ବଲିଉଡ଼ ଫିଲ୍ମ ‘ଲାପତା ଲେଡିଜ’କୁ ଓସ୍କାର ଏଣ୍ଟ୍ରି

ମୁମ୍ବାଇ: ଅଭିନେତା ଆମୀର ଖାଁଙ୍କ ପୂର୍ବତନ ପତ୍ନୀ କିରଣ ରାଓଙ୍କ ଫିଲ୍ମ ‘ଲାପତା ଲେଡିଜ’କୁ ମିଳିଛି ଓସ୍କାର ଏଣ୍ଟ୍ରି । ଫଳରେ କିରଣଙ୍କ ସ୍ବପ୍ନ ପୂରଣ ହୋଇଛି ବୋଲି କୁହାଯାଉଛି । ଓସ୍କାର ଆୱାର୍ଡ ୨୦୨୫ ପାଇଁ ‘ଲାପତା ଲେଡିଜ’ ଶ୍ରେଷ୍ଠ ବିଦେଶୀ ଚଳଚ୍ଚିତ୍ର ବର୍ଗରେ ଟିକେଟ ପାଇଛି । ଫିଲ୍ମ ଫେଡେରେସନ୍ ଅଫ୍ ଇଣ୍ଡିଆର ସଦସ୍ୟମାନେ ଏକାଡେମୀ ପୁରସ୍କାରରେ ଭାରତର ଅଫିସିଆଲ୍ ଏଣ୍ଟ୍ରି ନେଇ ଘୋଷଣା କରିଛନ୍ତି ।

‘ଲାପତା ଲେଡିଜ’ ଆମୀର ଖାଁଙ୍କ ପ୍ରଡକ୍ସନ ବ୍ଯାନରରେ ନିର୍ମାଣ କରାଯାଇଛି । ଏହି ଫିଲ୍ମ ସମାଲୋଚକ ଓ ଦର୍ଶକଙ୍କଠାରୁ ଡେର ଭଲ ପାଇବା ସହ ଅନେକ ପୁରସ୍କାର ହାସଲ କରିଛି । ଏହି ଫିଲ୍ମକୁ କିରଣ ରାଓ ନିର୍ଦ୍ଦେଶନା ଦେଇଛନ୍ତି ।

ଚଳଚ୍ଚିତ୍ରଟି ଗତ ମାର୍ଚ୍ଚ ପହିଲାରେ ମୁକ୍ତିଲାଭ କରିଥିଲା । ଚଳଚ୍ଚିତ୍ରରେ ନିତାଂଶୀ ଗୋୟଲ, ପ୍ରତିଭା ରାଣ୍ଟା, ସ୍ପର୍ଶ ଶ୍ରୀବାସ୍ତବ ଏବଂ ଛାୟା କଦମ ମୁଖ୍ୟ ଭୂମିକାରେ ଅଭିନୟ କରିଛନ୍ତି । ଚଳଚ୍ଚିତ୍ରଟି ଏକ କମେଡି-ଡ୍ରାମା ଚଳଚ୍ଚିତ୍ର ଯେଉଁଥିରେ ଗ୍ରାମାଞ୍ଚଳର କାହାଣୀ ପ୍ରଦର୍ଶିତ ହୋଇଛି । ମାତ୍ର ୫ କୋଟି ବଜେଟରେ ନିର୍ମିତ ଏହି ଫିଲ୍ମ ୨୧ କୋଟିରୁ ଅଧିକ ଆୟ କରିଥିଲା । ଅତ୍ୟନ୍ତ ହାସ୍ଯରସ୍ଯରେ ଭରପୂର ଥିବାରୁ ସବୁ ମହଲରେ ଫିଲ୍ମଟି ପ୍ରଶଂସା ସାଉଁଟିଥିଲା । ୨୦୨୫ ମାର୍ଚ୍ଚ ୨ ରବିବାର ଦିନ ୯୭ତମ ଓସ୍କାର ପୁରସ୍କାର ସମାରୋହ ଅନୁଷ୍ଠିତ ହେବ ।