ଟ୍ରେନ ବିସ୍ଫୋରଣ ଯୋଜନା ପଣ୍ଡ ! ରେଲୱେ ଟ୍ରାକରୁ ଗ୍ଯାସ ସିଲିଣ୍ଡର ଉଦ୍ଧାର

କାନପୁର  : ପୁଣି ଟ୍ରେନ ବିସ୍ଫୋରଣ ଯୋଜନା ପଣ୍ଡ। ରେଲୱେ ଟ୍ରାକରେ ପଡିଥିବା ଏକ ଗ୍ଯାସ ସିଲିଣ୍ଡର ଉଦ୍ଧାର। ଉତ୍ତରପ୍ରଦେଶ କାନପୁର ଅଂଚଳର ଏ ଘଟଣା। ମହାରାଜପୁର ଅଂଚଳର ପ୍ରେମପୁର ଷ୍ଟେସନ ନିକଟରେ ରେଲୱେ ଟ୍ରାକରେ ଏକ ଏଲପିଜି ସିଲିଣ୍ଡର ପଡ଼ିଥିବା ଦେଖିଥିଲେ ସେହି ଟ୍ରାକରେ ଯାଉଥିବା ଏକ ମାଲବାହୀ ଟ୍ରେନର ଲୋକେ ପାଇଲଟ। ଟ୍ରାକ ମଝିରେ ଗ୍ଯାସ ସିଲିଣ୍ଡର ପଡିଥିବା ଦୂରରୁ ଦେଖି ସେ ଟ୍ରେନକୁ ଧକ୍କା ଦେବାକୁ ଆଗରୁ ଅଟକାଇ ଦେଇଥିଲେ। ସକାଳ ୬ଟା ୯ ମିନିଟ ସମୟରେ ଲୋକା ପାଇଲଟ ଟ୍ରେନକୁ ଅଟକାଇଥିଲେ। ଟ୍ରେନ ଅଟକିବା ପରେ ବରିଷ୍ଠ ରେଲୱେ କର୍ତ୍ତୃପକ୍ଷଙ୍କୁ ଖବର ଦେବା ସହ ସ୍ଥାନୀୟ ପୋଲିସକୁ ମଧ୍ୟ ଖବର ଦେଇଥିଲେ।ଏହାପରେ ଘଟଣାସ୍ଥଳରେ ସ୍ଥାନୀୟ ପୋଲିସ ଅଧିକାରୀଙ୍କ ସହ ରେଲୱେ ଅଧିକାରୀ ପହଞ୍ଚି ତନାଘନା ଆରମ୍ଭ କରିଛନ୍ତି। ଲୋକୋ ପାଇଲଟଙ୍କ ଉପସ୍ଥିତ ବୁଦ୍ଧି ଯୋଗୁଁ ଏକ ବଡ଼ ଧରଣର ଟ୍ରେନ ଦୁର୍ଘଟଣାକୁ ଅଟକାଯାଇପାରିଛି। କାନପୁର ଅଂଚଳରେ ଏହା ତୃତୀୟ ଘଟଣା ବୋଲି ଜଣାପଡିଛି। ଘଟଣାସ୍ଥଳରୁ କିଛି ମଦ ବୋତଲ  ମଧ୍ୟ ମିଳିଛି। ସିଲିଣ୍ଡରରୁ ଗ୍ଯାସ ଖାଲି କରାଯାଇ ଫରେନସିକ୍ ଲାବକୁ ପରୀକ୍ଷା ଲାଗି ପଠାଯାଇଛି। ଟ୍ରାକ ଉପରେ ଗ୍ୟାସ ସିଲିଣ୍ଡର ରଖି ଟ୍ରେନକୁ ଓଲଟାଇବାକୁ ଉଦ୍ୟମ କରାଯାଇଥିବା ସନ୍ଦେହ କରାଯାଉଛି। ଏହା ପୂର୍ବରୁ କାନପୁର-କାସଗଂଜ ରୁଟରେ ମଧ୍ୟ ଟ୍ରାକରେ ଗ୍ଯାସ ସିଲିଣ୍ଡର ରଖି ଟ୍ରେନକୁ ଓଲଟାଇବାକୁ ଉଦ୍ୟମ କରାଯାଇଥିଲା। ଏହାର ମାସକ ପରେ ପୁଣି ଏଭଳି ଘଟଣା ଦେଖିବାକୁ ମିଳିଛି ।