ରାଜ୍ୟବାସୀଙ୍କୁ ଦୀପାବଳି ଅଭିନନ୍ଦନ ଜଣାଇଲେ ମୁଖ୍ୟମନ୍ତ୍ରୀ

ଭୁବନେଶ୍ବର: ଆଜି ହେଉଛି ଆଲୋକର ପର୍ବ ଦୀପାବଳି । ଘରେ ଘରେ ଉତ୍ସାହର ମାହୋଲ । ଲୋକେ ନିଜ ଘରକୁ ରଙ୍ଗୀନ ଆଲୋକମାଳାରେ ସଜାଇବା ସହ ଦୀପ ଜାଳୁଛନ୍ତି । ସନ୍ଧ୍ୟାରେ ପିଲାଠୁ ବୟସ୍କ ଆତସବାଜିର ମଜା ଉଠାଇବେ । ଏହାକୁ ନେଇ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ରାଜ୍ୟବାସୀଙ୍କୁ ଦୀପାବଳି ଅଭିନନ୍ଦନ ଜଣାଇଛନ୍ତି ।

ନିଜ ବାର୍ତ୍ତାରେ ମୁଖ୍ୟମନ୍ତ୍ରୀ କହିଛନ୍ତି, ସମସ୍ତଙ୍କ ଜୀବନରୁ ଅଜ୍ଞାନ ଓ ଦୁଃଖର ଅନ୍ଧାର ଦୂର ହେଉ । ସମୃଦ୍ଧିର ଓ ଜ୍ଞାନର ଆଲୋକ ବିଚ୍ଛୁରିତ ହେଉ । ବିକଶିତ ଓଡ଼ିଶା ଗଠନ ପାଇଁ ସଂକଳ୍ପ ବଦ୍ଧ ହୋଇ କାମ କରିବାକୁ ମୁଖ୍ୟମନ୍ତ୍ରୀ ଆହ୍ଵାନ ଦେଇଛନ୍ତି ।

ନିଜ ଗାଁରେ ମୁଖ୍ୟମନ୍ତ୍ରୀ ଦୀପାବଳି ପାଳନ କରିବେ । ଏଥିପାଇଁ ଆଜିଠୁ ଦୁଇ ଦିନିଆ କେନ୍ଦୁଝର ଗସ୍ତରେ ଯାଉଛନ୍ତି ମୁଖ୍ୟମନ୍ତ୍ରୀ । ଗାଁରେ ପରିବାର ଓ ଗାଁ ଲୋକଙ୍କ ସହିତ ଦୀପାବଳି ପାଳନ କରିବେ । ଦୀପାବଳିରେ ହେଉଥିବା ସୋହରାଇ ପୂଜାରେ ବି ସାମିଲ ହେବେ ।