ଦରବୃଦ୍ଧି ସମସ୍ଯାରେ ଘାଣ୍ଟି ହେଉଛନ୍ତି ଲୋକ, ରଙ୍ଗ ବଦଳାଇବାରେ ବ୍ଯସ୍ତ ରାଜ୍ଯ ସରକାର

ନନ୍ଦିଘୋଷ ବ୍ୟୁରୋ: ଲକ୍ଷ୍ମୀବସ, ଓମଫେଡ କ୍ଷୀର ପରେ ଏବେ ଟାର୍ଗେଟ ରାଜଧାନୀ ରାସ୍ତାକଡ଼ ପାଚେରୀ । ଧୀରେଧୀରେ ହଟୁଛି ସବୁଜ ଆଉ ହେଉଛି ଗେରୁଆ ରଙ୍ଗ । ରାଜ୍ୟରେ ବିଜେପି ସରକାର ଆସିବା ପରେ ଜୋରସୋର ଚାଲିଛି ରଙ୍ଗ ପରିବର୍ତ୍ତନ ରାଜନୀତି । ଯାହାକୁ ନେଇ ଲୋକେ ରାଜ୍ୟ ସରକାରଙ୍କୁ ସମାଲୋଚନା କରିଛନ୍ତି । ଦରଦାମ ବୃଦ୍ଧି ନିୟନ୍ତ୍ରଣ ଓ ନିଯୁକ୍ତି ସୁଯୋଗ ସୃଷ୍ଟିକୁ ସରକାର ଗୁରୁତ୍ୱ ନ ଦେଇ ରଙ୍ଗ ପରିବର୍ତ୍ତନରେ ମାତିଥିବାରୁ ସବୁ ମହଲରୁ ହୋଇଛି ସମାଲୋଚନା ।

ରାଜଧାନୀରେ ରଙ୍ଗ ପରିବର୍ତ୍ତନ ରାଜନୀତି। ଗେରୁଆ ହେଉଛି ଭୁବନେଶ୍ବର । ହଟୁଛି ସବୁଜ, ଲାଗୁଛି ଗେରୁଆ ରଙ୍ଗ । ଦରବୃଦ୍ଧି ସମସ୍ଯାରେ ଲୋକ ଘାଣ୍ଟି ହେଉଥିବାବେଳେ ରଙ୍ଗ ବଦଳାଇବାରେ ବ୍ଯସ୍ତ ରାଜ୍ଯ ବିଜେପି ସରକାର । ପ୍ରଥମେ ଲକ୍ଷ୍ମୀ ବସର ରଙ୍ଗ ପରିବର୍ତ୍ତନକୁ ନେଇ ରାଜନୀତି ଥମି ନଥିବାବେଳେ ଓମଫେଡ଼ କ୍ଷୀର ନୂଆ ଗେରୁଆ ରଙ୍ଗରେ ମାର୍କେଟକୁ ଆସିଲା । ଆଉ ଏବେ ରାଜଧାନୀର ରାସ୍ତାକଡ଼ ପାଚେରୀରୁ ସବୁଜ ରଙ୍ଗ ଉଠାଇ ଗେରୁଆ ରଙ୍ଗରେ ଦିଆଯାଉଛି ବିଜ୍ଞାପନ । ଲୋକଙ୍କ ସେବା ଓ ସଚେତନତା ପାଇଁ ଏହା ଲେଖାଯାଇଥିଲେ ମଧ୍ୟ ରଙ୍ଗ ପରିବର୍ତ୍ତନକୁ ନାପସନ୍ଦ କରିଛନ୍ତି ଲୋକେ ।

ଡବଲ ଇଞ୍ଜିନ ନାରା ଦେଇ ରାଜ୍ଯରେ ସରକାରକୁ ଆସିଲା ବିଜେପି । ବଜେଟ ଉପରେ ଥିଲା ରାଜ୍ଯବାସୀଙ୍କ ନଜର । ନୂଆ ଓ ଜନକଲ୍ୟାଣକାରୀ ଯୋଜନା ଘୋଷଣା କରିବେ ବୋଲି ଆଶା ରଖିଥିଲେ ଜନତା । ହେଲେ ଯୋଜନାର ନାଁ ବଦଳାଇ ପୁରୁଣା ନଥିରେ ଗେରୁଆ ମଲାଟ ପକାଇଦେଲେ । ରାଜ୍ୟରେ ଦରଦାମ ବୃଦ୍ଧି ସମେତ ଅନ୍ଯାନ୍ଯ ପ୍ରସଙ୍ଗ ଭଳି ମୌଳିକ ସମସ୍ୟାର ସମାଧାନ ନ କରି ରଙ୍ଗ ଓ ନାଁ ପରିବର୍ତ୍ତନକୁ ସରକାର ଗୁରୁତ୍ୱ ଦେଉଥିବାରୁ ନାଗରିକ ସୁରକ୍ଷା ମଞ୍ଚ ପକ୍ଷରୁ ନାପସନ୍ଦ କରାଯାଇଛି। ନୂଆ ସରକାରଙ୍କ ଉପରେ ଅନେକ କିଛି ଆଶା ରଖିଛନ୍ତି ରାଜ୍ଯବାସୀ । ତେଣୁ ଲୋକଙ୍କ ମୌଳିକ ସମସ୍ଯାର ସମାଧାନ ଦିଗରେ ପଦକ୍ଷେପ ନେଇ ରଙ୍ଗ ପରିବର୍ତ୍ତନ ରାଜନୀତିରୁ ବିରତ ରହିବାକୁ ବିଭିନ୍ନ ମହଲରୁ ପରାମର୍ଶ ଦିଆଯାଇଛି।