତାଙ୍କ ବିବୃତ୍ତି ପ୍ରତ୍ୟାହାର ନକଲେ ଆନ୍ଦୋଳନର ଚେତାବନୀ ଦେଇଛି ଯୁବ ମଞ୍ଚ । ପଶ୍ଚିମ ଓଡ଼ିଶାକୁ ଭାଗ କରି ହାଇକୋର୍ଟ ବେଞ୍ଚ ପ୍ରତିଷ୍ଠା ଦାବି, ସ୍ବତନ୍ତ୍ର କୋଶଳ ରାଜ୍ୟ ଦାବି ଓ ମହାନଦୀ ବିବାଦ ଭଳି ପ୍ରସଙ୍ଗକୁ ଦୁର୍ବଳ କରିବାକୁ ଏହା ରାଜ୍ୟ ସରକାରଙ୍କ ଏକ ସୁଚିନ୍ତିତ ଚାଲ ବୋଲି ଅଭିଯୋଗ ହେଉଛି । ମୁଖ୍ୟମନ୍ତ୍ରୀଙ୍କ ଏହି କଡ଼ା ଭାଷାରେ ସମାଲୋଚନା କରିଛନ୍ତି ପଶ୍ଚିମ ଓଡ଼ିଶାର ବିଧାୟକ।

ଦୁଇ ଦିନ ତଳେ ମୁଖ୍ୟମନ୍ତ୍ରୀ ପଶ୍ଚିମ ଓଡ଼ିଶାକୁ ଭାଗ କରିବାକୁ ଘୋଷଣା କଲେ। ଆଉ ଆଜି ପଶ୍ଚିମ ଓଡ଼ିଶାରୁ ପ୍ରତିନିଧିତ୍ବ କରୁଥିବା ରାଜସ୍ବ ମନ୍ତ୍ରୀ ସୁରେଶ ପୂଜାରୀ ଏଥିରେ ତାଳି ପକାଇବାକୁ ଚେଷ୍ଟା କରିଛନ୍ତି । ସେ କହିଛନ୍ତି, ଚୁଡାନ୍ତ ନିଷ୍ପତ୍ତି ହୋଇନି । ଲୋକଙ୍କ ମତାମତ ଆଧାରରେ ନିଆଯିବ ନିଷ୍ପତ୍ତି । ପଶ୍ଚିମ ଓଡ଼ିଶା ବିକାଶ ପରିଷଦରେ ସୁନ୍ଦରଗଡର ବିଭିନ୍ନ ବିକାଶମୂଳକ କାର୍ଯ୍ୟକ୍ରମ ହେଉଛି। ହେଲେ ହଠାତ କେଉଁ ଉଦ୍ଦେଶ୍ୟ ରଖି ପଶ୍ଚିମ ଓଡିଶାକୁ ଭାଗ କରୁଛି ବିଜେପି । ତାକୁ ନେଇ ସୁନ୍ଦରଗଡ ସମେତ ପଶ୍ଚିମ ଓଡ଼ିଶାର ଅନ୍ୟାନ୍ୟ ଜିଲ୍ଲାରେ ମଧ୍ୟ ଅସନ୍ତୋଷର ନିଆଁ ତେଜୁଛି ।