ଜୁଆ ଆଡ୍ଡା ଉପରେ ଚଢ଼ାଉ, ୮୦ରୁ ଅଧିକ ଅଟକ, ୫୦ ଲକ୍ଷରୁ ଊର୍ଦ୍ଧ୍ବ ଟଙ୍କା ଓ ୨୫ କାର ଜବତ

ନୂଆପଡ଼ା: ବଡ଼ ଧରଣର ଜୁଆ ଆଡ୍ଡା ଚାଲିଥିବା ବେଳେ ରେଡ ମାରିଲା ପୋଲିସ । ୮୦ରୁ ଅଧିକଙ୍କୁ ଧରିବା ସହ ୫୦ ଲକ୍ଷରୁ ଅଧିକ ଟଙ୍କା ଓ ୨୫ଟି କାର ଜବତ କରିଛି ପୋଲିସ ।

ଶନିବାର ବିଳମ୍ବିତ ରାତିରେ ନୂଆପଡା ଜିଲ୍ଲା ଖରିଆରରୋଡ ସହରସ୍ଥିତ ଠେଲାକୋ ବେଡା ବସ୍ତିରେ ଏହି ଜୁଆ ଆଡ୍ଡା ଚାଲିଥିଲା । ଖରିଆର ରୋଡ ସହର ସମେତ ପଡୋଶୀ ଛତିଶଗଡ ରାଜ୍ୟରୁ ବହୁ ନାମୀଦାମୀ ଲୋକ ଏଥିରେ ସାମିଲ ହୋଇଥିଲେ । ବିଶେଷ ସୂତ୍ରରୁ ଖବର ପାଇ କୋରାପୁଟ ଡିଆଇଜିଙ୍କ ନେତୃତ୍ବରେ ଏକ ପୋଲିସ ଟିମ ଅତର୍କିତ ଭାବେ ଜୁଆ ଆଡ୍ଡା ଉପରେ ଚଢାଉ କରିଥିଲେ ।

ପୋଲିସ ଟିମ ପ୍ରଥମେ ଆଡ୍ଡାକୁ ସିଲ କରି ନୂଆପଡା ଏସପି ସମେତ ଖରିଆର ରୋଡ ଥାନା ପୋଲିସକୁ ଖବର ଦେଇଥିଲେ । ଅଟକ ଲୋକଙ୍କୁ ପୋଲିସ ପଚରାଉଚରା କରୁଥିବା ବେଳେ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି ।