କେକ୍ କୁ ନେଇ ସନ୍ଦେହରେ ଧୋନୀ, ଜନ୍ମଦିନ ପାଳିବା ପରେ ପତ୍ନୀଙ୍କୁ ପଚାରିଲେ ଏମିତି
ମୁମ୍ବାଇ: ଭାରତୀୟ କ୍ରିକେଟ ଟିମ୍ର ପୂର୍ବତନ ଅଧିନାୟକ ମହେନ୍ଦ୍ର ସିଂ ଧୋନୀ ଜୁଲାଇ ୭ରେ ନିଜ ଜନ୍ମଦିନ ପାଳିଛନ୍ତି । ପତ୍ନୀ ସାକ୍ଷୀଙ୍କ ସହ ସେ କେକ କାଟୁଥିବା ଭିଡିଓ ଏବେ ଭାଇରାଲ ହେଉଛି । ୪୩ତମ ଜନ୍ମଦି୍ନ ସେଲିବ୍ରେଟ କରୁଥିବା ସମୟରେ ଧୋନୀ ଅଚାନକ ଏକ ପ୍ରଶ୍ନ କରିଥିଲେ । ଯାହାର ଉତ୍ତର ଶୁଣିବା ପରେ ସେ ଚିନ୍ତାମୁକ୍ତ ହୋଇଥିଲେ ।
ଜୁଲାଇ ୭, ୧୯୮୧ ରେ ଝାଡଖଣ୍ଡର ରାଞ୍ଚିରେ ଜନ୍ମିତ ମହେନ୍ଦ୍ର ସିଂ ଧୋନୀ ଏହି ସହରରୁ ଭାରତୀୟ ଟିମର ଅଧିନାୟକ ପର୍ଯ୍ୟନ୍ତ ଯାତ୍ରା ଆରମ୍ଭ କରିଥିଲେ । ଗତ ୧୫ ଅଗଷ୍ଟ ୨୦୨୦ରେ ଏହି ଖେଳାଳୀ ଅନ୍ତର୍ଜାତୀୟ କ୍ରିକେଟକୁ ଅଲବିଦା କହିଥିଲେ । ୪ ବର୍ଷ ପରେ ବି ଧୋନୀଙ୍କ ପ୍ରଶଂସକଙ୍କ ସଂଖ୍ୟା ସେହିଭଳି ରହିଛି ।
ଧୋନୀଙ୍କ ଜନ୍ମଦିନ ସର୍ବଦା ତାଙ୍କ ପ୍ରଶଂସକଙ୍କ ପାଇଁ ଖାସ୍ ହୋଇଥାଏ । ପତ୍ନୀ ସାକ୍ଷୀଙ୍କ ସହ କେକ କାଟୁଥିବାର ଭିଡିଓ ନିଜ ଇନଷ୍ଟାଗ୍ରାମ ପେଜ୍ରେ ସେ ସେୟାର କରିଛନ୍ତି । ଏହି ଭିଡିଓରେ ଧୋନୀ କେକ କାଟି ସାରି ସାକ୍ଷୀଙ୍କୁ ଖୁଆଉଛନ୍ତି । ଭିଡିଓ ଶେଷରେ ଧୋନୀ ଏକ ପ୍ରଶ୍ନ ପଚାରୁଥିବା ଶୁଣିବାକୁ ମିଳୁଛି । ଧୋନୀ ସାକ୍ଷୀଙ୍କୁ କେକ ଖୁଆଇବା ପରେ ସଙ୍ଗେସଙ୍ଗେ ପଚାରୁଛନ୍ତି ଯେ ଏହି କେକ ଏଗ୍ଲେସ୍ ତ ? ଏହାର ଉତ୍ତର ଶୁଣିବା ପରେ ଧୋନୀଙ୍କ ଚେହେରାରେ ଖୁସି ଦେଖିବାକୁ ମିଳିଛି ।
