୪୦ ଲକ୍ଷର ଚାକିରି ଛାଡ଼ି ହେଲେ ସଫେଇ କର୍ମଚାରୀ

ବ୍ରିଟେନ : ଲକ୍ଷ ଲକ୍ଷ ଟଙ୍କାର ଚାକିରି ଛାଡ଼ି ମହିଳା ଏବେ ସଫେଇ କର୍ମଚାରୀ । କଥାଟା ଶୁଣି ଆପଣଙ୍କୁ ଝଟକା ଲାଗିଥିବ । ମାତ୍ର କଥାଟି ସତ । ବ୍ରିଟେନରେ ବାସ କରୁଥିବା କ୍ଲେୟର ବର୍ଟନ ନାମକ ଏହି ମହିଳା ଯେ କି ନିଜ ୪୦ ଲକ୍ଷ ଟଙ୍କାର ଚାକିରି ଛାଡ଼ି ବର୍ତ୍ତମାନ ଏକ ସଫେଇ କର୍ମଚାରୀର କାର୍ଯ୍ୟ କରୁଛନ୍ତି । ମହିଳାଙ୍କ କହିବାନୁସାରେ ଜଣେ ସଫେଇ କର୍ମଚାରୀର କାର୍ଯ୍ୟ କର୍ପୋରେଟ ସେକ୍ଟରରେ ଇ-ମେଲ ଲେଖିବାଠୁ ସମ୍ପୂର୍ଣ୍ଣ ଭିନ୍ନ । ଏହି ନିଷ୍ପତ୍ତି ତାଙ୍କ ଜୀବନର ସବୁଠାରୁ ଭଲ ପଦକ୍ଷେପ ବୋଲି ବର୍ଟନ କହିଛନ୍ତି ।

‘ଦ ସନ୍’ର ରିପୋର୍ଟ ଅନୁସାରେ ୪୦ ଲକ୍ଷ ଟଙ୍କାର ଚାକିରି ଛାଡ଼ିଥିବା ଏହି ମହିଳା ଜଣକ ବର୍ତ୍ତମାନ ୬ ଜଣଙ୍କ ଘରେ ସଫେଇ କାର୍ଯ୍ୟ କରୁଛନ୍ତି ଏବଂ ସେ କରୁଥିବା ଏହି କାମରେ ବେଶ୍ ଖୁସି ଅଛନ୍ତି । ସିସେଜ ହିନଚ୍ ନାମକ ଜଣେ ଇନଷ୍ଟାଗ୍ରାମ ୟୁଜର୍ସଙ୍କଠାରୁ ପ୍ରେରିତ ହୋଇ ଏହି କାର୍ଯ୍ୟ ଆରମ୍ଭ କରିଥିବା କହିଛନ୍ତି ବର୍ଟନ ।

୨୦୦୧ ଅଗଷ୍ଟ ମାସରେ ବ୍ରିଟେନର ଏକ ହାଇ ଷ୍ଟ୍ରିଟ୍ ବ୍ୟାଙ୍କରେ ଗ୍ରାହକ ସେବା ପ୍ରତିନିଧି ଦାୟିତ୍ୱରେ କାର୍ଯ୍ୟ କରୁଥିଲେ ବର୍ଟନ । ସେହି ସମୟରେ ତାଙ୍କ ଦରମା ଦେଢ଼ ଲକ୍ଷ ଥିବାବେଳେ ସେ ନିଜ ପ୍ରେମିକ ଡେଭଙ୍କ ସହ ବିବାହ କରିଥିଲେ । ୨୦୧୭ରେ ବର୍ଟନଙ୍କ ପ୍ରମୋସନ ହେବାପରେ ଦରମା ୪୦ ଲକ୍ଷ ହୋଇଥିଲା । ଏହି ବର୍ଷ ତାଙ୍କ ପିତାଙ୍କ ମୃତ୍ୟୁ ହେବା ପରେ ଏହାର ବର୍ଷେ ପରେ ଅର୍ଥାତ୍ ୨୦୨୮ରେ ବର୍ଟନଙ୍କର ଡେଭଙ୍କ ସହ ବିଚ୍ଛେଦ ହୋଇଥିଲା । ଏସବୁ ଘଟଣା ପରେ ବର୍ଟନ ପୁରାପୁରି ଭାଙ୍ଗି ପଡ଼ିବା ସଙ୍ଗେ ସଙ୍ଗେ ସବୁବେଳେ ଚିନ୍ତାଗ୍ରସ୍ତ ରହୁଥିଲେ ।

ବର୍ଟନ କହିଛନ୍ତି ଯେଉଁ କାମକୁ ମୁଁ କରିବାକୁ ଆଦୈା ପସନ୍ଦ କରୁନଥିଲି ଏବଂ ଯେଉଁ କାମ ପାଇଁ ଅନ୍ୟକୁ ଟଙ୍କା ଦେଉଥିଲି ଆଜି ସେହି କାମ ମୋ ବଞ୍ଚିବାର ଏକମାତ୍ର ସାହାରା ପାଲଟିଛି । ସିସେଜ ହିନଚଙ୍କ ଇନଷ୍ଟାଗ୍ରାମରେ ସେ ଦେଖିଥିଲେ ଯେ ହିନଚ୍ ସପ୍ତାହକୁ ୪ ଘଣ୍ଟାର କାମ କରୁଥିଲେ ଏହା ତାଙ୍କୁ ଶାନ୍ତ ରହିବାରେ ଅନେକ ସାହାଯ୍ୟ କରୁଥିଲା କେବଳ ଏତିକି ନୁହେଁ ଏହା ଏକ ମେଡିଟେସନ୍ ଭଳି ମଧ୍ୟ କାର୍ଯ୍ୟ କରୁଥିଲା । ନିଜ ବାପାଙ୍କ ଦେହାନ୍ତ ଏବଂ ସ୍ୱାମୀଙ୍କ ସହ ବିଚ୍ଛେଦ ପରେ ଏହି ସଫେଇ କାର୍ଯ୍ୟ ତାଙ୍କୁ ମାନସିକ ଚିନ୍ତାରୁ ମୁକୁଳିବାକୁ ଅନେକ ସାହାଯ୍ୟ କରିଥିଲା । ପ୍ରଥମେ ସେ କେବଳ ନିଜ ଘରେ ସଫେଇ କରୁଥିବା ବେଳେ ବର୍ତ୍ତମାନ ସେ ଅନ୍ୟ ୬ ଜଣଙ୍କ ଘରେ ଏହି କାର୍ଯ୍ୟ କରୁଥିବା କହିଛନ୍ତି ।