ରାଜ୍ଯ କ୍ୟାବିନେଟରେ ୭ ପ୍ରସ୍ତାବକୁ ମଞ୍ଜୁରୀ

ଭୁବନେଶ୍ବର: ରାଜ୍ୟ କ୍ୟାବିନେଟ୍ ବୈଠକରେ ୭ ପ୍ରସ୍ତାବକୁ ମିଳିଛି ମଞ୍ଜୁରୀ । ମୁଖ୍ୟମନ୍ତ୍ରୀ କାମଧେନୁ ଯୋଜନାରେ ୮ଟି ବିଭିନ୍ନ ଦିଗ, ଗୋପାଳନ, ସୁରକ୍ଷା, ଦୁଗ୍ଧ ଉପାଦାନକୁ ଜାତୀୟ ସ୍ତରରେ ପହଞ୍ଚାଇବା, ମଇଁଷି ପାଳନ, ଗୋ ସମ୍ପଦ ବୀମା, ବାଛୁରୀଙ୍କୁ ଖାଦ୍ୟ ଯୋଗାଣ, ସମବାୟ ଚାଷୀ ଓ ଦୁଗ୍ଧ ଉତ୍ପାଦନକୁ ସହାୟତା, ଓମଫେଡକୁ ସଶକ୍ତ ପାଇଁ ସହାୟତା, ତୃଣ ଉତ୍ପାଦନ ଓ ସରକାରୀ ତୃଣ ଉତ୍ପାଦନ ଫାର୍ମ ଗୁଡ଼ିକୁ ସୁଦୃଢୀକରଣ କରାଯିବାକୁ ନିଷ୍ପତ୍ତି ହୋଇଛି । ଏଥିପାଇଁ ଆଗାମୀ ୫ ବର୍ଷରେ ୧୪୨୩ ଦଶମିକ ୪୭ କୋଟି ଟଙ୍କାର ବ୍ଯୟ ଅଟକଳ କରାଯାଇଛି ।

ସେହିପରି ଓଡ଼ିଶା ଉଚ୍ଚ ନ୍ଯାୟାଳୟ କର୍ମଚାରୀଙ୍କ ପାଇଁ ୫୫୦ଟି ଷ୍ଟାଫ କ୍ବାର୍ଟର୍ସ ନିର୍ମାଣ ହେବ । ସିଡିଏ ସେକ୍ଟର ୧୩ରେ ୧୦ ଏକର ପରିମିତ ଅଞ୍ଚଳରେ ୩୦ ମାସରେ ସରିବ ନିର୍ମାଣ କାର୍ଯ୍ଯ । ୨ ଶହଟି ଡି-ଟାଇପ ଓ ୩୫୦ଟି ଇ-ଟାଇପ ଘର ସହ କମ୍ଯୁନିଟି ହଲ ଓ ଖେଳ ପଡ଼ିଆର ନିର୍ମାଣ କରାଯିବ । ଏହାସହ ସରକାରୀ ପରିସଂଖ୍ଯାନ ସମ୍ପର୍କିତ ତଥ୍ୟ ପ୍ରସାରଣ ନୀତି ୨୦୨୪କୁ ମିଳିଛି ଅନୁମୋଦନ ।

ବେସରକାରୀ ଡିଲରଙ୍କ ସମୟ ସୀମା ଦେଢ଼ ବର୍ଷ ବୃଦ୍ଧି, ଓଡ଼ିଶା ସୁପ୍ରିମ ଜୁଡିସିଆଲ ସର୍ଭିସ ଓ ଓଡ଼ିଶା ଜୁଡିସିଆଲ ସର୍ଭିସ ନିୟମ ୨୦୦୭କୁ ସଂଶୋଧନ କରିବା ପାଇଁ ପଦକ୍ଷେପ ନିଆଯାଉଛି । ବିଧାନସଭା ପରିସଂଖ୍ୟାନର ତଥ୍ୟ ବିତରଣ ଉପରେ ସଂଶୋଧନ ହୋଇଛି ।