ବିଜେଡିକୁ ଖାଲି କରିବାକୁ ଦିବା ସ୍ବପ୍ନ ଦେଖୁଛି ବିଜେପି

ଭୁବନେଶ୍ବର: ବିଜେଡି ଦେଶ ସବୁଠାରୁ ଶକ୍ତିଶାଳୀ ଆଞ୍ଚଳିକ ଦଳ । ପଦଯାତ୍ରାର ସଫଳତାକୁ ଦେଖି ବିଜେପି ବିଚଳିତ । ବିଜେଡିକୁ ଖାଲି କରିଦେବା ଅହଂକାର ସହ ପିଲାଳିଆମି ଓ ଶସ୍ତା ରାଜନୀତିରେ ମାତିଛି ଶାସକ ବିଜେପି । ଯାହାକୁ ନେଇ ବିଜେପିକୁ କଡ଼ା ସମାଲୋଚନା କରିଛି ବିଜେଡ଼ି । ବିଜେଡ଼ି ବିଧାୟକ କହିଛନ୍ତି- ବିଜେପିର ତାକତ ନାହିଁ ବିଜେଡିକୁ ଖାଲି କରିବାକୁ । ରାଜନୀତିରେ କିଣାବିକା କ’ଣ ବୋଲି ଦଳ ପ୍ରେସମିଟ କରି ଘେରିଛି ଶାସକ ଦଳକୁ ।

ନବୀନ ଲୋକଙ୍କ ହୃଦୟର ନେତା । ବିଜେଡିର ପଦଯାତ୍ରା ସଫଳ ହେବା ପରେ ବିଚଳିତ ବିଜେପି । ତୃଣମୂଳ ସ୍ତରରେ ବିଜେଡି ଶକ୍ତି ଦେଖି ଶାସକ ବିଜେପି ଚିନ୍ତାରେ । ଗଣ୍ଡା ଗଣ୍ଡା ବିଧାୟକଙ୍କୁ ଲଗାଇ ଦଳ ଅପପ୍ରଚାର କରି ଚାଲିଛି ଯେ, କିଛି ବିଜେଡି ନେତା ବିଜେପିରେ ସାମିଲ ହେବ । ଶେଷରେ ବିଜେପି ରାଜ୍ୟ ସଭାପତି ମନମୋହନ ସାମଲ ବି ଏ ଅପପ୍ରଚାର ବୟାନବାଜିରେ ନିଜକୁ ସାମିଲ କରିଛନ୍ତି । ଏହାକୁ ନେଇ ବିଜେପିକୁ ଟାର୍ଗେଟ କରିଛି ବିଜେଡି । ଦଳର ମୁଖପାତ୍ର ଲେନିନ ମହାନ୍ତି କହିଛନ୍ତି, ଓଡ଼ିଶା ରାଜନୀତି କ’ଣ କିଣା ବିକା ? କାହିଁକି ବିଜେପିକୁ ନେତା ଯିବେ ? ବିଜେପିର ଏତେ ଅହଙ୍କାର ଓ ପିଲାଳିଆମି କାହିଁକି ? ବିଜେପି ଏବେ ଚଞ୍ଚକତା ଓ ଶସ୍ତା ରାଜନୀତିରେ ମାତିଛି । ବିଜେପି ରାଜ୍ୟ ସଭାପତିଙ୍କ କଥା ବିଜେପିରେ କେହି ମାନୁ ନାହାନ୍ତି । ତେଣୁ ବିଜେଡି ସମ୍ପର୍କରେ ଅବାନ୍ତର କଥାରୁ ବିଜେପି ନେତାମାନେ ନିବୃତ୍ତ ରୁହନ୍ତୁ ବୋଲି ବିଜେଡି କହିଛି । ଦଳର ବରିଷ୍ଠ ବିଧାୟକ ବଦ୍ରି ନାରାୟଣ ପାତ୍ର କହିଛନ୍ତି, ବିଜେଡିକୁ ଖାଲି କରିବାକୁ ବିଜେପିର ତାକତ ନାହିଁ । ଦଳର ନେତା କେବଳ ଶସ୍ତା ବୟାନବାଜି କରୁଛନ୍ତି ।

ବିଜେପି ରାଜ୍ଯ ସଭାପତିଙ୍କ ବିଜେଡି ଫାଙ୍କା ହୋଇଯିବା ମନ୍ତବ୍ୟକୁ କଡା ସମାଲୋଚନା କରିଛନ୍ତି ବିଜେଡି ବିଧାୟକ ଗଣେଶ୍ବର ବେହେରା । ଏହା ବିଜେପିର ମୁଙ୍ଗେରିଲାଲ୍ କେ ହସିନ ସପ୍ନେ ବୋଲି ଗଣେଶ୍ବର ଜବାବ କହିଛନ୍ତି । ସେ କହିଛନ୍ତି, ବିଜେପି ୨ ଜଣ ବିଜେଡି ରାଜ୍ୟସଭା ସାଂସଦଙ୍କୁ ଅପହରଣ କରି ଉଲ୍ଲସିତ ହେଉଛି । ବିଜେପିର ଏ   ଉଲ୍ଲାସ ସ୍ଵଳ୍ପ ଆୟୁ ।

ରାଜନୀତି ସମୀକ୍ଷକ କହିଛନ୍ତି, ବିଜେପିର ଏପରି ବୟାନ କେବଳ ଗଣମାଧ୍ୟମରେ ଚର୍ଚ୍ଚାରେ ରହିବା ଲାଗି । ଏହା ଶସ୍ତା ରାଜନୀତି । ଉଭୟ ଦଳରେ ଉଭୟ ଦଳର ନେତା ଅଛନ୍ତି । ହୁଏତ ବିଜେପିରେ ଥିବା ବିଜେଡି ନେତାମାନେ ବିଜେଡିକୁ ଫେରିପାରନ୍ତି ।

ବିଜେଡିର କଡ଼ା ଟାର୍ଗେଟ ପରେ ବ୍ୟାକଫୁଟକୁ ଯାଇଛି ଶାସକ ବିଜେପି । ବିଜେଡି ନେତାଙ୍କୁ ବିଜେପିରେ ସାମିଲ କରିବାକୁ ଚାଲିଥିବା ଅପପ୍ରଚାରରେ ରୋକ ଲାଗିବ ନାଁ ଆଗକୁ ଏହି ବୟାନବାଜି ବଢିବ ତାହାକୁ ନେଇ ନୂଆ ଚର୍ଚ୍ଚା ଆରମ୍ଭ ହୋଇଛି । ବିଜେପି  ସରକାର ଗଠନ କରିଥିଲେ ବି ବିଜେଡିର ଭୋଟ ପ୍ରତିଶତ ବିଜେପି ଠାରୁ ଢେର ଆଗରେ । ଆଉ ଏପଟେ ବିଜେଡିର ଜନ ସମ୍ପର୍କ ପଦଯାତ୍ରା ଓ ଆଗକୁ ହେବାକୁ ଥିବା ସଭ୍ୟ ସଂଗ୍ରହ ଅଭିଯାନକୁ ନେଇ ବିଜେପି ଶିବିରରେ କମ୍ପନ ସୃଷ୍ଟି ହୋଇଛି ।