ବାରିପଦାରେ ଗଡୁନି ବସ, ଯାତ୍ରୀ ହନ୍ତସନ୍ତ

ବାରିପଦା: ବାରିପଦାରେ ବସ ଚଳାଚଳ ସମୟକୁ ନେଇ ଗଣ୍ଡଗୋଳ ପରେ ଅନିର୍ଦ୍ଦିଷ୍ଟ କାଳ ପାଇଁ ବନ୍ଦ ରହିଛି ବସ ଚଳାଚଳ। ଗୋଷ୍ଠୀ ସଂଘର୍ଷ ଘଟଣାରେ ପ୍ରତିବାଦ କରାଯିବା ସହ ବସ ଚଳାଚଳ ବନ୍ଦ ରହିଛି। ଫଳରେ ଯାତ୍ରୀମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହୋଇଛନ୍ତି। ଯେଉଁ ବସ ଚଳାଚଳ ସମୟକୁ ନେଇ ବିବାଦ ଉଠିଥିଲା ସେହି ବସକୁ ବାରିପଦା ଟାଉନ ପୋଲିସ ନିଜ ହେପାଜତକୁ ନେଇଛି।

ବାରିପଦା ଘରୋଇ ବସ ମାଲିକ ସଂଘ ଅଭିଯୋଗ କ୍ରମେ ୬ ଜଣ ଆକ୍ରମଣକାରୀଙ୍କୁ ବାରିପଦା ଟାଉନ ପୋଲିସ ଗିରଫ କରିଥିବା ବେଳେ, ରାଇରଙ୍ଗପୁର ବସ ମାଲିକ ସଂଘର ଅଭିଯୋଗ ପରେ ବାରିପଦା ବସ ମାଲିକ ସଂଘର ୪ ଜଣଙ୍କୁ ଗିରଫ କରିଛି ବାରିପଦା ଟାଉନ ପୋଲିସ। ବାରିପଦା ଘରୋଇ ବସ ମାଲିକ ସଂଘର ସମ୍ପାଦକ ସୁନୀଲ ଦାସଙ୍କୁ ପୋଲିସ ଗିରଫ କରିବା ପରେ ବସ ମାଲିକ ସଂଘର କର୍ମକର୍ତ୍ତାଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ସ୍ଥିତିକୁ ନଜରରେ ରଖି ଉଭୟ ବସ ମାଲିକ ସଂଘର କର୍ମକର୍ତ୍ତାଙ୍କୁ ନେଇ ଆଲୋଚନା କରିଛି ପୋଲିସ।