ସଂସଦରେ ଭିନେଶ ଫୋଗାଟ ଝଡ, ଅଲମ୍ପିକ ବହିଷ୍କାର କରିବାକୁ ଦାବି

ନୂଆଦିଲ୍ଲୀ: ଭାରତର ତାରକା ରେସଲର ଭିନେଶ ଫୋଗାଟଙ୍କୁ ପ୍ୟାରିସ ଅଲିମ୍ପିକ୍ସରେ ଅଯୋଗ୍ୟ ଘୋଷଣା ପରେ ସଂସଦରେ ଏହାକୁ କଡା ନିନ୍ଦା କରାଯାଇଛି । ରେସଲର ଭିନେଶ ଫୋଗାଟ ଅଧିକ ଓଜନ ହେତୁ ମହିଳା ରେସଲିଂ ୫୦ କିଲୋଗ୍ରାମ ବର୍ଗରୁ ଅଯୋଗ୍ୟ ଘୋଷଣା ହୋଇଥିଲେ। ତାଙ୍କର ଓଜନ ୧୦୦ ଗ୍ରାମ ଅଧିକ ଥିଲା  । ଫୋଗାଟଙ୍କ ଅଯୋଗ୍ୟତା ପରେ ଭାରତୀୟ ଅଲିମ୍ପିକ୍ ଆସୋସିଏସନ୍ ଦୁଃଖ ପ୍ରକାଶ କରିଛି।

ଲୋକସଭା ଅଧିବେଶନ ଚାଲିଥିବା ସମୟରେ ଭିନେଶ ଫୋଗାଟଙ୍କ ଅଯୋଗ୍ୟତା ଖବର ଆସିବା ମାତ୍ରେ ବିରୋଧୀ ସାଂସଦ ମାନେ ହୋହାଲ୍ଲା ଆରମ୍ଭ କରିଦେଇଥିଲେ  । ସାଂସଦ ପପୁ ଯାଦବ, ହରେନ୍ଦ୍ର ମଲିକ ଏବଂ ଚନ୍ଦ୍ରଶେଖର ଆଜାଦ ପାଟିତୁଣ୍ଡ କରିଥିଲେ। ଏହା ସହିତ ଏଆଇଏମ୍ଆଇଏମ୍ ମୁଖ୍ୟ ଏବଂ ହାଇଦ୍ରାବାଦ ସାଂସଦ ଅସଦୁଦ୍ଦିନ ଓୱେସି ମଧ୍ୟ ଗୃହରେ ହୋହାଲ୍ଲା କରିଥିଲେ। ବିରୋଧୀ ସାଂସଦମାନେ ଅଭିଯୋଗ କରିଛନ୍ତି ଯେ ଅଯୋଗ୍ୟତା ପାଇଁ ଭିନେଶ ଫୋଗାଟଙ୍କୁ ସୁଚିନ୍ତିତ ଭାବେ ଟାର୍ଗେଟ କରାଯାଇଛି। ଏହି ଉତ୍ତେଜନା ପରେ କ୍ରୀଡ଼ା ମନ୍ତ୍ରୀ ଡକ୍ଟର ମାନସୁଖ ମାଣ୍ଡଭିଆ ଭିନେଶ ଫୋଗାଟ ପ୍ରସଙ୍ଗରେ ଲୋକସଭାରେ ଉତ୍ତର ଦେବେ।

ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବ ଟ୍ୱିଟ୍ କରି କହିଛନ୍ତି ଯେ ଭିନେଶ ଫୋଗାଟ ଫାଇନାଲରେ ଖେଳି ନ ପାରିବା ପାଇଁ ହୋଇଥିବା କାରଣ ଉପରେ ଗଭୀର ଅନୁସନ୍ଧାନ ହେବା ଉଚିତ ଏବଂ ଏହା ନିଶ୍ଚିତ ହେବା ଉଚିତ ଯେ ଏହା ସତ୍ୟ ଏବଂ ଏହା ପଛରେ ପ୍ରକୃତ କାରଣ କ’ଣ?

AAP ରାଜ୍ୟସଭା ସାଂସଦ ସଞ୍ଜୟ ସିଂ କହିଛନ୍ତି ଯେ ଏହା ଭିନେଶଙ୍କ ପ୍ରତି ଅପମାନ ନୁହେଁ ବରଂ ଦେଶ ପାଇଁ ଅପମାନ। ଭିନେଶ ଫୋଗେଟ୍ ସମଗ୍ର ବିଶ୍ୱରେ ଇତିହାସ ସୃଷ୍ଟି କରିବାକୁ ଯାଉଥିଲେ, ତାଙ୍କୁ ୧୦୦ ଗ୍ରାମ ଅଧିକ ଓଜନ ଦେଖାଇ ଅଯୋଗ୍ୟ ଘୋଷଣା କରିବା ଏକ ଗୁରୁତର ଅନ୍ୟାୟ  । ସମଗ୍ର ଦେଶ ଭିନେଶଙ୍କ ସହିତ ଛିଡା ହୋଇଛି  । ଭାରତ ସରକାର ତୁରନ୍ତ ହସ୍ତକ୍ଷେପ କରିବା ଉଚିତ ଏବଂ ଯଦି ଏହି ମାମଲା ଗ୍ରହଣ ନହୁଏ ତେବେ ଅଲିମ୍ପିକ୍ସକୁ ବହିଷ୍କାର କରିବା ଉଚିତ।

ଭିନେଶ ଫୋଗାଟଙ୍କ ଅଯୋଗ୍ୟତା ଉପରେ କଂଗ୍ରେସ ନେତା ଶଶି ଥରୁର କହିଛନ୍ତି ଯେ ସେ ବିଶ୍ୱର ନମ୍ବର ୱାନ ରେସଲରଙ୍କୁ ପରାସ୍ତ କରି ଏପର୍ଯ୍ୟନ୍ତ ପହଞ୍ଚିଛନ୍ତି । ସମଗ୍ର ଦେଶରେ ଖୁସିର ଲହରୀ ଖେଳିଯାଇଥିଲା  । କିନ୍ତୁ ଏବେ ଏହି ଖବର ଦୁଃଖଦାୟକ  । ଭିନେଶ ତାଙ୍କ ପରିଶ୍ରମର ଫଳ ପାଇଲେ ନାହିଁ।