ତୁର୍କୀ: ତୁର୍କୀ ଓ ସିରିଆ ଭୂକମ୍ପର ବୀଭତ୍ସ ଚିତ୍ର ବିଶ୍ୱ ଆଖିରେ ଆଣିଦେଉଛି ଲୁହ। ବର୍ତ୍ତମାନ ସୁଦ୍ଧା ଭୂକମ୍ପଜନିତ ମୃତ୍ୟୁସଂଖ୍ୟା ୮ ହଜାର ୫୦୦ ଟପିଥିବା ବେଳେ ମୋଟ ମୃତକଙ୍କ ସଂଖ୍ୟା ୧୦ ହଜାର ଟପିବା ଆଶଙ୍କା କରାଯାଉଛି। ଏହାରି ଭିତରେ ଅନେକ ହୃଦୟ ବିଦାରକ ଘଟଣା ନଜରକୁ ଆସୁଛି। ଜଣେ ଗର୍ଭବତୀ ଧ୍ୱଂସାବଶେଷ ତଳେ ପିଲା ଜନ୍ନ କରିବା ପରେ ପ୍ରାଣ ହରାଇଛନ୍ତି।
ସୂଚନା ଅନୁଯାୟୀ, ଉତ୍ତର ସିରିଆର ଏକ ଧ୍ୱଂସାବଶେଷ ତଳୁ ଏକ ନବଜାତ ଶିଶୁକୁ ଉଦ୍ଧାର କରାଯାଇଥିଲା। ଧ୍ୱଂସାବଶେଷ ତଳୁ ଉଦ୍ଧାରକାରୀ ଟିମ୍ ପିଲାକୁ ଉଦ୍ଧାର କରିଥିବା ବେଳେ ମାଆଙ୍କ ଜୀବନ ବଞ୍ଚାଇ ପାରିନାହାନ୍ତି। ଉଦ୍ଧାରକାରୀ ଟିମ୍ ମହିଳାଙ୍କ ନିକଟରେ ପହଞ୍ଚିଲା ବେଳକୁ ହିଁ ସେ ଜୀବନ ହରାଇ ସାରିଥିଲେ। ପ୍ରତ୍ୟକ୍ଷଦର୍ଶୀଙ୍କ ଅନୁଯାୟୀ, ଉଦ୍ଧାରକାର୍ଯ୍ୟ ଜାରି ରହିଥିବା ବେଳେ ନିକଟରେ ଏକ ଶିଶୁର କାନ୍ଦ ଶୁଣିବାକୁ ପାଇଥିଲୁ। ପରେ ସେହି ସ୍ଥାନରେ ଏକ ନବଜାତ ଶିଶୁକୁ ଠାବ କରାଯାଇଥିଲା । ଶିଶୁକୁ ଉଦ୍ଧାର ପରେ ତୁରନ୍ତ ସ୍ଥାନୀୟ ମେଡିକାଲକୁ ନିଆଯାଇଥିଲା ।
ଖାଲି ଏତିକି ନୁହେଁ ତୁର୍କୀର ଧ୍ବଂସାବଶେଷ ତଳେ ନିଜର ଏକ ଛୋଟ ଭାଇକୁ ସୁରକ୍ଷା ଦେଇ ଭଉଣୀଟିଏ ଉଦ୍ଧାର ଲାଗି ଆକୁଳ ଅନୁରୋଧ କରୁଥିବା ଦୃଶ୍ୟ ଭାଇରାଲ୍ ହେଉଛି । ଯାହା ସମସ୍ତଙ୍କୁ ବିଚଳିତ କରିଛି ।
ତେବେ ଉଦ୍ଧାର କାର୍ଯ୍ୟରେ ବର୍ତ୍ତମାନ ୭୬ଟି ଦେଶ ଓ ୧୪ଟି ଆନ୍ତର୍ଜାତିକ ସଂଗଠନ ନିୟୋଜିତ ହୋଇଛନ୍ତି । ୧୨ଟି ସ୍ନିଫର ଡଗ ଓ ୧ ଲକ୍ଷ ୭୦ ହଜାର ପାଉଣ୍ଡ ଓଜନର ସ୍ବତନ୍ତ୍ର ଯନ୍ତ୍ରପାତି ଉଦ୍ଧାର କାର୍ଯ୍ୟରେ ବ୍ୟବହାର କରାଯାଇଛି। ଭାରତୀୟ ସେନା ପକ୍ଷରୁ ଏକ ୩୦ ଶଯ୍ୟାବିଶିଷ୍ଟ ମେଡିକାଲ ଫାସିଲିଟି ପ୍ରତିଷ୍ଠା କରାଯାଇଥିବା ବେଳେ ୪୫ ଜଣିଆ ମେଡିକାଲ ଟିମ ନିୟୋଜିତ ହୋଇଛନ୍ତି।
