ବିଜେପୁର ଉପନିର୍ବାଚନ, ପ୍ରାର୍ଥୀ କେତେ ଆଶାବାଦୀ ?

ସରିଲା ହାଏଭୋଲଟେଜ ବିଜେପୁର ଉପ–ନିର୍ବାଚନ । ବିଜେଡି ବିଜୟର ଆତ୍ମବିଶ୍ବାସ ରଖିଥିବାବେଳେ ବିଜେପି ବି ପୂର୍ବାପେକ୍ଷା ଅଧିକ ଭୋଟ ପାଇବ ବୋଲି ଆଶା ବାନ୍ଧିଛି । ଯଦିଓ କଂଗ୍ରେସ ଗଡ ଭୁଷୁଡିଛି, ହେଲେ ଗତ ନିର୍ବାଚନ ତୁଳନାରେ ଭୋଟ ହାର ବଢିବ ବୋଲି ଦଳ ଦମ୍ଭୋକ୍ତି ଦେଖାଇଛି । ୨୦୧୮ମସିହା ଆରମ୍ଭରୁ ବିଜେପୁରରେ ନିର୍ବାଚନ ଅର୍ଥାତ୍ ହଟ୍ କେକ୍ । ଦେଢ ବର୍ଷରେ ବିଜେପୁରବାସୀ ତିନି ଥର ଭୋଟ ଦେଇ ସାରିଲେଣି । ଏଥର ଉପ–ନିର୍ବାଚନରେ ୭୯.୧୭ ପ୍ରତିଶତ ମତଦାନ ହୋଇଛି । ନଜର ପକାଇବା କେଉଁ ଦଳ କେତେ ଭୋଟ ପାଇବା ନେଇ ଆକଳନ କରିଛନ୍ତି ବିଜେପୁର ଭୋଟର:

• ବିଜେଡି– ୮୦ ହଜାରରୁ ଅଧିକ

• ବିଜେପି– ୫୫ ହଜାରରୁ ଅଧିକ

• କଂଗ୍ରେସ– ୧୫ ହଜାର

ଯଦି ଭୋଟରଙ୍କ ଗଣିତ ଠିକ୍ ହୁଏ, ତେବେ ବିଜେଡି ୨୫ହଜାର ଭୋଟରେ ଜିତିବ । ଯାହା ଗତ ନିର୍ବାଚନର ବ୍ୟବଧାନଠାରୁ ବହୁତ କମ୍ । ୨୦୧୯ ନିର୍ବାଚନରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବିଜେଡି ପ୍ରାର୍ଥୀ ହୋଇ ୧, ୧୦, ୬୦୪ ଭୋଟ୍ ପାଇଥିଲେ । ତାଙ୍କ ବିରୋଧରେ ବିଜେପିର ସନତ ଗଡତିଆ ୫୩,୪୮୨ ଖଣ୍ଡ ଭୋଟ ପାଇଥିଲେ । ନବୀନଙ୍କ ବିଜୟର ବ୍ୟବଧାନ ୫୭, ୧୨୨ ଖଣ୍ଡ ରହିଥିଲା । କଂଗ୍ରେସର ରିପୁନାଥ ସେଠ୍ ୧୪, ୩୪୪ ଭୋଟ ପାଇଥିଲେ । ଭୋଟ କମ୍ ଥିଲା, ହେଲେ ୨୦୧୮ ଉପ–ନିର୍ବାଚନ ତୁଳନାରେ ୪ ହଜାର ବଢିଥିଲା । କାରଣ ସେ ସମୟରେ କଂଗ୍ରେସରୁ ପ୍ରାର୍ଥୀ ହୋଇଥିବା ପ୍ରଣୟ ସାହୁଙ୍କୁ ମିଳିଥିଲା ୧୦, ୨୭୪ ଖଣ୍ଡ ଭୋଟ । କଂଗ୍ରେସ ୧୫ହଜାର ଭୋଟ ପାଇଲେ, ୧୦୦୦ ଭୋଟ ଅଧିକ ହେବ । ଏହି ଆକଳନ ବିଜେଡି ପ୍ରାର୍ଥୀ ରୀତା ସାହୁଙ୍କୁ ମଧ୍ୟ ପ୍ରଭାବିତ କରିପାରେ । କାରଣ ଗତ ଉପ–ନିର୍ବାଚନରେ ବିଜେପିର ଅଶୋକ ପାଣିଗ୍ରାହୀଙ୍କଠାରୁ ୪୧,୯୩୩ ଖଣ୍ଡ ଅଧିକ ଭୋଟରେ ଜିତିଥିଲେ ରୀତା ।

