ନୂଆଦିଲ୍ଲୀ: ସମାଜରେ ଶାଳୀନତା ଆଣିବା ଲାଗି ସୁପ୍ରିମକୋର୍ଟଙ୍କ ପଦକ୍ଷେପ। ମହିଳା ମାନଙ୍କ ବିରୋଧରେ ରୂଢିବାଦୀ ଶବ୍ଦ ବ୍ୟବହାର ହୋଇପାରିବନାହିଁ । ମିଷ୍ଟ୍ରେସ, ସ୍ଲଟ, ରକ୍ଷିତା ଭଳି ୪୦ଟି ଶବ୍ଦ ନ ବ୍ୟବହାର କରିବାକୁ ଦେଇଛନ୍ତି ପରାମର୍ଶ । ଏନେଇ ଜାରି କରିଛନ୍ତି ଏକ ହ୍ୟାଣ୍ଡବୁକ । ବର୍ତ୍ତମାନ ବହୁ ଅଶ୍ଲୀଳ ଇଂରାଜୀ ଶବ୍ଦ ସମାଜରେ ଛାଇ ହୋଇରହିଛି। ସେଗୁଡିକ ହେଲା ପ୍ରଷ୍ଟିଚ୍ୟୁଟ, ହୁକର, ହୋର, କିପ୍, ମିଷ୍ଟ୍ରେସ, ସ୍ଲଟ।
ଲିଙ୍ଗ ଦୃଷ୍ଟିରୁ ବି ବହୁ ଅସୂୟା ଶବ୍ଦର ବ୍ୟବହାର କରାଯାଉଛି । ସେସବୁକୁ ହଟାଇବା ଲାଗି ସିଜେଆଇ ଡି.ଓ୍ବାଇ. ଚନ୍ଦ୍ରଚୂଡ଼ ଏକ ହ୍ୟାଣ୍ଡବୁକ୍ ଲଞ୍ଚ କରିଛନ୍ତି । ଏହି ଶବ୍ଦଗୁଡିକ ପ୍ରତି ବିଚାରପତିମାନେ ଗୁରୁତ୍ବ ଦେବାକୁ ବି ସେ ପରାମର୍ଶ ଦେଇଛନ୍ତି । ଆଫାୟାର ଶବ୍ଦ ବଦଳରେ ବିବାହ ବାହାରେ ସମ୍ପର୍କ ବୋଲି ଏଥିରେ କୁହାଯାଇଛି। ବାଷ୍ଟାର୍ଡ ବଦଳରେ ବିନା ବିବାହରେ ଜାତ ସନ୍ତାନ କିମ୍ବା ସେହି ପିଲା ଯାହାର ବାପା-ମା ବିବାହ କରି ନଥିବେ ବୋଲି କୁହାଯାଇଛି।
ଚାଇଲଡ ପ୍ରଷ୍ଟିଚ୍ୟୁଟ ବଦଳରେ ଟ୍ରାଫିକିଂର ଶିକାର ହୋଇଥିବା ଶିଶୁ କୁହାଯିବ। ଡ୍ୟୁଟିଫୁଲ ଓ୍ବାଇଫ, ଫେଥଫୁଲ୍ ଓ୍ବାଇଫ, ଗୁଡ୍ ଓ୍ବାଇଫ, ଓବିଡିଏଣ୍ଟ ଓ୍ବାଇଫ ବଦଳରେ ମହିଳାଙ୍କୁ କେବଳ ଓ୍ବାଇଫ ବୋଲି କୁହାଯିବ। ହାଉସଓ୍ବାଇଫ ବଦଳରେ ମହିଳାଙ୍କୁ ହୋମମେକର କୁହାଯିବ। ପ୍ରଷ୍ଟିଚ୍ୟୁଟ ବଦଳରେ ସେକ୍ସଓ୍ବର୍କର କୁହାଯିବ। ଅବିବାହିତ ମା’ଙ୍କୁ ମା’ କୁହାଯିବ। ଇଣ୍ଡିଆନ ଓମେନ ଓ ଓ୍ବେଷ୍ଟର୍ଣ୍ଣ ଓମେନ ବଦଳରେ ଓମେନ କୁହାଯିବ ବୋଲି ସୂଚନା ଦିଆଯାଇଛି।
