ବିକାଶର ଶୀର୍ଷ ଛୁଇଁଛି ଆର-ଉଦୟଗିରି

ଆର-ଉଦୟଗିରି: ପାହାଡ ଜଙ୍ଗଲ ମଧ୍ୟରେ ବିକଶିତ ସହରର ଚିତ୍ର ।  ପ୍ରତି ପାଦେ ପାଦେ ବିକାଶର ଛାପ । ସଫଳ ରୂପାୟନ ହୋଇଛି ସରକାରଙ୍କ ସମସ୍ତ ଯୋଜନା । ଲୋକଙ୍କୁ ହାତ ପାହାନ୍ତାରେ ସରକାରୀ ସେବା ଯୋଗାଇବା ପାଇଁ ରହିଛି ସମସ୍ତ ବିଭାଗୀୟ କାର୍ଯ୍ୟାଳୟ । ଏଠି ସମସ୍ତ ଭିତ୍ତିଭୂମି ରହିଛି । କହିବାକୁ ଗଲେ ସବୁ କ୍ଷେତ୍ରରେ, ବିକାଶର ଶୀର୍ଷରେ ରହିଛି ଏହି ସହର ।

ବିକାଶର ଶୀର୍ଷ ଛୁଇଁଛି ଗଜପତି ଜିଲ୍ଲାର ଆର-ଉଦୟଗିରି ।  ଉପାନ୍ତରେ ଗଢି ଉଠିଥିବା ସହରର ହୋଇଛି ସମ୍ପୂର୍ଣ୍ଣ ବିକାଶ । ଆଦିବାସୀଙ୍କ ଉନ୍ନତିକୁ ପ୍ରଧାନ୍ୟ ଦେଇଛନ୍ତି ରାଜ୍ୟସରକାର । ଜିଲ୍ଲାର ସଦରମହକୁମା ଭଳି ଏଠାରେ ମଧ୍ୟ ଅଛି ସମସ୍ତ ସରକାରୀ କାର୍ଯ୍ୟାଳୟ । ଗ୍ରାମାଞ୍ଚଳବାସୀଙ୍କ ହାତପାଆନ୍ତାରେ ସରକାରୀ ସେବା ଯୋଗଇଦେବାକୁ ବିଭିନ୍ନ ପଦକ୍ଷେପ ନେଇଛନ୍ତି ରାଜ୍ୟସରକାର । ବ୍ଲକ କାର୍ଯ୍ୟାଳୟ, ତହସିଲ, ସବ-ଟ୍ରେଜେରୀ, ପୋଲିସ ଉପଖଣ୍ଡ ଭଳି ସମସ୍ତ ବିଭାଗୀୟ କାର୍ଯ୍ୟାଳୟ ଏଠାରେ ରହିଛି । ଏନେଇ ସହରକୁ ଉପଖଣ୍ଡ ମାନ୍ୟତା ପ୍ରଦାନ କରିବାକୁ ରାଜ୍ୟ ସରକାରଙ୍କୁ ଅନୁରୋଧ କରିଛନ୍ତି ଅଞ୍ଚଳବାସୀ ।

ଜିଲ୍ଲା ସଦରମହକୁମା ଠାରୁ ୬୫ କିଲୋମିଟର ଦୂରରେ ରହିଛି ଏହି ସବୁଜିମା ଭରା ସହର । ଆର-ଉଦୟଗିରିର ଚତୁଃସୀମାକୁ ଲାଗି ରହିଛି ତିନୋଟି ବ୍ଲକ । ମୋହନା ବ୍ଲକ ଏଠାରୁ ୪୦ କିଲୋମିଟର, ନୂଆଗଡ ୨୦ କିଲୋମିଟର ଏବଂ ରାୟଗଡ ବ୍ଲକ ୨୫ କିଲୋମିଟର । ପାରଳାଖେମୁଣ୍ଡି-ବ୍ରହ୍ମପୁର ଜାତୀୟ ରାଜପଥ ଏହି ସବୁ ବ୍ଲକକୁ ସଂଯୋଗ ହୋଇଥିବାରୁ ଏଠାରେ ଗମନାଗମନ ସୁଗମ ହୋଇଛି । ସହରର ବିକାଶ ନେଇ ରାଜ୍ୟ ସରକାରଙ୍କୁ ଧନ୍ୟବାଦ ଜଣାଇଛନ୍ତି ସହରବାସୀ ।