ଭାରତର ପ୍ରଥମ କ୍ଷୁଦ୍ର ସାଟେଲାଇଟ SSLVର ସଫଳ ଉତକ୍ଷେପଣ

ଅମରାବତୀ: ଭାରତୀୟ ମହାକାଶ ବିଜ୍ଞାନ କ୍ଷେତ୍ରରେ ଯୋଡ଼ିହେଲା ନୂଆ ଅଧ୍ୟାୟ । ଭାରତୀୟ ମହାକାଶ ଅନୁସନ୍ଧାନ ସଂଗଠନ ପକ୍ଷରୁ ଦେଶର ସବୁଠୁ ଛୋଟ ରକେଟ୍‌ SSLV-D1ର ସଫଳ ଉତ୍‌କ୍ଷେପଣ କରାଯାଇଛି । ଆନ୍ଧ୍ରପ୍ରଦେଶ ଶୀହରିକୋଟାସ୍ଥିତ ସତୀଶ ଧଓ୍ବନ ସ୍ପେସ ସେଣ୍ଟରରୁ ରକେଟ୍ SSLV-D1କୁ ଲଞ୍ଚ କରାଯାଇଛି । ଏହି ରକେଟରେ EOS2 ଓ ଆଜାଦି ସାଟ୍‌ ନାମରେ ଦୁଇଟି ସାଟେଲାଇଟ ମହାକାଶକୁ ପଠାଯାଇଛି ।

ଦୁଇ ସାଟେଲାଇଟ ଅରବିଟରେ ପହଞ୍ଚିଥିବା ବେଳେ ଶେଷ ମୁହୂର୍ତ୍ତରେ ସମ୍ପର୍କ ଛିନ୍ନ ହୋଇଥିବା ଜଣାପଡ଼ିଛି । ସାଟେଲାଇଟ ଡାଟା ଲିଙ୍କ ପାଇବା ପାଇଁ ଇସ୍ରୋ କଣ୍ଟ୍ରୋଲ ସେଣ୍ଟର ପକ୍ଷରୁ ଲଗାତାର ପ୍ରୟାସ ଜାରି ରହିଛି ବୋଲି କହିଛନ୍ତି ଇସ୍ରୋ ମୁଖ୍ୟ ଏସ୍ ସୋମନାଥ । ଇସ୍ରୋର ସବୁଠୁ ଭରସାଯୋଗ୍ୟ ରକେଟ୍ ହେଉଛି SSLV ବା ସ୍ମଲ ସାଟେଲାଇଟ୍ ଲଞ୍ଚ ଭେଇକିଲ ।  SSLV ହେଉଛି ଏକ ଛୋଟ ଲିଫ୍ଟ ଲଞ୍ଚ ମହାକାଶଯାନ । ଏହାର ଲମ୍ବ 34 ମିଟର ରହିଥିବା ବେଳେ ବ୍ୟାସ ରହିଛି 6 ଦଶମିକ 7 ଫୁଟ । ଏହାର ମୋଟ ଓଜନ 120 ଟନ୍ ।

ଏହା PSLV ରକେଟ୍ ଅପେକ୍ଷା ଆକାରରେ ବହୁତ ଛୋଟ । ଏହାର ଚାରୋଟି ଅଂଶ ଅଛି । ତିନୋଟି ଅଂଶ କଠିନ ଇନ୍ଧନରେ ଚାଲିବ । ଚତୁର୍ଥ ଅଂଶ ତରଳ ଇନ୍ଧନ ଦ୍ବାରା ଗତି କରିବ । ବର୍ତ୍ତମାନ ଏହା ଛୋଟ ଉପଗ୍ରହ ଉତକ୍ଷେପଣ ପାଇଁ ବ୍ୟବହୃତ ହେବ । ଏହା ମାଧ୍ୟମରେ 500 କିଲୋଗ୍ରାମ ପର୍ଯ୍ୟନ୍ତ ଉପଗ୍ରହ ନିମ୍ନ କକ୍ଷପଥକୁ ପଠାଯିବ । ଏହି ସାଟେଲାଇଟରେ ପଠାଯାଇଥିବା EOS2 ହେଉଛି ଏକ ଆର୍ଥ ଅବଜରବେସନ ସାଟେଲାଇଟ ।

ଏହା ଆସନ୍ତା ୧୦ ମାସ ଧରି କାମ କରିବ ।  ସେହିପରି ଆଜାଦି ସାଟ୍ ସାଟେଲାଇଟକୁ ସ୍ପେସକିଡସ୍ ଇଣ୍ଡିଆ ନାମକ ଏକ ଭାରତୀୟ ସ୍ପେସ ଏଜେନ୍ସି ପକ୍ଷରୁ ପ୍ରସ୍ତୁତ କରାଯାଇଛି । ୭୫୦ ଭାରତୀୟ ଛାତ୍ରୀମାନେ ଏହି ସାଟେଲାଇଟ ପ୍ରସ୍ତୁତ କରିଛନ୍ତି ।