ସ୍ବାତୀ ମାଲିୱାଲଙ୍କ ଆଉ ଏକ ଭିଡିଓ ଭାଇରାଲ, ସିଏମ ଆବାସରୁ ଘୋଷାଡି ନେଉଥିଲେ ସୁରକ୍ଷାକର୍ମୀ
ନୂଆଦିଲ୍ଲୀ: ସିଏମ ବାସଭବନରେ ରାଜ୍ୟସଭା ସାଂସଦ ସ୍ବାତୀ ମାଲିୱାଲଙ୍କ ସହ ମାରପିଟ୍ ଘଟଣାରେ ଆଉ ଏକ ଭିଡିଓ ସାମନାକୁ ଆସିଛି । ମେ ୧୩ର ଭାଇରାଲ ହୋଇଥିବା ସିସିଟିଭିରେ ଦେଖାଯାଉଛି ଯେ ସ୍ବାତୀ ମାଲିୱାସ ଖୁବ ଜୋରରେ ସିଏମ ବାସଭବନରୁ ବାହାରକୁ ଆସୁଛନ୍ତି । ଜଣେ ମହିଳା ସୁରକ୍ଷାର୍ମୀ ତାଙ୍କ ହାତ ଧରି ବାହାରକୁ ଆଣୁଥିବା ବେଳେ ପାଖରେ ଆଉ ତିନି ଜଣ ସୁରକ୍ଷାକର୍ମୀ ନଜର ଆସୁଛନ୍ତି ।
ବାହାରକୁ ଆସିବା ମାତ୍ରେ ମହିଳା ସୁରକ୍ଷାକର୍ମୀ ଜଣଙ୍କ ସ୍ବାତୀଙ୍କ ହାତ ଛାଟି ଦେଉଥିବା ଦେଖିବାକୁ ମିଳୁଛି । ଏହି ସମୟରେ ସେଠାରେ ଆଉ ଦୁଇ ଜଣ ପୋଲିସକର୍ମୀ ନଜର ଆସୁଛନ୍ତି । ଏହା ପୂର୍ବରୁ ଶୁକ୍ରବାର ସ୍ବାତୀଙ୍କ ଏକ ଭିଡିଓ ଭାଇରାଲ ହୋଇଥିଲା । ଯେଉଁଥିରେ ସିଏମ ଆବାସ ଭିତରେ କିଛି କର୍ମଚାରୀ ତାଙ୍କୁ ବାହାରକୁ ଯିବା ପାଇଁ କହୁଥିଲେ । ଏହି ସମୟରେ ସେଠାରେ ଥିବା ମୁଖ୍ୟମନ୍ତ୍ରୀ କେଜ୍ରିୱାଲଙ୍କ ପିଏସ ବିଭବ କୁମାରଙ୍କ ଉପରେ ବିରକ୍ତି ହେଉଥିଲେ ସ୍ବାତୀ । ‘‘ଯାହା କରିବାର ଅଛି କର, ମୁଁ ଆଜି ତମ ମାନଙ୍କୁ ଦେଖିନେବି । ତୁମ ମାନଙ୍କ ଚାକିରି ଖାଇବି । ଡିସିପିଙ୍କ ସହ ମୋର କଥା କରାଇ ଦିଅ । ମୋତେ ହାତ ଲଗାଇଲେ ମୁଁ ସମସ୍ତଙ୍କୁ ଦେଖିନେବି’’ ।
ଏହି ମାମଲାରେ ଦିଲ୍ଲୀ ପୋଲିସ ସାକ୍ଷ୍ୟ ପ୍ରମାଣଙ୍କ ବୟାନ ରେକର୍ଡ କରିଛି । ବିଭବ କୁମାରଙ୍କୁ ଗିରଫ କରିବା ପୂର୍ବରୁ ପୋଲିସ ସବୁ ପ୍ରମାଣ ଏକାଠି କରୁଛି ।
