ରାଜଧାନୀରେ ସିରିଜ୍ ଦୁର୍ଘଟଣା, ୩ଟା କାରକୁ ଧକ୍କା ଦେଲା ୧୬ ଚକିଆ ଟ୍ରକ୍

ଭୁବନେଶ୍ବର: ରାଜଧାନୀରେ ସିରିଜ୍ ଦୁର୍ଘଟଣା । ବୁଧବାର ବିଳମ୍ବିତ ରାତିରେ ବାଣୀବିହାର ଫ୍ଲାଇ ଓଭର ବ୍ରିଜ ଉପରେ ୩ଟି କାରକୁ ଧକ୍କା ଦେଇଛି ଏକ ୧୬ ଚକିଆ ଟ୍ରକ । ଟ୍ରକ ଧକ୍କାରେ ଏକ କ୍ରେଟା ଗାଡ଼ି ପ୍ରାୟ ୨୦ ଫୁଟ ଦୂରକୁ ଛିଟିକି ପଡ଼ିଥିଲା। ଅନ୍ୟ ଦୁଇଟି ଗାଡ଼ି ମଧ୍ୟ ବ୍ୟାପକ ଭାବେ କ୍ଷତିଗ୍ରସ୍ତ ହୋଇଛି ।

ସେମଧ୍ୟରୁ ଗୋଟିଏ ଗାଡ଼ିରେ ଏକ ପରିବାର ଜାମସେଦପୁର ଯାଉଥିଲେ । ଏପର୍ଯ୍ୟନ୍ତ ଦୁର୍ଘଟଣାରେ କାହାରି ମୃତ୍ୟୁ ନେଇ ସୂଚନା ନାହିଁ । ଦୁଇରୁ ୩ ଜଣ ଆହତ ହୋଇଛନ୍ତି । ଉଦବେଗର କଥା ହେଉଛି ଦୁର୍ଘଟଣା ପରେ ସମସ୍ତେ ନିଜ ସୁରକ୍ଷା କଥା ଚିନ୍ତା କରୁଥିବା ବେଳେ ଜାମସେଦପୁର ଯାଉଥିବା ପରିବାରର ଗାଡ଼ିରୁ କେହି ଦୁର୍ବୃତ୍ତ ଦୁଇଟି ଲାପଟପ ଚୋରି କରିନେଇଥିବା ଅଭିଯୋଗ ହୋଇଛି ।

ଦୁର୍ଘଟଣା ଯୋଗୁ କିଛି ସମୟ ପାଇଁ ଜାତୀୟ ରାଜପଥରେ ଯାନବାହନ ଚଳାଚଳ ବ୍ୟାହତ ହୋଇଥିଲା । ତେବେ ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚି ସ୍ଥିତିକୁ ସ୍ୱାଭାବିକ କରିଥିଲା । ସେପଟେ ଦୁର୍ଘଟଣା ଘଟାଇଥିବା ଟ୍ରକକୁ ପଳାଶୁଣି ନିକଟରେ ସ୍ଥାନୀୟ ଲୋକେ ଅଟକାଇଥିଲେ। ହେଲେ ଟ୍ରକ ଡ୍ରାଇଭର ଫେରାର ହୋଇଯାଇଥିବା ସୂଚନା ମିଳିଛି ।