ମୁଖ୍ୟ ଶାସନ ସଚିବଙ୍କ ଯୋଡ଼ା-ବଡ଼ବିଲ ଗସ୍ତ, ବିଭିନ୍ନ ଉନ୍ନୟନମୂଳକ କାର୍ଯ୍ୟର ସମୀକ୍ଷା

କେନ୍ଦୁଝର : ମୁଖ୍ୟ ଶାସନ ସଚିବ ଅସୀତ କୁମାର ତ୍ରିପାଠୀ ଯୋଡ଼ା-ବଡ଼ବିଲ ଗସ୍ତ କରି ବିଭିନ୍ନ ଖଣି ଅଞ୍ଚଳ ବୁଲି ଦେଖିବା ସହ ଉନ୍ନୟନ ମୂଳକ କାର୍ଯ୍ୟର ସମୀକ୍ଷା କରିଛନ୍ତି । ଜିଲ୍ଲା ଖଣିଜ ପାଣ୍ଠିରୁ ୫୧ ଲକ୍ଷ ଟଙ୍କା ବ୍ୟୟରେ ନିର୍ମିତ ଯୋଡ଼ା ପୌରପାଳିକା ଲାଇବ୍ରେରୀକୁ ବୁଲି ଦେଖିଥିଲେ ମୁଖ୍ୟ ଶାସନ ସଚିବ । ସେହିପରି ୬୫ ଲକ୍ଷ ଟଙ୍କାରେ ନିର୍ମିତ ଡିସେଣ୍ଟ୍ରାଲାଇଜ୍ କମ୍ପୋଜ୍ଡ ପ୍ଲାଂଟ୍ ଓ ୧କୋଟି ୫ ଲକ୍ଷ ଟଙ୍କା ଖର୍ଚ୍ଚରେ ନିର୍ମାଣ କରାଯାଇଥିବା ମାଇକ୍ରୋ କମ୍ପୋଜିଟ୍ ସେଣ୍ଟରକୁ ବୁଲି ଦେଖିଥିଲେ ।

ପରେ ବଡ଼ବିଲ ଠାରେ ୭୦ଲକ୍ଷ ଟଙ୍କା ବ୍ୟୟରେ ନବ ନିର୍ମିତ ଉଷୁ ଷ୍ଟାଡିଅମର ଲୋକାର୍ପଣ କାର୍ଯ୍ୟକ୍ରମରେ ଯୋଗଦେଇ ଏହାର ଉଦଘାଟନ କରିଥିଲେ ମୁଖ୍ୟ ଶାସନ ସଚିବ । ଖେଳାଳିଙ୍କ କ୍ରିଡା ନୈପୁଣ୍ୟତାକୁ ବେଶ୍ ପ୍ରଶଂସା କରିଥିଲେ ମୁଖ୍ୟ ଶାସନ ସଚିବ । ଜିଲ୍ଲା ଖଣିଜ ପାଣ୍ଠି (ଡିଏମଏଫ୍) ଦ୍ୱାରା କେନ୍ଦୁଝର ଜିଲ୍ଲାରେ ବିଭିନ୍ନ ଲୋକାଭିମୂଖୀ କାର୍ଯ୍ୟକ୍ରମ ହାତକୁ ନିଆଯାଇଛି ଯାହା ଲୋକଙ୍କ ମୌଳିକ ସମସ୍ୟା ଦୂର କରିବାରେ ସହାୟକ ହୋଇପାରିଛି ବୋଲି କହିଥିଲେ ଶ୍ରୀ ତ୍ରିପାଠୀ ।

ସେହିପରି ବଡ଼ବିଲ ଠାରେ ଲୋକାର୍ପିତ ହୋଇଥିବା ଉଷୁ ଷ୍ଟାଡିୟମ ଭବିଷ୍ୟତରେ ଯୁବ ଖେଳାଳୀଙ୍କୁ ପ୍ରୋତ୍ସାହିତ କରିବା ସହ ସେମାନଙ୍କର ସକାରତ୍ମକ ବିକାଶ ଦିଗରେ ସହାୟକ ହୋଇପାରିବ ବୋଲି ମୁଖ୍ୟ ଶାସନ ସଚିବ କହିଛନ୍ତି । ଏହି ଅବସରରେ ବଡ଼ବିଲ ସିଭିଲ ସୋସାଇଟି ତରଫରୁ ବାଇପାସ୍ ରିଂ ରୋଡ୍ ଓ ବଡ଼ବିଲ-ବାଂଶପାଣି ରେଳପଥ ସଂଯୋଗୀକରଣ ଦାବି ସମ୍ବଳିତ ଏକ ସ୍ମାରକପତ୍ର ମୁଖ୍ୟ ଶାସନ ସଚିବଙ୍କୁ ପ୍ରଦାନ କରାଯାଇଥିଲା ।

ଏହାପରେ ସେ ବଡ଼ବିଲ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ପରିଦର୍ଶନ କରିବା ପରେ ଅଚଳ ପଡ଼ିଥିବା ଇଡକଲ୍ କଳିଙ୍ଗ ଆଇରନ କାରଖାନାକୁ ବୁଲି ଦେଖିଥିଲେ । ଜିଲ୍ଲା ସଦର ମହକୁମାରେ ସମୀକ୍ଷା ବୈଠକରେ ଯୋଗଦେଇଥିଲେ ମୁଖ୍ୟ ଶାସନ ସଚିବ ।