ଅହମ୍ମଦାବାଦ: ଗୁଜରାଟ ଉପକୂଳରୁ ଧରାପଡ଼ିଲା ବିପୁଳ ପରିମାଣର ନିଶାଦ୍ରବ୍ୟ। ୮୬ କେଜି ଓଜନର ନିଶାଦ୍ରବ୍ୟ ଧରିଛି କୋଷ୍ଟଗାର୍ଡ ସହ ଏଟିଏସ ଓ ଏନସିବିର ମିଳିତ ଟିମ। ଜବତ ନିଶାଦ୍ରବ୍ୟର ବଜାର ମୂଲ୍ୟ ପ୍ରାୟ ୬ଶହ କୋଟି ହେବ। ଏକ ପାକିସ୍ତାନୀ ଡଙ୍ଗା ମଧ୍ୟ ଧରାପଡ଼ିଛି। ଡଙ୍ଗାରେ ଥିବା ୧୪ ଜଣ ପାକିସ୍ତାନ ନାଗରିକଙ୍କୁ ଗିରଫ କରିଛି କୋଷ୍ଟଗାର୍ଡ।
ତଟରକ୍ଷୀ ବାହିନୀର ଜାହାଜ ରାଜରତନ ସହାୟତାରେ ଗୁଜରାଟ ଏଟିଏସ ଏବଂ ଏନସିବିର ମିଳିତ ଅପରେସନରେ ଏହି ସଫଳତା ମିଳିଛି। ପୋରବନ୍ଦରର ପଶ୍ଚିମ ଉପକୂଳ ଆରବସାଗରରେ ପାକିସ୍ତାନୀ ଡଙ୍ଗାକୁ ଧରିଥିଲା କୋଷ୍ଟଗାର୍ଡ। ଗୁପ୍ତ ସୂଚନା ପାଇ ରେଡ୍ କରିଥିଲା କୋଷ୍ଟଗାର୍ଡର ଏହି ମିଳିତ ଟିମ୍। ଅପରେସନରେ ଏକ ଜାହାଜ ସହ ବିମାନ ମୁତୟନ ହୋଇଥିଲା।
ତେବେ ଜାହାଜରେ କୋଷ୍ଟଗାର୍ଡ ସହ ଏଟିଏସ ଟିମ ମୁତୟନ ଥିଲେ। ପୂର୍ବରୁ ରବିବାର ସକାଳେ ଏନସିବି ଏବଂ ଏଟିଏସ ୩ଶହ କୋଟିର ନିଶାଦ୍ରବ୍ୟ ଜବତ କରିଥିଲା। ପୂର୍ବରୁ ଗତ ମାର୍ଚ୍ଚରେ ଗୁଜରାଟ ଏବଂ ରାଜସ୍ଥାନରେ ମୋଟ ୯୩୨ କୋଟି ମୂଲ୍ୟର ନିଶାଦ୍ରବ୍ୟ ଧରିଥିଲା ତଟସୁରକ୍ଷା ବାହିନୀ।
