ବିନାଶ ଭିତରେ ସରକାର ନିଜ ଗୋଡ଼ ପକାଇସାରିଲେଣି : ଲେଖାଶ୍ରୀ ସାମନ୍ତ ସିଂହାର

ଭୁବନେଶ୍ବର: ଓଡିଆ ଅସ୍ମିତା ନାମରେ କ୍ଷମତାକୁ ଆସିଥିବା ବିଜେପି ସରକାରର ପ୍ରକୃତ ମୁଖା ଖୋଲିଛି। ପବିତ୍ର କାର୍ତ୍ତିକ ମାସରେ ଶହ ଶହ ବ୍ରତଧାରୀଙ୍କୁ ନିର୍ଯାତନା ଦେଇଛନ୍ତି ସରକାର। ହବିଷ୍ୟାଳିଙ୍କ ବିଶ୍ବାସ, ପ୍ରଥା ଉପରେ ରାଜ୍ଯ ସରକାର କୁଠାରାଘାତ କରିଛନ୍ତି। ଗତକାଲି ପୁରୀରେ ହଜାର ହଜାର ହବିଷ୍ୟାଳି ହଟାହଟା ହେବାକୁ ନେଇ ରାଜ୍ଯ ସରକାରଙ୍କ ଉପରେ ବର୍ଷିଛି ବିଜେଡି।

ସାମ୍ବାଦିକ ସମ୍ମିଳନୀରେ ବିଜେଡି ମୁଖପାତ୍ର ଲେଖାଶ୍ରୀ ସାମନ୍ତ ସିଂହାର କହିଛନ୍ତି ଗତକାଲି ରାତିରେ କାକର, ଦିନରେ ଖରାର ଶିକାର ହୋଇଥିଲେ ବ୍ରତଧାରୀ।ହବିଷ୍ୟାଳିଙ୍କ ସୁରକ୍ଷା ପ୍ରତି ଧ୍ଯାନ ଦେଲେ ନାହିଁ ରାଜ୍ଯ ସରକାର। ସାଧାରଣ, ସରଳ ଓଡ଼ିଶାବାସୀଙ୍କୁ ଭଣ୍ଡାଇ ବିଜେପି ସରକାରକୁ ଆସିଲା। ହେଲେ ପ୍ରତିଦିନ ଓଡ଼ିଆ ଅସ୍ମିତା ଉପରେ କୁଠାରାଘାତ ଚାଲିଛି। ପ୍ରତିଦିନ ଓଡ଼ିଆତ୍ବ ଉପରେ ଆକ୍ରମଣ ଚାଲିଛି। କାର୍ତ୍ତିକ ମାସ ଓଡ଼ିଆମାନଙ୍କର ପବିତ୍ର ମାସ ହୋଇଥିଲେ ବି ରାଜ୍ଯ ସରକାର ବ୍ରତଧାରୀଙ୍କୁ ହେଜ୍ଞାନ କଲେ।

ପୂର୍ବତନ ମୁଖ୍ଯମନ୍ତ୍ରୀ ନବୀନ ପଟ୍ଟନାୟକଙ୍କ ସମୟରେ ୩୯ କୋଟି ଟଙ୍କା ବ୍ୟୟରେ ନିର୍ମିତ ହୋଇଥିଲା ବୃନ୍ଦାବତୀ ନିବାସ। ହବିଷ୍ୟାଳିଙ୍କ ସମସ୍ତ ସୁରକ୍ଷା ନେଇଥିଲେ ନବୀନ ସରକାର। ହେଲେ ସେସବୁ ଆଜି ନାହିଁ। ଦୁଃଖ ଓ ପରିତାପର ବିଷୟ ମାତ୍ର ୨୫ଶହ ହବିଷ୍ୟାଳିଙ୍କ ଲାଗି ବ୍ଯବସ୍ଥା ହୋଇଛି। ଅନେକ ବ୍ରତଧାରୀଙ୍କୁ କର୍ତ୍ତୃପକ୍ଷ ଧକ୍କା ମାରିଛନ୍ତି। ରେଜିଷ୍ଟ୍ରେସନ ନାମରେ ହବିଷ୍ୟାଳିଙ୍କୁ ହତାଦର କରାଯାଇଛି। ୮୦-୯୦ ବର୍ଷର ମା’ମାନଙ୍କୁ ନିର୍ଯାତନା ଦେଇଛନ୍ତି ରାଜ୍ଯ ସରକାର। ବିନାଶ ଭିତରେ ସରକାର ନିଜ ଗୋଡ଼ ପକାଇସାରିଲେଣି ବୋଲି କହିଛନ୍ତି ଲେଖାଶ୍ରୀ।