୪୮ ବର୍ଷ ତଳେ ନ୍ୟୁୟର୍କରେ ରଥ ତିଆରି ପାଇଁ ଜାଗା ଦେଇଥିଲେ ଟ୍ରମ୍ପ୍, ରଥଯାତ୍ରା ବେଳେ ବଞ୍ଚିଲା ଜୀବନ

ନନ୍ଦିଘୋଷ ବ୍ୟୁରୋ : ଆମେରିକାରେ ନିର୍ବାଚନର ଘମାଘୋଟ ଭିତରେ ପୂର୍ବତନ ରାଷ୍ଟ୍ରପତି ଡୋନାଲ୍ଡ୍ ଟ୍ରମ୍ପଙ୍କ ଉପରେ ହୋଇଛି ଆକ୍ରମଣ । ରବିବାର ପେନସିଲଭିନିଆରେ ହୋଇଥିବା ଗୁଳିମାଡ଼ରେ ଅଳ୍ପକେ ବର୍ତ୍ତିଛନ୍ତି ଟ୍ରମ୍ପ । ଏକ ନିର୍ବାଚନୀ ସଭାରେ ଭାଷଣ ଦେଉଥିବା ବେଳେ ଛାତ ଉପରେ ଥିବା ସ୍ନାଇପର ତାଙ୍କୁ ଟାର୍ଗେଟ୍ କରିଥିଲା । ଗୁଳି ଲକ୍ଷ୍ୟଭେଦ କରିବାର ୩ ସେକେଣ୍ଡ୍ ପୂର୍ବରୁ ଟ୍ରମ୍ପ ନିଜ ମୁଣ୍ଡକୁ ନୁଆଁଇ ଦେଇଥିଲେ । ଫଳରେ ଗୁଳି ତାଙ୍କ କାନକୁ ଘଷି ହୋଇ ଚାଲିଯାଇଥିଲା । ରଖେ ହରି ତ’ ମାରେ କିଏ ? ଏଭଳି କଥା ଟ୍ରମ୍ପଙ୍କ କ୍ଷେତ୍ରରେ ପ୍ରମାଣିତ ହୋଇଛି । ଏହାରି ଭିତରେ ଇସ୍କନର ଜଣେ ବରିଷ୍ଠ ସାଧୁଙ୍କ ଗୋଟିଏ ଟ୍ୱିଟ୍ ପୁରା ଦୁନିଆର ଧ୍ୟାନ ଆକର୍ଷଣ କରିଛି । ୪୮ ବର୍ଷ ତଳେ ନ୍ୟୁୟର୍କରେ ପ୍ରଥମ ରଥଯାତ୍ରା ଆୟୋଜନ ବେଳେ ଟ୍ରମ୍ପ ଯେଉଁ ସାହାଯ୍ୟ କରିଥିଲେ ତା’ର ଫଳ ଏବେ ସିଏ ପାଇଛନ୍ତି ବୋଲି ସାଧୁ ଟ୍ୱିଟ୍ କରିଛନ୍ତି ।

Yes, for sure it's a divine intervention.

Exactly 48 years ago, Donald Trump saved the Jagannath Rathayatra festival. Today, as the world celebrates the Jagannath Rathayatra festival again, Trump was attacked, and Jagannath returned the favor by saving him.

In July 1976, Donald… https://t.co/RuTX3tHQnj

— Radharamn Das राधारमण दास (@RadharamnDas) July 14, 2024

ଇସ୍କନ ଉପସଭାପତି ରାଧାରମଣ ଦାସ ଟ୍ୱିଟ୍ କରି କହିଛନ୍ତି ଯେ, ଟ୍ରମ୍ପଙ୍କ ବଂଚିବା ଦୈବୀ ହସ୍ତକ୍ଷେପ ଥିଲା । ଜଗନ୍ନାଥଙ୍କ କୃପାରୁ ଟ୍ରମ୍ପଙ୍କ ଜୀବନ ରକ୍ଷା ହୋଇଛି । ୪୮ ବର୍ଷ ତଳେ ୧୯୭୬ ମସିହାରେ ନ୍ୟୁୟର୍କରେ ଯେତେବେଳେ ପ୍ରଥମ ରଥଯାତ୍ରା ଆୟୋଜନ ହେବାକୁ ଯାଉଥିଲା,ସେତେବେଳେ ରଥ ନିର୍ମାଣ ପାଇଁ ସ୍ଥାନ ମିଳୁନଥିଲା । ଏହି ସମୟରେ ଟ୍ରମ୍ପ୍ ଆଶାର କିରଣ ହୋଇ ଉଭା ହୋଇଥିଲେ ।

ଜଗା ରଥ ପାଇଁ ଜାଗା ଦେଇଥିଲେ ଟ୍ରମ୍ପ୍

ନ୍ୟୁୟର୍କର ପ୍ରାୟ ସବୁ ଧନୀ ବ୍ୟକ୍ତି ରଥ ନିର୍ମାଣ ପାଇଁ ନିଜ ଜାଗା ଦେବାକୁ ମନା କରିଦେଇଥିଲେ । ଏହି ସମୟରେ ଜଣେ କେହି ଟ୍ରମ୍ପଙ୍କୁ ସାକ୍ଷାତ କରିବାକୁ ପରାମର୍ଶ ଦେଇଥିଲେ । ଟ୍ରମ୍ପଙ୍କ ବୟସ ସେତେବେଳେ ୩୦ ଥିଲା । ୩୦ ବର୍ଷର ଟ୍ରମ୍ପ ସେତେବେଳେ ଆମେରିକୀୟ ରିୟଲ ଇଷ୍ଟେଟ୍ ମାର୍କେଟର ଗୋଟିଏ ବଡ଼ ଚେହେରା ଭାବେ ଉଭା ହୋଇଥିଲେ ।

