ନନ୍ଦିଘୋଷ ବ୍ୟୁରୋ: ବିରୋଧୀ ଦଳ ନେତା ରାହୁଲ ଗାନ୍ଧିଙ୍କ ହେଲିକପ୍ଟରକୁ ଯାଞ୍ଚ କଲେ ନିର୍ବାଚନ ଅଧିକାରୀ। ମହାରାଷ୍ଟ୍ରର ଅମରାବତୀକୁ ନିର୍ବାଚନ ପ୍ରଚାର ଲାଗି ରାହୁଲ ହେଲିକପ୍ଟରରେ ଯାଇଥିବାବେଳେ ତାହାକୁ ଯାଞ୍ଚ କରିଛନ୍ତି ଅଧିକାରୀ। ଏହି ଯାଞ୍ଚକୁ ନେଇ ରାଜନୀତି ଜୋର ଧରିଛି। କିଛି ଦିନ ତଳେ ଶିବସେନା ୟୁବିଟି ନେତା ଉଦ୍ଧବ ଠାକରେଙ୍କ ହେଲିକପ୍ଟର ଯାଞ୍ଚ ହୋଇଥିଲା। ଗତକାଲି ଝାଡଖଣ୍ଡରେ ରାହୁଲଙ୍କ ହେଲିକପ୍ଟରକୁ ଘଣ୍ଟାଏ ବିଳମ୍ବରେ ଉଡାଣ ଅନୁମତି ମିଳିଥିଲା। ଆଜି ପୁଣି ତାଙ୍କ ହେଲିକପ୍ଟରକୁ ଯାଞ୍ଚ କରାଯିବାକୁ ନେଇ ରାଜନୀତି ଜୋର ଧରିଛି। ହେଲିକପ୍ଟର ଯାଞ୍ଚ ଚାଲିଥିବାବେଳେ ରାହୁଲ ଓହ୍ଲାଇ ଦଳୀୟ କର୍ମକର୍ତ୍ତାଙ୍କ ସହ ଆଲୋଚନା କରିବା ଦେଖାଯାଇଥିଲା।
ନିର୍ବାଚନୀ ସଭା ବାତିଲ ହେବା କିମ୍ବା ବିଳମ୍ବ କରିବା ଉଦ୍ଦେଶ୍ଯରେ ରାହୁଲଙ୍କ ହେଲିକପ୍ଟରକୁ ଜାଣିଶୁଣି ବିଳମ୍ବିତ କରାଗଲା ବୋଲି ଅଭିଯୋଗ କରିଛନ୍ତି କଂଗ୍ରେସ ନେତା ଜୟରାମ ରମେଶ। ନିର୍ବାଚନୀ ସଭାରେ ରାହୁଲ ଏମଭିଏ ପକ୍ଷରୁ ଦିଆଯାଇଥିବା ଗ୍ଯାରେଣ୍ଟି ସମ୍ପର୍କରେ ଉପସ୍ଥାପନ କରିଥିଲେ। ସେପଟେ ଏନସିପି ନେତା ଶରଦ ପାୱାରଙ୍କ ହେଲିକପ୍ଟରକୁ ବି ରାଇଗଡରେ ଯାଞ୍ଚ କରାଯାଇଛି। ପୂର୍ବରୁ ଅମିତ ଶାହ, ଦେବେନ୍ଦ୍ର ଫଡନବିସ, ଏକନାଥ ସିନ୍ଦେ, ଅଜିତ ପାୱାର ଓ ଅନ୍ଯମାନଙ୍କ ହେଲିକପ୍ଟର ଯାଞ୍ଚ ହୋଇଥିବାର ଭିଡିଓ ବିଜେପି ପକ୍ଷରୁ ସେୟାର କରାଯାଉଛି। ସେପଟେ ମହାରାଷ୍ଟ୍ର ଶିରଦିରେ ନିର୍ବାଚନ ପ୍ରଚାର କରିଛନ୍ତି କଂଗ୍ରେସ ନେତ୍ରୀ ପ୍ରିୟଙ୍କା ଗାନ୍ଧି।
