ଫୁଲବାଣୀରେ କିଏ ମାରିବ ବାଜି?
1 min read
ନନ୍ଦିଘୋଷ ବ୍ୟୁରୋ: କନ୍ଧମାଳ ଜିଲ୍ଲାରେ ୩ଟି ବିଧାନସଭା ନିର୍ବାଚନମଣ୍ଡଳୀ ଅଛି। ଫୁଲବାଣୀ, ଜି. ଉଦୟଗିରି ଏବଂ ବାଲିଗୁଡ଼ା । ଏହି ୩ ନିର୍ବାଚନମଣ୍ଡଳୀ ମଧ୍ୟରୁ ଫୁଲବାଣୀର ସ୍ୱତନ୍ତ୍ର ପରିଚୟ ରହିଛି । ଏଠାକାର ଭୋଟର ସର୍ବଦା ବିକାଶକୁ ଗୁରୁତ୍ୱ ଦେଇଥାନ୍ତି। ଏକଦା କଂଗ୍ରେସର ଗଡ଼ କୁହାଯାଉଥିବା ଫୁଲବାଣୀ ନିର୍ବାଚନମଣ୍ଡଳୀ ଏବେ ବିଜେଡିର ଅଭେଦ୍ୟ ଗଡ଼ରେ ପାଲଟିଛି ।
ଫୁଲବାଣୀ ବିଧାନସଭା ନିର୍ବାଚନମଣ୍ଡଳୀଟି ଫୁଲବାଣୀ, ଚକାପାଦ, ଖଜୁରିପଡ଼ା ଓ ଫିରିଙ୍ଗିଆ ବ୍ଲକକୁ ନେଇ ଗଠିତ । ଏଠାରେ ଭୋଟର ସଂଖ୍ୟା ୧ ଲକ୍ଷ ୯୬ ହଜାର l ୨୦୦୯ରେ ବିଜେଡିର ଦେବେନ୍ଦ୍ର କହଁର ୩୮ ହଜାର ୯୨ ଭୋଟ ପାଇ ବିଜୟୀ ହୋଇଥିଲେ। ବିଜେପିର ଦେବ ନାରାୟଣ ପ୍ରଧାନଙ୍କୁ ୨୯ ହଜାର ୩୬୩ ଏବଂ କଂଗ୍ରେସର ଜଳନ୍ଧର କହଁରଙ୍କୁ ୨୩ ହଜାର ୬୬୯ ଭୋଟ ମିଳିଥିଲା l ୨୦୧୪ରେ ବିଜେଡିର ଦୁଗୁନି କହଁର ୫୮ ହଜାର ୨୭୩ ଭୋଟ ପାଇ ଜିତିଥିଲେ। ବିଜେପିର ଦେବ ନାରାୟଣ ପ୍ରଧାନଙ୍କୁ ୩୨ ହଜାର ୪୭୮ ଏବଂ କଂଗ୍ରେସର ସୁଦର୍ଶନ କହଁରଙ୍କୁ ୨୧ ହଜାର ୫୧୦ ଭୋଟ ମିଳିଥିଲା l ୨୦୧୯ରେ ବିଜେଡିର ଅଙ୍ଗଦ କହଁର ୬୫ ହଜାର ୫୬୪ ଭୋଟ ପାଇ ଜୟଯୁକ୍ତ ହୋଇଥିଲେ। ବିଜେପିର ଦେବ ନାରାୟଣ ପ୍ରଧାନଙ୍କୁ ୪୧ ହଜାର ୧୪୮ ଓ କଂଗ୍ରେସର କିଶୋର କହଁରଙ୍କୁ ୨୩ ହଜାର ୩୧୭ ଭୋଟ ମିଳିଥିଲା। ଚଳିତ ନିର୍ବାଚନରେ ବିଜଡିରୁ ଜୟଶ୍ରୀ କହଁର, କଂଗ୍ରେସରୁ ପ୍ରତିଭା କହଁର ଏବଂ ବିଜେପିରୁ ଉମାଚରଣ ମଲ୍ଲିକଙ୍କୁ ଟିକେଟ ମିଳିଛି ।
୨୦୦୪, ୨୦୦୯ , ୨୦୧୪ ଏବଂ ୨୦୧୯ରେ ଫୁଲବାଣୀରେ ବିଜେଡି ବାଜିମାତ୍ କରିଥିଲା। ଏଥର ପୁଣି ଜିତିବା ଲକ୍ଷ୍ଯରେ ରହିଛି । ବିକାଶକୁ ମୁଦ୍ଦା କରିଛି ବିଜେଡି। ସେହିଭଳି ବିଜେପି କେନ୍ଦ୍ରର ଜନହିତକର କାର୍ଯ୍ୟକୁ ଆଗରେ ରଖି ନିର୍ବାଚନୀ ବୈତରଣୀ ପାର୍ ହେବା ପାଇଁ ଲକ୍ଷ୍ଯ ରଖିଛି। ଚାଷୀଙ୍କ ସମସ୍ୟାକୁ ମୁଖ୍ୟ ମୁଦ୍ଦା କରିଛି କଂଗ୍ରେସ।
