ଦିନରୁ ଗାତରେ ଫସିଲେଣି ହାତୀ, ରାତିରେ ଆରମ୍ଭ ହେଉଛି ଉଦ୍ଧାର କାର୍ଯ୍ୟ
କାମାକ୍ଷାନଗର: ଢେଙ୍କାନାଳ ବନଖଣ୍ଡ ମହାବିରୋଡ଼ ରେଞ୍ଜ ଡିହଡୋଳ ଫରେଷ୍ଟ ସେକ୍ସନ ବଅଁରପାଳ ଗାଁରେ ଥିବା ଏକ ଗଭୀର ଗାତରେ ଫସିଲେ ୨ ହାତୀ । ଖାଦ୍ୟ ଅନ୍ୱେଷଣରେ ଗାଁ ମୁହାଁ ହୋଇଥିବା ୨ ଦନ୍ତା ଗଭୀର ଗାତରେ ଫସି ରହିଛନ୍ତି । ସ୍ଥାନୀୟ ଲୋକଙ୍କ ଠାରୁ ଖବର ପାଇବା ପରେ ବନ ବିଭାଗ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଛି । କିଟି କିଟି ଅନ୍ଧାର ଭିତରେ ୨ଟି ଜେସିବି ମେସିନ୍ ମାଧ୍ୟମରେ ଉଦ୍ଧାର କାର୍ଯ୍ୟ ଜାରି ରଖିଛନ୍ତି । ୨ ଦନ୍ତା ଭିତରେ ଏକ ଛୁଆ ଦନ୍ତା ହାତୀ ରହିଥିବା ଦେଖିବାକୁ ମିଳିଛି ।
ଦିନ ବେଳା ୨ଟି ଦନ୍ତା ହାତୀ ଗାତରେ ପଡ଼ିଥିବା ବେଳେ ବନ ବିଭାଗ ଉଦ୍ଧାର କାର୍ଯ୍ୟ ରାତିରେ ଆରମ୍ଭ କରିଛି । ଯାହାକୁ ନେଇ ଲେକେ ବନ ବିଭାଗକୁ ସମାଲୋଚନା କରିଛନ୍ତି । ଏହି ଅଞ୍ଚଳରେ ଅନେକ ସମୟରେ ହାତୀ ଉପଦ୍ରବ ଲାଗି ରହୁଛି । ବନ ବିଭାଗର ଅପାରଗତା ଯୋଗୁଁ ଅନେକ ମୂଲ୍ୟବାନ ଜୀବନ ଓ ଧନ ସମ୍ପତ୍ତି ନଷ୍ଟ ହେଉଛି । ତେବେ ଉଭୟ ହାତୀ ଓ ମଣିଷକୁ ସୁରକ୍ଷା ଦେବା ପାଇଁ ବନ ବିଭାଗ ଅସଫଳ ହୋଇଥିବା ଅଭିଯୋଗ କରିଛନ୍ତି ଲୋକେ ।
