ଶିକ୍ଷକ ନିଯୁକ୍ତିକୁ ନେଇ ରାଜନୀତି କରିବା କେତେଦୂର ଯୁକ୍ତିଯୁକ୍ତ: ସସ୍ମିତ ପାତ୍ର

ଭୁବନେଶ୍ୱର: କନିଷ୍ଠ ଶିକ୍ଷକ ଯୋଜନାଭିତ୍ତିକ ନିଯୁକ୍ତିକୁ ନେଇ ସ୍ପଷ୍ଟୀକରଣ ରଖିସାରିଛି EdCIL। ଏହାସହ ଓଡ଼ିଶା ସ୍କୁଲ ଶିକ୍ଷା କାର୍ଯ୍ୟକ୍ରମ କର୍ତ୍ତୃପକ୍ଷ- ଓସେପା ମଧ୍ୟ ପ୍ରତିକ୍ରିୟା ରଖିସାରିଛି । ଏହାସତ୍ବେ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଦ୍ବାରା ପରିଚାଳିତ ବୋଲି କୁହାଯାଉଥିବା ଏକ ଆଇଟି ସେଲ୍ ଏନେଇ ତୁମ୍ବିତୋଫାନ୍ କରିଚାଲିଛି । ଏକ ଅଣସ୍ବୀକୃତ ଦସ୍ତଖତ ବିହୀନ ଓଡ଼ିଆ ପ୍ରେସ ରିଲିଜକୁ ଉଦ୍ଦେଶ୍ୟମୂଳକ ଭାବେ ପ୍ରଚାର କରି ବିଭ୍ରାନ୍ତ କରୁଛନ୍ତି । ଶିକ୍ଷକ ନିଯୁକ୍ତିକୁ ନେଇ ରାଜନୀତି କରିବା କେତେଦୂର ଯୁକ୍ତିଯୁକ୍ତ ବୋଲି ବିଜେଡି ସାଂସଦ ସସ୍ମିତ ପାତ୍ର ପ୍ରଶ୍ନ କରିଛନ୍ତି ।

ମିଛ ଖବରକୁ ଅପପ୍ରଚାର କରି କୌଣସି ମତେ ପଲିଟିକାଲ ମାଇଲେଜ୍ ପାଇଁ ଉଦ୍ୟମ କରୁଛନ୍ତି ବିରୋଧୀ । ଏନେଇ ସୋସିଆଲ୍ ମିଡିଆ ଏକ୍ସରେ ସସ୍ମିତ ପାତ୍ର EdCILର ବିଜ୍ଞପ୍ତି ଅପଲୋଡ୍ କରିଛନ୍ତି । ଗତ ଅଗଷ୍ଟ ୨୨ତାରିଖରେ କନିଷ୍ଠ ଶିକ୍ଷକ ଯୋଜନାଭିତ୍ତିକ ନିଯୁକ୍ତି ପାଇଁ ପରୀକ୍ଷା ହୋଇଥିଲା। ଏହାକୁ EdCIL ପରିଚାଳନା କରିଥିଲା । କେନ୍ଦ୍ରୀୟ ସଂସ୍ଥା EdCIL ‘ମିନି ରତ୍ନ’ କାଟେଗୋରୀରେ ଆସେ । ଯାହା କେନ୍ଦ୍ରୀୟ ବିଦ୍ୟାଳୟ, ଜବାହର ନବୋଦୟ ବିଦ୍ୟାଳୟ, ଏମ୍ସ, ଭାରତୀୟ ସେନା ଏବଂ ଅନ୍ୟ ସଂସ୍ଥା ପାଇଁ ହଜାର ହଜାର ସଂଖ୍ୟାରେ ନିଯୁକ୍ତି କରିଥାଏ ।