ସିନିୟର ପୁରୁଷ ଜାତୀୟ ଚମ୍ପିୟାନସିପ: ସ୍ବର୍ଣ୍ଣ ବିଜୟୀ ଟିମ୍ ଓଡ଼ିଶାକୁ ଭବ୍ୟ ସ୍ବାଗତ

ଭୁବନେଶ୍ବର: ସ୍ବର୍ଣ୍ଣ ପଦକ ହାସଲ କଲା ଫେରିଥିବା ଓଡ଼ିଶା ହକି ଟିମକୁ ଭବ୍ୟ ସ୍ବାଗତ । ପୁରୁଷ ଜାତୀୟ ଚମ୍ପିୟାନସିପରେ ଚାମ୍ପିୟନ ହୋଇ ରାଜ୍ୟକୁ ଫେରିଛି ଓଡ଼ିଶା ହକି ଟିମ୍ । ଏହି ଅବସରରେ ବିଜୟୀ ଟିମକୁ ବିମାନବନ୍ଦରରେ ରାଜ୍ୟ ସରକାରଙ୍କ ପକ୍ଷରୁ ସ୍ବାଗତ କରାଯାଇଛି ।

୧୪ ତମ ହକି ଇଣ୍ଡିଆ ସିନିୟର ପୁରୁଷ ଜାତୀୟ ଚମ୍ପିୟାନସିପରେ ଟିମ ଓଡ଼ିଶା ସ୍ବର୍ଣ୍ଣ ପଦକ ହାସଲ କରିଛି । ଚେନ୍ନାଇର ମେୟର ରାଧାକ୍ରିଷ୍ଣନନ୍‌ ହକି ଷ୍ଟାଡିୟମଠାରେ ଅନୁଷ୍ଠିତ ହୋଇଥିବା ମ୍ୟାଚରେ ଟିମ ଓଡିଶା ୫-୧ ଗୋଲରେ ଟିମ୍ ହରିୟାଣାକୁ ପରାସ୍ତ କରିଛି । ଏହି ମ୍ୟାଚରେ  ଶିଲାନନ୍ଦ ଲାକ୍ରା ହ୍ୟାଟ୍ରିକ ଗୋଲ୍ କରିଥିବା ବେଳେ ରଜତ ଆକାଶ ତିର୍କୀ ଓ ପ୍ରତାପ ଲାକ୍ରା ଉଭୟ ଗୋଟିଏ ଲେଖାଏଁ ଗୋଲ୍ କରିଥିଲେ । ଉଲ୍ଲେଖନୀୟ ପ୍ରଦର୍ଶନ ପାଇଁ ଶିଲାନନ୍ଦ ଲାକ୍ରାଙ୍କୁ ପ୍ଲେୟାର ଅଫ ଦି ମ୍ୟାଚ ଭାବେ ଘୋଷଣା କରାଯାଇଛି ।

ସୂଚନାଯୋଗ୍ୟ, ୧୯୯୩ରେ ଓଡିଶା ଦଳ ସେମି ଫାଇନାଲ ଖେଳିଥିଲା । ବିଜୟକୁ ନେଇ ଖୁସିବ୍ୟକ୍ତ କରିଛନ୍ତି କୋଚ୍, ଅଧିନାୟକ ଓ ଶୁଭେଚ୍ଛୁ ।