ଟାକୁଆ ଟ୍ରାଜେଡି : ରାଜ୍ୟ ସରକାରଙ୍କ ଉପରେ ବର୍ଷିଲା ବିଜେଡି ଓ କଂଗ୍ରେସ

ଭୁବନେଶ୍ବର : ଦାରିଙ୍ଗବାଡ଼ି ଆମ୍ବ ଟାକୁଆ ଜାଉ ଖାଇ ମୃତ୍ଯୁ ଘଟଣା । ଗ୍ରାଉଣ୍ଡର ସତ୍ଯ ବଖାଣିଲା ବିଜେଡି । ଗ୍ରାଉଣ୍ଡକୁ ଯାଇ ଦଳ ଲୋକଙ୍କୁ ପଚାରି ବୁଝିଥିଲା ବୋଲି କହିଛନ୍ତି ବିଜେଡି ନେତା ବିକ୍ରମ ପଣ୍ଡା । ଜଣ ଜଣ କରି ମାଣ୍ଡିପଙ୍କାର ଲୋକଙ୍କୁ ଦଳ ଚାଉଳ ପାଇଥିବା ନେଇ ପଚାରିଥିଲା । ସେମାନେ କେହି ବି ଚାଉଳ ପାଇ ନଥିବା କହିଥିଲେ । ଏହା ଅତ୍ୟନ୍ତ ଦୁର୍ଭାଗ୍ୟଜନକ ବୋଲି କହିଛନ୍ତି ବିକ୍ରମ । ଚାଉଳ ନ ମିଳିବାରୁ ସେମାନେ ଆମ୍ବ ଟାକୁଆ ଖାଇଲେ । ସରକାର ଯେଉଁପରି ଘଟଣାକୁ ଲୁଚାଇବାକୁ ଚେଷ୍ଟା କରୁଛନ୍ତି, ଏଥିରୁ ତାଙ୍କ ଉଦ୍ଦେଶ୍ୟ ସଫା ଜଣା ପଡୁଛି ।  ଚାଉଳ ବଣ୍ଟନ ଠିକ ଭାବେ ହୋଇଥିଲେ, ଦୁଇଟି ଜୀବନ ଯାଇ ନଥାନ୍ତା ବୋଲି ବିକ୍ରମ କହିଛନ୍ତି । ସେପଟେ ଏହି ଘଟଣାରେ ରାଜ୍ଯ ସରକାରଙ୍କ ଉପରେ ବର୍ଷିଛନ୍ତି ବରିଷ୍ଠ କଂଗ୍ରେସ ନେତା ଶ୍ରୀକାନ୍ତ ଜେନା l କାହିଁକି ଏଯାଏଁ ଘଟଣା ସ୍ଥଳକୁ ଯାଇନାହାନ୍ତି ସ୍ୱାସ୍ଥ୍ୟମନ୍ତ୍ରୀ ଓ ଯୋଗାଣ ମନ୍ତ୍ରୀ ବୋଲି ପ୍ରଶ୍ନ କରିଛନ୍ତି । ରାଜ୍ୟର ମୁଖ୍ୟମନ୍ତ୍ରୀ ଜଣେ ଆଦିବାସୀ, ଭାରତର ରାଷ୍ଟ୍ରପତି ବି ଓଡ଼ିଶାର ଜଣେ ଆଦିବାସୀ ସଂପ୍ରଦାୟର l ଓଡ଼ିଶାରେ ଆଦିବାସୀମାନେ ଖାଦ୍ୟ ନପାଇ ଆମ୍ବ ଟାକୁଆ ଖାଇବା ମୃତ୍ୟୁ ବରଣ କରିବା ଓଡ଼ିଶାକୁ ଦେଶରେ ନିନ୍ଦିତ ଓ ଲଜ୍ଜିତ କରିଛି ବୋଲି କ୍ଷୋଭ ପ୍ରକାଶ କରିଛନ୍ତି ଶ୍ରୀକାନ୍ତ  l