ଶିଶୁପୁତ୍ରକୁ ମାରି ପୋତିଦେଲେ ବାପାମା’

କଟକ: ଶିଶୁପୁତ୍ରକୁ ମାରି ପୋତିଦେଲେ ନିଜ ମା ଓ ବାପା  । ଘଟଣା ଘଟିଛି ଚୌଦ୍ଵାର ଥାନା ଅନ୍ତର୍ଗତ ବ୍ୟାଘ୍ର ବାହିନୀ ଆଦିବାସୀ ସାହିରେ  । ଗତକାଲି ରାତିରେ ବାପା ରାଜୁ ହେମ୍ବ୍ରମ ଓ ମା ସୋମ୍ବାରୀ ହେମ୍ବ୍ରମ ଖାଇ ପିଇ ସାରି ଶୋଇଥିଲେl ବିଳମ୍ବିତ ରାତିରେ ରାଜୁ ହେମ୍ବ୍ରମର ବନ୍ଧୁ ନିଶାସକ୍ତ ଅବସ୍ଥାରେ ଆସି ରାଜୁ ଘରେ ପହଞ୍ଚିବା ପରେ ରାଜୁ ଓ ତା ସ୍ତ୍ରୀ ତାଙ୍କ ସହ ମିଶି ମଦ ପିଇଥିଲେ ।

ପରେ ସେମାନଙ୍କୁ ଅତ୍ୟଧିକ ନିଶା ହେବାରୁ ଶିଶୁପୁତ୍ରଟି ଶୋଇଥିବା ଅବସ୍ଥାରେ ତା ଉପରେ ଚଢ଼ି ଯାଇଥିଲେ l ଶିଶୁପୁତ୍ର ଉପରେ ଚଢ଼ିଯିବା ଫଳରେ ଶିଶୁପୁତ୍ରଟିର ଘଟଣାସ୍ଥଳରେ ପ୍ରାଣ ଚାଲିଯାଇଥିବା କହିଛନ୍ତି ସ୍ଥାନୀୟ ଲୋକେ l ଆଜି ଭୋରୁ ପରିବାର ଲୋକେ ଉଠି ଶିଶୁ ପୁତ୍ରକୁ ଉଠାଇବା ବେଳେ ଜାଣିବାକୁ ପାଇଥିଲେ ଶିଶୁପୁତ୍ରର ମୃତ୍ଯୁ ହୋଇଛି।

ପରେ ସେମାନେ ତରବରିଆ ଭାବରେ ତାକୁ ନେଇ ସ୍ଥାନୀୟ ଏକ ପରିତ୍ୟକ୍ତ ଜାଗାରେ ପୋତି ଦେଇଥିଲେ l ସ୍ଥାନୀୟ ଯୁବକ ଚୌଦ୍ଵାର ପୋଲିସ୍ କୁ ଖବର ଦେବାପରେ ପୋଲିସ ପହଞ୍ଚି ବାପାମାକୁ ଅଟକ ରଖିବା ସହ ଶିଶୁପୁତ୍ର ପୋତା ହୋଇଥିବା ସ୍ଥାନକୁ ପୋଲିସ ହେପାଜତରେ ରଖିଛି l ଶିଶୁପୁତ୍ରର ଶବକୁ ମାଟିରୁ ବାହାର କରାଯାଇ ବ୍ୟବଚ୍ଛେଦ ଲାଗି କଟକ ବଡ଼ ମେଡ଼ିକାଲକୁ ନିଆଯିବ ।