ରଥ ନିର୍ମାଣ ପାଇଁ ଖାଲି ସ୍ଥାନର ଆବଶ୍ୟକତା ଥିଲା । ସେହି ସମୟରେ ଟ୍ରମ୍ପ ପେନସିଲଭିନିଆର ଗୋଟିଏ ପୁରୁଣା ରେଲ୍ ୟାର୍ଡ୍ କିଣିଥିଲେ । ଇସ୍କନ ଆମେରିକାର ପ୍ରତିନିଧି ଭକ୍ତଦାସ କିଛି ସାଥିଙ୍କ ସହିତ ଟ୍ରମ୍ପଙ୍କୁ ଭେଟିବାକୁ ତାଙ୍କ ଅଫିସକୁ ଯାଇଥିଲେ । ସେମାନେ ସାଥିରେ ମହାପ୍ରସାଦ ଓ ରଥ ନିର୍ମାଣ ପାଇଁ ସ୍ଥାନ ଦେବାକୁ ଅନୁରୋଧ ପତ୍ର ନେଇଯାଇଥିଲେ । ଟ୍ରମ୍ପଙ୍କ ସେକ୍ରେଟେରି ମହାପ୍ରସାଦ ଓ ପତ୍ର ଗ୍ରହଣ କରିଥିଲେ । କିନ୍ତୁ ଏହା ମଧ୍ୟ କହିଥିଲେ ଯେ,ଆଶା ରଖନ୍ତୁ ନାହିଁ । କାରଣ ଟ୍ରମ୍ଫ ଏଭଳି କିଛି କାମ ପାଇଁ ଜମି ଦେବାର ଆଶା ନାହିଁ । କିନ୍ତୁ ଚମତ୍କାର ହେବାକୁ ଯାଉଥିଲା ।

ଇସ୍କନ ମଧ୍ୟ ଆଶା ଛାଡ଼ି ଦେଇଥିଲା ଯେ, ଟ୍ରମ୍ପ ସେମାନଙ୍କୁ ରଥ ନିର୍ମାଣ ପାଇଁ ସ୍ଥାନ ଦେବେ । କିନ୍ତୁ ଘଟଣାର ତିନି ଦିନ ପରେ ଟ୍ରମ୍ପଙ୍କ ସେକ୍ରେଟେରିଙ୍କ ଫୋନ୍ ଆସିଥିଲା । ଫୋନରେ ସେ କହିଥିଲେ ଯେ, ମୁଁ ଜାଣିନି କ’ଣ ହେଲା କିନ୍ତୁ ଟ୍ରମ୍ପ୍ ମହାପ୍ରସାଦ ଖାଇବା ପରେ ରଥ ନିର୍ମାଣ ପାଇଁ ସ୍ଥାନ ଦେବାକୁ ରାଜି ହୋଇଥିଲେ । ତାଙ୍କ ଦସ୍ତଖତ ଥିବା ଅନୁମତି ପତ୍ର ଅଫିସ ଆସି ନେଇଯାଆନ୍ତୁ ବୋଲି ସେକ୍ରେଟେରି ଇସ୍କନ କର୍ତ୍ତୁପକ୍ଷଙ୍କୁ କହିଥିଲେ ।

ମୁଁ ଜାଣିନି ମୁଁ କାହିଁକି ଦସ୍ତଖତ କରୁଛି

ଏବେ ରାଧା ରମଣ ଦାସ ଲେଖିଛନ୍ତି ଯେ, ଭଗବାନ ଜଗନ୍ନାଥଙ୍କ ନବ ଦିନାତ୍ମକ ରଥଯାତ୍ରା ଚାଲୁଥିବା ବେଳେ ଟ୍ରମ୍ପଙ୍କ ଉପରେ ଆକ୍ରମଣ ଓ ତାଙ୍କର ବଂଚିଯିବା କିଛି ଦୈବୀ ଚମତ୍କାରଠାରୁ କମ୍ ନୁହେଁ । ୧୯୭୬ରେ କେବଳ ଟ୍ରମ୍ପଙ୍କ ମନ ବଦଳି ନଥିଲା । ନ୍ୟୁୟର୍କ ପୋଲିସର ବି ମନ ବଦଳିଥିଲା । ୧୯୬୨ ମସିହାଠାରୁ ନ୍ୟୁୟର୍କର ଫିଫ୍ଥ ଆଭେନ୍ୟୁରେ କୌଣସି ପ୍ୟାରେଡକୁ ଅନୁମତି ମିଳୁନଥିଲା । ଏହା ଉପରେ ପ୍ରତିବନ୍ଧକ ଲାଗିଥିଲା । ଏମିତିରେ ରଥ ନିର୍ମାଣ ହେଲେ ମଧ୍ୟ ରଥ କେମିତି ଚାଲିବ ତାକୁ ନେଇ ଦ୍ୱନ୍ଦ୍ୱ ଥିଲା । ଏଭଳି ପରିସ୍ଥିତିରେ ଇସ୍କନ ପ୍ରତିନିଧି ମଣ୍ଡଳି ନ୍ୟୁୟର୍କ ପୋଲିସ ମୁଖ୍ୟଙ୍କୁ ଭେଟିଥିଲେ । ଆଶ୍ଚର୍ଯ୍ୟଜନକ ଭାବେ ସେ ଅନୁମତି ଦେଇଥିଲେ ଓ ଅନୁମତି ପତ୍ରରେ ଦସ୍ତଖତ କରିବା ବେଳେ କହିଥିଲେ ‘ମୁଁ କାହିଁକି ଏଥିରେ ଦସ୍ତଖତ କରୁଛି,ମୁଁ ନିଜେ ଜାଣିନି’ ।