ସୁବର୍ଣ୍ଣପୁର ଜିଲ୍ଲା ମୁଖ୍ୟ ଚିକିତ୍ସାଳୟରେ ଶିଶୁ ଅଦଳ ବଦଳ ଅଭିଯୋଗ

ସୋନପୁର: ସୁବର୍ଣ୍ଣପୁର ଜିଲ୍ଲା ମୁଖ୍ୟ ଚିକିତ୍ସାଳୟର ସ୍ତ୍ରୀ ଓ ପ୍ରସୂତି ବିଭାଗରେ ଶିଶୁ ଅଦଳ ବଦଳ ଅଭିଯୋଗ । ସୋମବାର ଗଣ୍ଡପାଲି ଗାଁର ବିଶିକେଶନ ଝାଙ୍କର ପତ୍ନୀ ବିନିତାଙ୍କୁ ଡେଲିଭରୀ ପାଇଁ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ । ତେବେ ବିନିତାଙ୍କ ଏକ ଶିଶୁ ପୁତ୍ର ଜନ୍ମ ହୋଇଛି ବୋଲି ସ୍ତ୍ରୀ ଓ ପ୍ରସୂତି ବିଭାଗର କର୍ମଚାରୀମାନେ ବିଶିକେଶନଙ୍କୁ ଜଣାଇଥିଲେ ।
କିଛି ସମୟ ପରେ ପୁଣି ତାଙ୍କର ପୁଅ ନୁହେଁ ବରଂ ଏକ କନ୍ୟା ସନ୍ତାନ ଜନ୍ମ ହୋଇଛି ବୋଲି କହିଥିଲେ । ସେହି ସମୟରେ ଅନ୍ୟ ପ୍ରସୂତି ମହିଳାଙ୍କର ବି କନ୍ୟା ସନ୍ତାନ ହୋଇଥିବା ପ୍ରସୂତି ବିଭାଗରୁ ଖବର ଆସିଥିଲା । ଫଳରେ ମେଡିକାଲ କର୍ତ୍ତୃପକ୍ଷଙ୍କ ଉପରେ ସନ୍ଦେହ ଉପୁଜିଥିଲା । ବିଶିକେଶନ ସହଜରେ ଗ୍ରହଣ କରି ପାରିନଥିଲେ । ମେଡିକାଲରେ ଉତ୍ତେଜନା ପ୍ରକାଶ ପାଇଇଥିଲା । ଏନେଇ ସେ ସୋନପୁର ଥାନାରେ ଅଭିଯୋଗ କରିଛନ୍ତି । ଅଭିଯୋଗ ଆଧାରରେ ପୋଲିସ ପହଞ୍ଚି ତଦନ୍ତ ଚଳାଇଛି ।

ପୂର୍ବରୁ ମଧ୍ୟ ସମାନ ପ୍ରକାର ଘଟଣାକୁ ନେଇ ଚର୍ଚ୍ଚାରେ ରହିଥିଲା ସୁବର୍ଣ୍ଣପୁର ହସ୍ପିଟାଲ । ଶିଶୁକନ୍ୟା ଚୋରି ମାମଲାରେ ବାପା ଓ ଆଈ ଗିରଫ ହୋଇଥିଲେ । ଶିଶୁ ବିକ୍ରି ଓ ଅପହରଣ ମାମଲାରେ ବାପା ଗଜେନ୍ଦ୍ର ତାଣ୍ଡିଆ ଓ ଆଈ ପାନ୍ତା ଜାଲକୁ ଗିରଫ କଲା ସୋନପୁର ପୋଲିସ । ବୀରମହାରାଜପୁର ବ୍ଲକ୍ ଷଣ୍ଢା ଗ୍ରାମର ଗଜେନ୍ଦ୍ର ତାଣ୍ଡିଆଙ୍କ ପତ୍ନୀ ସନ୍ତୋଷିନୀ ସୁବର୍ଣ୍ଣପୁର ଜିଲ୍ଲା ମୁଖ୍ୟ ଚିକିତ୍ସାଳୟରେ ଶୁକ୍ରବାର ଶିଶୁକନ୍ୟାକୁ ଜନ୍ମ ଦେଇଥିଲେ । ପ୍ରସୂତି ଓ ସ୍ତ୍ରୀ ରୋଗ ବିଭାଗରେ ଭର୍ତ୍ତି ହୋଇ ଚିକିତ୍ସିତ ହେଉଥିଲେ । ସିସିଟିଭି ଫୁଟେଜ ଅନୁସାରେ ଗଜେନ୍ଦ୍ରଙ୍କ ଶାଶୂ ପାନ୍ତିଙ୍କ ସହ ଶିଶୁକନ୍ୟା ଧରି ଫେରାର ଥିବା ମହିଳା ଟିକା କେନ୍ଦ୍ର ସମ୍ମୁଖରେ ବେଶ୍ କିଛି ସମୟ କଥାବାର୍ତ୍ତା ହୋଇଥିଲେ । ପ୍ରାୟ ୧୨ଟାରେ ସହର ଠାରୁ ପ୍ରାୟ ୧୨ କିମି ଦୂର ଅର୍ଜୁନପୁର ଶରଧାପାଲି ରାସ୍ତା ପ୍ରତାପପୁର ନିକଟସ୍ଥ ପଡ଼ିଆରୁ ଶିଶୁକନ୍ୟା ଉଦ୍ଧାର ହୋଇଥିଲା । ସିସିଟିଭିରେ ଦେଖା ଦେଇଥିବା ମହିଳାକୁ ଗିରଫ କରାଯାଇଛି ନାହିଁ । ଅଭିଯୁକ୍ତ ବାପ ଓ ଆଈଙ୍କୁ ପୋଲିସ ରିମାଣ୍ଡରେ ଅଣାଯିବ ବୋଲି ସୂଚନା ଦେଇଛି ।