ଏବେବି ଅଭିନନ୍ଦନଙ୍କୁ ଖୋଜୁଛନ୍ତି ପାକିସ୍ତାନୀ, ଗୁଗଲର ସର୍ବାଧିକ ସର୍ଚ୍ଚ ଲିଷ୍ଟରେ ଅଛନ୍ତି ଭାରତୀୟ ଓ୍ୱିଙ୍ଗ୍ କମାଣ୍ଡର
ନୂଆଦିଲ୍ଲୀ: ପାକିସ୍ତାନ ବିମାନକୁ ଧ୍ୱଂସ କରିଥିବା ତଥା ବାଲାକୋଟ ଏୟାର ଷ୍ଟ୍ରାଇକର ହିରୋ ଭାରତୀୟ ବାୟୁ ସେନାର ୱିଙ୍ଗ୍ କମାଣ୍ଡର ଅଭିନନ୍ଦନ ବର୍ତ୍ତମାନ ୨୦୧୯ରେ ପାକିସ୍ତାନରେ ବହୁ ଚର୍ଚ୍ଚାର ପରିସରକୁ ଆସିଛନ୍ତି । ସେ ପାକିସ୍ତାନରେ ଗୁଗଲ ସର୍ଚ୍ଚରେ ସାମିଲ ହୋଇଥିବା ବ୍ୟକ୍ତିଙ୍କ ମଧ୍ୟରେ ଶୀର୍ଷରେ ଥିବା ଜଣାପଡିଛି । ପାକିସ୍ତାନରେ ଅଧିକ ଲୋକ ତାଙ୍କୁ ଖୋଜିଛନ୍ତି । ତେବେ ତାଙ୍କ ସହ ଲିଷ୍ଟରେ ବଲିଉଡର ଚର୍ଚ୍ଚିତ ଅଭିନେତ୍ରୀ ସାରା ଅଲ୍ଲି ଖାନ୍ ଓ ଗାୟକ ଅଦନାନ୍ ସାମି ମଧ୍ୟ ସାମିଲ ଅଛନ୍ତି ।
ବଲିଉଡ୍ରେ ସାରା ପ୍ରଥମେ ‘କେଦାରନାଥ’ ଫିଲ୍ମ ଜରିଆରେ ତାଙ୍କର କ୍ୟାରିୟର ଆରମ୍ଭ କରିଥିଲେ । ଏହାପରେ ତାଙ୍କୁ ବର୍ତ୍ତମାନ ଗୋଟିଏ ପରେ ଗୋଟିଏ ଅଫର ମିଳିବାରେ ଲାଗିଛି ।
ସେହିପରି ଗତ ଫେବୃୟାରୀରେ ଭାରତୀୟ ବାୟୁସେନାର ୱିଙ୍ଗ୍ କମାଣ୍ଡର ଅଭିନନ୍ଦନ ବର୍ତ୍ତମାନ ପୁଲୱାମା ଆତଙ୍କବାଦୀ ଆକ୍ରମଣ ପରେ ଭାରତର ଏୟାର ଷ୍ଟ୍ରାଇକରେ ମୁଖ୍ୟ ଭୂମିକା ଗ୍ରହଣ କରିଥିଲେ । ସେତେବେଳେ ସେ ବାଲାକୋଟ ଏୟାର ଷ୍ଟ୍ରାଇକରେ ପାକିସ୍ତାନ ବିମାନ ଧ୍ୱଂସ କରିବା ସହ ପାକିସ୍ତାନ ସୀମାକୁ ଚାଲି ଯାଇଥିବାରୁ ପାକ୍ ସେନା ତାଙ୍କୁ ବନ୍ଦୀ କରି ରଖିଥିଲେ । ବହୁ ବାଦ ବିବାଦ ପରେ ପାକ୍ ସେନା ତାଙ୍କୁ ଛାଡ଼ିଦେଇ ଥିଲେ । ଏହାପରେ ତାଙ୍କୁ କିଛିଦିନ ବିରତି ଦିଆଯିବା ପରେ ଏବେ ପୁଣିଥରେ ତାଙ୍କୁ ବାୟୁସେନା ବିମାନ ଉଡାଇବାକୁ ଦିଆଯାଇଛି ।