ରାଜନୈତିକ ଦଳମାନେ ବି ସଂଖ୍ୟାର ଗଣିତ ଆରମ୍ଭ କଲେଣି । ଶ୍ରମମନ୍ତ୍ରୀ ସୁଶାନ୍ତ ସିଂଙ୍କ କହିବା ଅନୁସାରେ କଂଗ୍ରେସ ଓ ବିଜେପି କର୍ମୀଙ୍କ ଭିତରେ ବିଜେପୁର ନେଇ ଆଗ୍ରହ ନଥିଲା । ୧,୮୦,୦୦୦ ଭୋଟରୁ ବିଜେଡି ଏକ ଲକ୍ଷ ୨୦ ହଜାରରୁ ୪୦ ହଜାର ପାଇବ ବୋଲି ଦମ୍ଭୋକ୍ତି ସହ ଦାବି କରିଛନ୍ତି ସୁଶାନ୍ତ । ଅନ୍ୟପଟେ ଯେଉଁ କଂଗ୍ରେସ ନେତା ଦଳର ପରାଜୟ କଥା ପୂର୍ବରୁ ଆକଳନ କରିଥିଲେ, ସେମାନେ ଦଳୀୟ ପ୍ରାର୍ଥୀ ଦିଲ୍ଲୀପ ପଣ୍ଡାଙ୍କ ବିଜୟ ଆକଳନ କଲେଣି । କିଛି ଦିନ ତଳେ କଂଗ୍ରେସ ବିଧାୟକ ତାରାପ୍ରସାଦ ବାହିନିପତି ଦିଲ୍ଲୀପଙ୍କ ପରାଜୟ କଥା କହିଥିଲେ । ହେଲେ ଦଳ ଟଙ୍କା ଖର୍ଚ୍ଚ ନ କରିଥିଲେ ବି ଦୁଇରୁ ତିନି ହଜାର ଭୋଟରେ ଜିତିବ ବୋଲି ଦାବି କରିଛନ୍ତି ତାରା । ଯେହେତୁ ବିଜେପି ଏକମାତ୍ର ଦଳ ଯିଏ ପ୍ରାର୍ଥୀ ପରିବର୍ତ୍ତନ କରି ନାହିଁ, ସଂଖ୍ୟା ନ ଦେଲେ ବି ଗତଥରଠାରୁ ଅଧିକ ଭୋଟ ପାଇବାର ଆଶା ରଖିଛି ଦଳ । ଏପରିକି କ୍ଲୋଜ୍ ଫାଇଟ୍ କହି ବିଜୟର ଦାବି ବି କରିଛି ।

• ବିଜେଡି– ୧,୨୦,୦୦୦ରୁ ୧,୪୦,୦୦୦
• ବିଜେପି– ୬୦ ହଜାରରୁ ଅଧିକ
• କଂଗ୍ରେସ– ୬୦ ହଜାରରୁ ଅଧିକ

ବିଜେପୁର ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମାଳ ମାଳ ବିକାଶର ପ୍ୟାକେଜ ଘୋଷଣା କରିଛନ୍ତି । ଯାହା ବିଜେଡି ପାଇଁ ବଡ ଭୋଟ ବ୍ୟାଙ୍କ ସାବ୍ୟସ୍ତ ହୋଇଛି । ହେଲେ ମୁଖ୍ୟମନ୍ତ୍ରୀଙ୍କ ବିରୋଧରେ ଲଢି ୫୩ ହଜାରରୁ ଅଧିକ ଭୋଟ ପାଇଥିବାରୁ, ସନତ ଗଡତିଆଙ୍କୁ ନେଇ ବିଜେପିର ଆତ୍ମବିଶ୍ବାସ ବି ଆକାଶଛୁଆଁ । ପୂର୍ବରୁ ବିଜେପୁରରୁ ହ୍ୟାଟ୍ରିକ ବିଜୟ ଲାଭ କରିଥିବା କଂଗ୍ରେସ ସ୍ଥିତି ଜାହିର କରିବା ଅପେକ୍ଷାରେ ରହିଛି ।  ')}