ମଇଳା ଲୁଗା ପିନ୍ଧୁଥିବା ବାଳିକାମାନେ ଦେଖିବାକୁ ସୂର୍ପଣଖା ପରି: କୈଳାସ ବିଜୟଭର୍ଗିୟ

ନୂଆଦିଲ୍ଲୀ: ବିଜେପି ନେତାଙ୍କ ହୀନମନୋବୃତ୍ତି । ବିବାଦଘେରରେ କୈଳାସ ବିଜୟଭର୍ଗିୟ । ବାଳିକାଙ୍କୁ ତାତ୍ସଲ୍ୟ କରିଛନ୍ତି ବିଜେପି ସାଧାରଣ ସମ୍ପାଦକ କୈଳାସ ବିଜୟଭର୍ଗିୟ । ଯେଉଁ ବାଳିକାମାନେ ମଇଳା ଲୁଗା ପିନ୍ଧନ୍ତି ସେମାନେ ଦେଖିବାକୁ ସୂର୍ପଣଖା ସଦୃଶ ବୋଲି ଏକ ସଭାରେ ଦାୟିତ୍ବହୀନ ମନ୍ତବ୍ୟ ଦେଇଛନ୍ତି । ବିଜେପି ପରି ଏକ ଜାତୀୟ ଦଳର ଜଣେ ବରିଷ୍ଠ ନେତାଙ୍କ ଏହି ଦାୟିତ୍ବହୀନ ମନ୍ତବ୍ୟକୁ ନେଇ ବିଭିନ୍ନ ମହଲରୁ ବିରୋଧ କରାଯାଇଛି । ଭଗବାନ ହନୁମାନ ଓ ମହାବୀରଙ୍କ ଜୟନ୍ତୀ ଉତ୍ସବ ଅବସରରେ ଇନ୍ଦୋରରେ ଆୟୋଜିତ ଏକ ଧାର୍ମିକ ସଭାରେ ଯୋଗ ଦେଇ ଏହା କହିଛନ୍ତି କୈଳାସ ।

ମହିଳାମାନଙ୍କୁ ଏକ ଉତ୍ତମ ଶରୀର ଭଗବାନ ଦେଇଛନ୍ତି । ସେମାନେ ସୁନ୍ଦର ପୋଷାକ ପିନ୍ଧିବା ଦରକାର । ଯଦି ସେମାନେ ମଇଳା ପୋଷାକ ପିନ୍ଧିବେ ତେବେ ସୂର୍ପଣଖା ପରି ଦିଶିବେ ବୋଲି କହିଛନ୍ତି ବିଜୟଭର୍ଗିୟ । ସେ ଯେତେବେଳେ ରାତିରେ ବାହାରକୁ ଯାଆନ୍ତି ଯୁବକମାନେ ନିଶାସକ୍ତ ହୋଇ ବୁଲୁଥିବାର ସେ ଦେଖନ୍ତି । ଏହି ଯୁବକଙ୍କୁ ଚାପୁଡା ମାରିବାକୁ ତାଙ୍କର ଇଚ୍ଛା ହୁଏ । ତେବେ ନାରୀମାନଙ୍କ ପ୍ରତି କୈଳାସଙ୍କ ଏହି ହୀନବୟାନ ପରେ ବିଭିନ୍ନ ମହଲରୁ ତୀବ୍ର ବିରୋଧାଭାସ ପ୍ରକାଶ ପାଇଛି । ଏହା ମହିଳାଙ୍କ ପ୍ରତି ଅସୂୟା ଭାବର ପ୍ରମାଣ ବୋଲି କହିଛନ୍ତି ବିରୋଧୀ । କଂଗ୍ରେସ ମୁଖପାତ୍ର ସଂଗୀତା ଶର୍ମା କହିଛନ୍ତି- ବିଜେପି ନେତାମାନେ ମହିଳାମାନଙ୍କୁ ସବୁବେଳେ ଅପମାନିତ କରିଚାଲିଛନ୍ତି । ବିଜେପି ଏହି ଘଟଣାରେ କ୍ଷମା ମାଗୁ ବୋଲି ସେ ଦାବି କରିଛନ୍ତି ।