କାହିଁକି ଅଧିକ ସମୟ ବିଶ୍ରାମ ନେବେ ମହିଳା ?

ନନ୍ଦିଘୋଷ ବ୍ୟୁରୋ: ବ୍ୟସ୍ତବହୁଳ ଜୀବନରେ ସବୁ ବର୍ଗର ଲୋକ ନିଦ୍ରାହୀନତା ସମସ୍ୟାର ଶିକାର ହେଉଛନ୍ତି। ଅର୍ଥାତ୍ ସୁନିଦ୍ରାର ଅଭାବ। ସାଧାରଣତଃ ଷ୍ଟ୍ରେସ୍, ଶାରୀରିକ ଅସୁସ୍ଥତା କିମ୍ବା ମେଡିସିନ ଖାଇଥିଲେ ସଠିକ୍ ନିଦ୍ରା ହୁଏ ନାହିଁ । ତେବେ ଭଲନିଦ କେବଳ ଶରୀରକୁ ସୁସ୍ଥ ରଖେ ତା ନୁହେଁ । ବରଂ ମାନସିକ ସ୍ତରକୁ ମଧ୍ୟ ସୁସ୍ଥ ରଖିବାରେ ସହାୟକ ହୁଏ । ଜଣେ ସୁସ୍ଥ ରହିବା ପାଇଁ ପ୍ରତ୍ୟହ ୭-୮ ଘଣ୍ଟା ଶୋଇବା ଜରୁରୀ । କିନ୍ତୁ ପୁରୁଷଙ୍କ ତୁଳନାରେ ମହିଳା ମାନେ ଅଧିକ ବିଶ୍ରାମ ନେବା ଜରୁରୀ ।

କାହିଁକି ଅଧିକ ସମୟ ବିଶ୍ରାମ ନେବେ ମହିଳା ?

କେବଳ ବୟସ ନୁହେଁ ବରଂ ବିଶ୍ରାମ ପାଇଁ ଲିଙ୍ଗକୁ ମଧ୍ୟ ଗୁରୁତ୍ବ ଦିଆଯାଏ । ନିକଟରେ କରାଯାଇଥିବା ଏକ ଅଧ୍ୟୟନରୁ ଏଭଳି ତଥ୍ୟ ସାମ୍ନାକୁ ଆସିଛି। ଅର୍ଥାତ୍ ପୁରୁଷ ଅପେକ୍ଷା ମହିଳା ମାନେ ଅଧିକ ସମୟ ବିଶ୍ରାମ ନେବା ଉଚିତ୍। କାରଣ ମହିଳାଙ୍କ ମସ୍ତିଷ୍କ ପୁରୁଷଙ୍କ ଅପେକ୍ଷା ଅଧିକ ପରିଶ୍ରମ କରିଥାଏ । ଯେଉଁଥିପାଇଁ ସେମାନେ ସୁସ୍ଥ ହେବା ପାଇଁ ରାତିରେ ଅଧିକ ଶୋଇବା ଆବଶ୍ୟକ କରିଥାନ୍ତି । ଏତତ୍ ବ୍ୟତୀତ ପୁରୁଷମାନଙ୍କ ଅପେକ୍ଷା ମହିଳାଙ୍କ ଠାରେ ହରମୋନାଲ ପରିବର୍ତ୍ତନ ଅଧିକ ଦେଖାଯାଏ । ଯେଉଁ କାରଣରୁ ସେମାନଙ୍କ ଶରୀର ଅଧିକ ଥକିପଡେ । ତେଣୁ ପୁରଷମାନଙ୍କ ଅପେକ୍ଷା ସେମାନଙ୍କୁ ଅଧିକ ବିଶ୍ରାମ ଆବଶ୍ୟକ ହୋଇଥାଏ । ସ୍ବାସ୍ଥ୍ୟ ବିଶେଷଜ୍ଞଙ୍କ ମତରେ ଜଣେ ପୁରୁଷ ଅପେକ୍ଷା ଜଣେ ମହିଳା ୧୧ ମିନିଟ ଅଧିକ ଶୋଇବା ଉଚିତ୍। ଏହି ୧୧ ମିନିଟ୍ ହିଁ ସେମାନଙ୍କ ପାଇଁ ଗୁରୁତ୍ୱପୂର୍ଣ୍ଣ ହୋଇଥାଏ । ତେବେ ଯଦି ଜଣେ ପୁରୁଷ ୭ ରୁ ୮ ଘଣ୍ଟା ଶୋଇଥାଏ । ତାହାଲେ ମହିଳା ୭ ଘଣ୍ଟା ୧୧ ମିନିଟ୍ କିମ୍ବା ୮ ଘଣ୍ଟା ୧୧ ମିନିଟ ଅଧିକ ଶୋଇବା ଆବଶ୍ୟକ । ୧୯ରୁ ୬୦ ବର୍ଷ ବୟସ୍କ ବ୍ୟକ୍ତିଙ୍କୁ ଅତିକମ୍ରେ ୭ ଘଣ୍ଟା ଶୋଇବା ଆବଶ୍ୟକ । ୧୩ ରୁ ୧୮ ବର୍ଷ ବୟସ  ୮ ରୁ ୧୦ ଘଣ୍ଟା ଶୋଇବା ଆବଶ୍ୟକ । ଏତତ୍ ବ୍ୟତୀତ ୬ ରୁ ୧୨ ବର୍ଷ ବୟସର ପିଲାମାନେ ୯ ରୁ ୧୨ ଘଣ୍ଟା ଶୋଇବା ଉଚିତ୍ ।