ନନ୍ଦିଘୋଷ ବ୍ୟୁରୋ : ଭାରତ ଅଷ୍ଟ୍ରେଲିଆ ପର୍ଥ ଟେଷ୍ଟରେ ବୋଲରଙ୍କ କମାଲ। ଗୋଟିଏ ଦିନରେ ପଡ଼ିଲା ୧୭ ୱିକେଟ। ଆଜି ପ୍ରଥମ ଦିନରେ ପ୍ରଥମ ଇନିଂସ ବ୍ଯାଟିଂ ଆରମ୍ଭ କରିଥିଲା ଭାରତ। ବ୍ୟାଟିଂ ବିପର୍ଯ୍ୟୟ ଘଟି ଭାରତ ମାତ୍ର ୧୫୦ ରନରେ ଅଲଆଉଟ ହୋଇଥିଲା। ଭାରତର ନୀତୀଶ ରେଡ୍ଡି ସର୍ବାଧିକ ୪୧ ରନ କରିଥିଲେ।ଋଷଭ ପନ୍ଥ ଦ୍ଵିତୀୟ ସର୍ବାଧିତ ୩୭ ଏବଂ କେଏଲ ରାହୁଲ ୨୬ ରନ କରିଥିଲେ। ଧ୍ରୁବ ଜୁରେଲ ୧୧ ରନ କରିଥିଲେ। ଆଉ କେହି ଦୁଇ ଅଙ୍କ ଛୁଇଁ ପାରିନଥିଲେ। ଅଷ୍ଟ୍ରେଲିଆ ବୋଲରଙ୍କ ଦବଦବା ଦେଖିବାକୁ ମିଳିଥିଲା। ହେଜଲଉଡଙ୍କୁ ସର୍ବାଧିକ ୪ ୱିକେଟ ମିଳିଥିଲା। ତେବେ ଜବାବରେ ଅଷ୍ଟ୍ରେଲିଆର ପ୍ରଥମ ଇନିଂସ ମଧ୍ୟ ଭୁଶୁଡି ପଡିଛି। ପ୍ରଥମ ଦିନ ଶେଷ ସୁଦ୍ଧା କଙ୍ଗାରୁ ଟିମ ୭ ୱିକେଟ ହରାଇ କରିଛି ମାତ୍ର ୬୭। ଆଲେକ୍ସ କେରି ସର୍ବାଧିକ ୧୯ ରନ କରି ନଟଆଉଟ ରହିଛନ୍ତି।ଭାରତୀୟ ବୋଲରଙ୍କ କମାଲ ଦେଖିବାକୁ ମିଳିଥିଲା।

ଅଧିନାୟକତ୍ଵ ସମ୍ଭାଳିଥିଲା ଯଶପ୍ରୀତ ବୁମରା ଭାରତରୁ ସର୍ବାଧିକ ୪ ୱିକେଟ ନେଇଛନ୍ତି। ମହମ୍ମଦ ସିରାଜଙ୍କୁ ୨ଟି ଓ ହର୍ଷିତ ରାଣାଙ୍କୁ ଗୋଟିଏ ୱିକେଟ ମିଳିଛି। ପ୍ରଥମ ଦିନ ଖେଳ ଶେଷ ସୁଦ୍ଧା ୮୩ ରନରେ ଆଗୁଆ ରହିଛି ଭାରତ । ଆସନ୍ତାକାଲି ଟେଷ୍ଟର ଦ୍ଵିତୀୟ ଦିନରେ ପୁଣି ୬୭ ରନରୁ ଖେଳ ଆରମ୍ଭ କରିବ କଂଗାରୁ ଟିମ।