ଭୁବନେଶ୍ୱର: ଶୀତ ଦିନେ ବି ପରିବା ଦର କମିବାର ନାଁ ଧରୁନାହିଁ। ରାଜ୍ୟରେ ଉତ୍ପାଦନ କମୁଥିବାରୁ ଆମଦାନୀ ପରିବା ଉପରେ ଭରସା କରିବାକୁ ପଡୁଛି। ଭେଣ୍ଡି, ପୋଟଳ, ବିନ୍ସ, ବାଇଗଣ, ସାରୁ ସବୁ ପରିବା ଦର ଉପରମୁହାଁ। ତା ସାଙ୍ଗକୁ ଗ୍ରାହକଙ୍କୁ ଘାଇଲା କରୁଛି ଅଦା, ରସୁଣ ଦର। ରସୁଣ କିଲୋ ୩୦୦ଟଙ୍କା ଉପରେ, ଅଦା ୨୦୦ ଛୁଇଁଲାଣି। ଶୀତଦିନରେ ସାଧରଣତଃ ପରିବା ଅମଳ ସମୟ ହୋଇଥିବାରୁ ଦର କମିଥାଏ। ହେଲେ ଏବେ ବାହାର ରାଜ୍ୟ ଉପରେ ନିର୍ଭର କରିବାକୁ ପଡୁଥିବାରୁ ପରିବା ଦର କମିବା ବଦଳରେ ବଢିଚାଲିଛି।
ସାଧାରଣତଃ ଶୀତ ଦିନରେ ବାଇଗଣ, କୋବି, ଶିମ୍ବ, କଲରା, ଜହ୍ନି ଭଳି ପରିବା ସ୍ଥାନୀୟ ମାର୍କେଟରେ ଉପଲବ୍ଧ ହୋଇଥାଏ । ହେଲେ ପରିବା ଚାଷ କମୁଥିବାରୁ ପଡ଼ୋଶୀ ଆନ୍ଧ୍ରପ୍ରଦେଶ, ବେଙ୍ଗାଲୁରୁ ଉପରେ ନିର୍ଭର କରିବାକୁ ପଡୁଛି। ଫଳରେ ପରିବାର ଦର ବଢୁଛି। ଭେଣ୍ଡି, କାଙ୍କଡ଼ ୫୦ ଟଙ୍କା, ସଜନା ଛୁଇଁ-୬୦, ବିନ୍ସ-୮୦, ଝୁଡ଼ଙ୍ଗ, ପୋଟଳ, ଜହ୍ନି, କଲରା ସବୁ କିଛି ୬୦ ଉପରେ ରହିଛି । ଏବେ ଓଡ଼ିଶାରୁ କେବଳ ଫୁଲକୋବି ମାର୍କେଟକୁ ଆସିଥିବାରୁ ଏହାର ଦର ଟିକେ କମ୍ ରହିଛି। ହେଲେ ଅନ୍ୟ ସବୁ ପରିବା ପାଇଁ ବାହାର ରାଜ୍ୟ ହିଁ ଭରସା।
ହୋଲସେଲ ମାର୍କେଟରେ ପରିବା ଦର ଯାହା, ଖାଉଟିଙ୍କ ପାଖରେ ପହଞ୍ଚିଲା ବେଳକୁ ଏହା ବଢିଯାଉଛି। ବେଙ୍ଗାଲୁରୁ ଓ ନାସିକରୁ ନୂଆ ପିଆଜ ଏବେ ଆସିବା କଥା, ହେଲେ ସେଥିରେ ବିଳମ୍ବ ହେଉଥିବାରୁ ଦର ନିୟନ୍ତ୍ରଣକୁ ଆସୁନାହିଁ। ରାଜ୍ୟର ସବୁ ଜାଗାରେ ପିଆଜ ସାଙ୍ଗକୁ ପରିବା ବି ଚଢା ଦର ରହିଛି। ଦର ବୃଦ୍ଧିକୁ ନେଇ ଗ୍ରାହକ ଚିନ୍ତାରେ ଥିବା ବେଳେ ବେପାରୀ ମଧ୍ୟ ଖୁସି ନାହାନ୍ତି।
