ଭୁବନେଶ୍ବର: କୋରାପୁଟ କଫିକୁ ସ୍ବତନ୍ତ୍ର ଜିଆଇ ମାନ୍ୟତା ପାଇଁ ଆରମ୍ଭ ହୋଇଛି ପ୍ରୟାସ। ପର୍ଯ୍ୟଟନ ବିଭାଗର ଉଦ୍ୟମରେ କୋରାପୁଟ କଫି ଦେଶ ବିଦେଶର ପର୍ଯ୍ୟଟକଙ୍କ ଦୃଷ୍ଟି ଆକର୍ଷଣ କରିବାରେ ସଫଳ ହୋଇଛି । ଓଡ଼ିଶା ଆସିଲେ ପର୍ଯ୍ୟଟକମାନେ ଥରୁଟିଏ କୋରାପୁଟ କଫିର ସ୍ୱାଦ ଚାଖିବାକୁ ଚାହୁଁଛନ୍ତି । କୋରାପୁଟ କଫିର ଲୋକପ୍ରିୟତାକୁ ସୁଦୂରବିସ୍ତାରୀ କରିବା ପାଇଁ ପ୍ରୟାସ କରୁଛି ଅନୁସୂଚିତ ଜନଜାତି ଉନ୍ନୟନ ସମବାୟ ନିଗମ ।
ଜିଆଇ ମାନ୍ୟତା ପାଇଁ ଆବେଦନ ପ୍ରକ୍ରିୟାରେ ସାମିଲ ହେବା ପୂର୍ବରୁ କୋରାପୁଟ କଫିର ସ୍ୱତନ୍ତ୍ରତା ସମ୍ପର୍କିତ ଦସ୍ତାବିଜ୍କୁ ଏକାଠି କରାଯାଉଛି। ଦସ୍ତାବିଜରେ କୋରାପୁଟ୍ କଫିର ଇତିହାସ, ଗୁଣବତ୍ତା, ପ୍ରକ୍ରିୟାକରଣ ସମ୍ବନ୍ଧୀୟ ତଥ୍ୟ ସାମିଲ କରାଯିବ । କଫି ବୋର୍ଡ ଅଫ୍ ଇଣ୍ଡିଆକୁ ଆର୍କୁ ଭ୍ୟାଲିରେ ଉତ୍ପାଦିତ କଫି ପାଇଁ ୨୦୧୯ ମାର୍ଚ୍ଚ ୧ରେ ଜିଆଇ ଟ୍ୟାଗ୍ ମିଳିସାରିଛି। କୋରାପୁଟରେ ଉତ୍ପାଦିତ କଫି ଆନ୍ଧ୍ରପ୍ରଦେଶର ଆର୍କୁ କଫି ତାଲିକାରେ ସାମିଲ ହୋଇ ଜିଆଇ ମାନ୍ୟତା ପାଇଛି।
ମାତ୍ର ସ୍ୱତନ୍ତ୍ର ଭାବେ କୋରାପୁଟ କଫିକୁ ଜିଆଇ ମାନ୍ୟତା ମିଳିପାରିନାହିଁ। ଜାତୀୟ ଓ ଅନ୍ତର୍ଜାତୀୟ ବଜାରରେ କୋରାପୁଟ କଫିର ଚାହିଦାକୁ ଦେଖି ଜିଆଇ ଟ୍ୟାଗ୍ ପାଇଁ ଆବେଦନ କରିବାକୁ ନିଷ୍ପତ୍ତି ନିଆଯାଇଛି ବୋଲି କହିଛନ୍ତି ଅନୁସୂଚିତ ଜନଜାତି ଉନ୍ନୟନ ସମବାୟ ନିଗମର ପରିଚାଳନା ନିର୍ଦ୍ଦେଶିକା । ଅନ୍ୟପକ୍ଷରେ କଫି ବୋର୍ଟ ଅଫ୍ ଇଣ୍ଡିଆ ଯୁକ୍ତି ଦର୍ଶାଇଛି ଯେ, ଆର୍କୁ ଭ୍ୟାଲିରେ ସମୁଦ୍ର ସ୍ତରର ୩ରୁ ୫ ହଜାର ଫୁଟ୍ ଉପରେ ଥିବା ମାଟିରେ କଫି ଉତ୍ପାଦନ ହେଉଛି।
ଓଡ଼ିଶା ଓ ଆନ୍ଧ୍ରପ୍ରଦେଶରେ ଏଭଳି ଉତ୍ପାଦନ ହେଉଥିବା ବେଳେ ଉଭୟ ସ୍ଥାନରେ ଜଳବାୟୁ ମଧ୍ୟ ପ୍ରାୟତଃ ସମାନ। ସେହିଭଳି କୋରାପୁଟ ସମେତ କନ୍ଧମାଳ, ରାୟଗଡ଼ା, କେନ୍ଦୁଝର, ଗଜପତି, ଓ କଳାହାଣ୍ଡିରେ ମଧ୍ୟ ସାମନ କଫି ଉତ୍ପାଦନ ହେଉଛି। ଏଣୁ କୋରାପୁଟ କଫିକୁ ସ୍ୱତନ୍ତ୍ର ମାନ୍ୟତା ପାଇଁ ବିଚାର କରିବା ବେଳେ ପ୍ରଥମେ କୋରାପୁଟ କଫିର ସ୍ୱତନ୍ତ୍ରତା ଥିବା ଉପସ୍ଥାପିତ କରିବାକୁ ପଡ଼ିବ । ସେହିଭଳି କୋରାପୁଟ କଫି ସମ୍ପ୍ରତି ଏକ ଜିଆଇ ଇଣ୍ଡିକେସନ୍ ମଧ୍ୟରେ ସାମିଲ ରହିଥିବା ବୋର୍ଡ କହିଛି। ଅନ୍ୟପକ୍ଷରେ ନିଗମ ପକ୍ଷରୁ କୋରାପୁଟ୍ କଫିକୁ ସ୍ୱତନ୍ତ୍ର ମାନ୍ୟତା ଦାବି ଉପସ୍ଥାପିତ କରାଯାଇଥିବା ବେଳେ ଏହି କଫିର ସ୍ୱତନ୍ତ୍ରତା ସମ୍ପର୍କିତ ସୂଚନା ଏକାଠି କରିବାରେ ଲାଗିଛି ନିଗମ।
