ସରିଲା କଳ୍ପନା ଜଳ୍ପନା, ମହାରାଷ୍ଟ୍ରରେ ଲାଗୁହେଲା ରାଷ୍ଟ୍ରପତି ଶାସନ

ମୁମ୍ବାଇ: ସବୁ କଳ୍ପନା ଜଳ୍ପନାର ଅନ୍ତ ଘଟିଛି । ଯାହା ଆଶା କରାଯାଉଥିଲା ଠିକ୍ ସେଇଆ ହିଁ ହେଲା । ରାଜ୍ୟପାଳଙ୍କ ସୁପାରିସକୁ ଅନୁମୋଦନ କରି ମହାରାଷ୍ଟ୍ରରେ ରାଷ୍ଟ୍ରପତି ଶାସନ ଲାଗୁ କରିଛନ୍ତି ରାଷ୍ଟ୍ରପତି ରାମନାଥ କୋବିନ୍ଦ । ଆଜିଠାରୁ ଏହାକୁ ଲାଗୁ କରାଯାଇଛି । ସେପଟେ ଏହା ବିରୋଧରେ ସୁପ୍ରିମକୋର୍ଟ ଯାଇଛି ଶିବସେନା । ବରିଷ୍ଠ ଓକିଲ କପିଲ ଶିବଲ ଶିବସେନା ପକ୍ଷରୁ ଲଢ଼ିବେ ବୋଲି ଜଣାପଡ଼ିଛି । ତେବେ ପ୍ରଥମେ ବିଜେପି, ପରେ ଶିବସେନା ଓ ତାପରେ ଏନସିପିକୁ ସରକାର ଗଠନ ପାଇଁ ଆମନ୍ତ୍ରଣ କରିଥିଲେ ରାଜ୍ୟପାଳ । ସମସ୍ତେ ସରକାର ଗଠନ କରିବାରେ ବିଫଳ ହେବାରୁ ଆଜି ରାଜ୍ୟରେ ରାଷ୍ଟ୍ରପତି ଶାସନ ଲାଗୁ କରାଯାଇଛି ।

ଆଜି ସକାଳେ ମହାରାଷ୍ଟ୍ର ରାଜ୍ୟପାଳ ଉଲ୍ଲେଖ କରିଥିଲେ ଯେ, ରାଜ୍ୟରେ ସରକାର ଗଠନ ନେଇ ଆଶା ଦେଖାଯାଉନି । ନିର୍ଧାରିତ ସମୟ ମଧ୍ୟରେ କେହି ମଧ୍ୟ ସରକାର ଗଠନ ପାଇଁ ସଂଖ୍ୟା ଉପସ୍ଥାପନ କରିପାରୁନାହାନ୍ତି ।  ତେଣୁ ରାଷ୍ଟ୍ରପତି ଶାସନ ପାଇଁ କେନ୍ଦ୍ରକୁ ସୁପାରିସ୍ କରିଥିଲେ ମହାରାଷ୍ଟ୍ର ରାଜ୍ୟପାଳ ଭଗତ ସିଂହ କୋଶଓ୍ୱାରୀ । ରାତି ୮ଟା ୩୦ ପର୍ଯ୍ୟନ୍ତ ଏନସିପି ପାଇଁ ସମୟ ଥିଲେ ମଧ୍ୟ ତା ପୂର୍ବରୁ ରାଷ୍ଟ୍ରପତିଙ୍କୁ ରିପୋର୍ଟ ଦେଇଥିଲେ ରାଜ୍ୟପାଳ । ରାଷ୍ଟ୍ରପତି ରାମନାଥ କୋବିନ୍ଦଙ୍କ ଅନୁମୋଦନ ପରେ ମହାରାଷ୍ଟ୍ରରେ ରାଷ୍ଟ୍ରପତି ଶାସନ ଜାରି କରାଯାଇଛି ।

ଏପଟେ କେନ୍ଦ୍ର କ୍ୟାବିନେଟ୍ ମଧ୍ୟ ମହାରାଷ୍ଟ୍ରରେ ରାଷ୍ଟ୍ରପତି ଶାସନ ନେଇ ଆଜି ସୁପାରିସ୍ କରିଥିଲା । ଆଜି କ୍ୟାବିନେଟ୍ ବୈଠକରେ ଏ ସଂପର୍କରେ ଆଲୋଚନା ହୋଇଥିଲା । ଖୁବଶୀଘ୍ର ରାଜ୍ୟରେ ରାଷ୍ଟ୍ରପତି ଶାସନ ଜାରି ହେବା ନେଇ ଆଶାଥିଲା ଯାହା ମାତ୍ର କେଇ ଘଣ୍ଟା ମଧ୍ୟରେ ଲାଗୁ କରାଯାଇଛି ।

ମହାରାଷ୍ଟ୍ରରେ ସରକାର ଗଠନ ପାଇଁ ରାଜ୍ୟପାଳ ଅଧିକ ସମୟ ନଦେଇ ତରବରିଆ ଭାବେ ରାଷ୍ଟ୍ରପତି ଶାସନ ପାଇଁ ସୁପାରିସ୍ କରିଥିବା ଶିବସେନା କହିଛି । ')}