ସାନିଆ-ସୋଏବଙ୍କ ହାଇପ୍ରୋଫାଇଲ ଡିଭୋର୍ସକୁ ନେଇ ଭାରତ ଓ ପାକିସ୍ତାନରେ ହଲଚଲ, ସାନିଆଙ୍କ ସପକ୍ଷରେ ପାକିସ୍ତାନୀ ଫ୍ୟାନ  

ନନ୍ଦିଘୋଷ ବ୍ୟୁରୋ: କ୍ରୀଡ଼ା ଜଗତରେ ହଇଚଇ । ଟପ କ୍ରିକେଟର ଓ ଟେନିସ ସୁପର ଷ୍ଟାରଙ୍କ ହାଇପ୍ରୋଫାଇଲ ଡିଭୋର୍ସକୁ ନେଇ ଭାରତ ଓ ପାକିସ୍ତାନ ହଲଚଲ । କାହିଁକି ଘଟିଲା ସୋଏବ ମଲ୍ଲିକ ଓ ସାନିଆ ମୀର୍ଜାଙ୍କ ମଧ୍ୟରେ ବିବାହ ବିଚ୍ଛେଦ? ଭାରତୀୟ କ୍ରୀଡ଼ାର ଆମ୍ବାସାଡର ସାନିଆଙ୍କୁ କାହିଁକି ପରିତ୍ୟାଗ କଲେ ସୋଏବ? କିଛି ମାସ ତଳୁ ଏହି ବିବାହ ବିଚ୍ଛେଦ ଘଟିଥିବା ନେଇ ସୂଚନା ଦେଇଛନ୍ତି ସାନିଆଙ୍କ ବାପା ଇମ୍ରାନ । ସେ କହିଛନ୍ତି- ଏହି ଡିଭୋର୍ସ ଥିଲା ଇସଲାମ ଧର୍ମ ଅନୁସାରେ ’ଖୁଲା’ । କୁହାଯାଉଛି ସୋଏବଙ୍କ ପରକୀୟା ପ୍ରୀତିରେ ଉତକ୍ଷିପ୍ତ ହୋଇ ସାନିଆ ଦେଇଥିଲେ ’ଖୁଲା’ । ଗତ ସପ୍ତାହରେ ବିବାହ ବିଚ୍ଛେଦ ନେଇ କ୍ରିପ୍ଟିକ ମେସେଜ ପୋଷ୍ଟ କରିଥିଲେ ଟେନିସ ତାରକା । ସାନିଆଙ୍କ ଟୁଇଟର ତିନି ଦିନ ପରେ କଳ୍ପନାଜଳ୍ପନାର ଅବସାନ ଘଟାଇଥିଲେ ସୋଏବ । ପାକ ଅଭିନେତ୍ରୀ ସାନା ଜାଭେଦଙ୍କ ସହ ନିକାହର ଫଟୋ ପ୍ରକାଶ କରି ସସପେନ୍ସର ଘଟାଇଥିଲେ ଅନ୍ତ ।

ପୂର୍ବରୁ ନିଜର ମେସେଜରେ ସାନିଆ ଦର୍ଶାଇଥିଲେ ବିବାହ ହେଉଛି କଷ୍ଟସାଧ୍ୟ । ଛାଡପତ୍ର ବି କଷ୍ଟସାଧ୍ୟ । ଆମକୁ କଠିନତାକୁ ବାଛିବାକୁ ପଡିବ । ତେବେ ବୁଦ୍ଧିମାନର ସହ କାର୍ଯ୍ୟ କରିବାକୁ ପଡିବ । କିଛି ଦିନ ତଳେ ସାନିଆଙ୍କୁ ଇନଷ୍ଟାଗ୍ରାମରେ ଅନଫଲୋ କରିଥିଲେ ସୋଏବ । ବାସ୍ ତା ପରଠାରୁ ଡିଭୋର୍ସ ନେଇ ଆରମ୍ଭ ହୋଇଥିଲା ଚର୍ଚ୍ଚା । ସେପଟେ ଛାଡପତ୍ର ପରେ ପାକିସ୍ତାନ ସୋସିଆଲ ମିଡିଆରେ ସାନିଆଙ୍କ ସପକ୍ଷରେ ବଢିଛି ସମବେଦନାର ସୁଅ । ବିଚ୍ଛେଦକୁ ସହଜରେ ଗ୍ରହଣ କରିପାରିନାହାନ୍ତି ପ୍ରଶଂସକ ।

ସୋଏବ ମଲ୍ଲିକଙ୍କ ରସିକିଆ ଜୀବନ ଥିଲା କିଛି ଏପରି । ୨୦୦୨ରେ ଆୟେଶା ସିଦ୍ଦିକଙ୍କୁ ବିବାହ କରିଥିଲେ ସୋଏବ । ଏହି ବିବାହର ଅନ୍ତଘଟିଥିଲା ଏପ୍ରିଲ ୨୦୧୦ରେ । ତେବେ ବିଚ୍ଛେଦର ମାତ୍ର ୫ ଦିନ ପରେ ସାନିଆ ମୀର୍ଜାଙ୍କ ହାତ ଧରିଥିଲେ କ୍ରିକେଟ ଷ୍ଟାର । ଶେଷରେ ୫ ମାସ ତଳେ ସାନିଆଙ୍କୁ ପରିତ୍ୟାଗ କରି ଗତ ଜାନୁଆରୀ ୨୦ରେ ଅଭିନେତ୍ରୀ ସାନା ଜାଭେଦଙ୍କୁ ବିବାହ କରିଥିଲେ ସୋଏବ । ପୂର୍ବରୁ ୨୦୨୦ରେ ସାନା ଜାଭେଦଙ୍କ ସହ ଗାୟକ ଉମେର ଜସଓ୍ବାଲଙ୍କ ହୋଇଥିଲା ବିବାହ । ମାତ୍ର କିଛି ମାସ ପରେ ସେମାନଙ୍କ ବିବାହରେ ପଡିଥିଲା ପୂର୍ଣ୍ଣଚ୍ଛେଦ । ଅକ୍ଟୋବର ୨୦୧୮ରେ ସାନିଆଙ୍କ ଗର୍ଭରୁ ଜନ୍ମ ନେଇଥିଲା ପୁଅ ଇଜାନ ମୀର୍ଜା ମଲିକ ।