କାହିଁକି ବଢ଼ିଲା ଝିଅଙ୍କ ବିବାହ ବୟସ ?

ନୂଆଦିଲ୍ଲୀ:  ଭାରତରେ ପୁଅଙ୍କ ବିବାହ ବୟସ ୨୧ ବର୍ଷ ଥିବାବେଳେ ଝିଅଙ୍କ ବିବାହ ବୟସ ଥିଲା ୧୮ ବର୍ଷ । ବୁଧବାର ଝିଅଙ୍କ ନିମ୍ନତମ ବିବାହ ବୟସ ୧୮ରୁ ବୃଦ୍ଧି କରି ୨୧ କରିବା ପ୍ରସ୍ତାବକୁ ମଞ୍ଜୁରୀ ଦେଇଛି କେନ୍ଦ୍ର କ୍ୟାବିନେଟ୍ । ୨୦୨୧ର ଅନ୍ତିମ ଦିନରେ କେନ୍ଦ୍ର ସରକାର ଏହି ବଡ଼ ନିଷ୍ପତ୍ତି ନେଇଛନ୍ତି ।
ତେବେ କେନ୍ଦ୍ର କ୍ୟାବିନେଟର ଏହି ନିଷ୍ପତିକୁ ଉଭୟ ବିରୋଧ ଓ ସମର୍ଥନ କରୁଛନ୍ତି । ସଂଖ୍ୟାଧିକ ଏହା ସମର୍ଥନରେ ଥିବାବେଳେ କିଛି ଏହାକୁ ବିରୋଧ କରୁଛନ୍ତି । ତେବେ ଆସନ୍ତୁ ଜାଣିବା କ’ଣ ପାଇଁ ଝିଅଙ୍କ ବିବାହ ବୟସ ବଢାଇବା ପାଇଁ କେନ୍ଦ୍ର ସରକାରଙ୍କ ନିଷ୍ପତ୍ତି ଗୋଟିଏ ବଡ଼ ପଦକ୍ଷେପ…ତେବେ ତା’ ପୂର୍ବରୁ ଆସନ୍ତୁ ଜାଣିବା କେମିତି ଏହି ନିଷ୍ପତ୍ତିରେ ପହଂଚିଥିଲା କେନ୍ଦ୍ର ।

ବିବାହ ବୟସ ବଢାଇବା ଉପରେ ବିଚାର କରିବା ଲାଗି ଜୟା ଜେଟଲୀଙ୍କ ଅଧ୍ୟକ୍ଷତାରେ ଏକ ଟାସ୍କ ଫୋର୍ସ ଗଠନ କରାଯାଇଥିଲେ । ନୀତି ଆୟୋଗର ସଦସ୍ୟ ଭି.କେ ପଲ ଏହି ଟାସ୍କ ଫୋର୍ସର ସଦସ୍ୟ ରହିଥିଲେ । ଏହି ଟାସ୍କ ଫୋର୍ସରେ ସ୍ୱାସ୍ଥ୍ୟ ମନ୍ତ୍ରଣାଳୟ, ମହିଳା ଓ ଶିଶୁ ବିକାଶ ମନ୍ତ୍ରଣାଳୟ, ଆଇନ ମନ୍ତ୍ରଣାଳୟର ବରିଷ୍ଠ ଅଧିକାରୀ ରହିଥିଲେ । ଏହି ଟାସ୍କ ଫୋର୍ସ ଗତ ବର୍ଷ ଜୁନ ମାସରେ ଗଠନ ହୋଇଥିଲା ଏବଂ ଗତ ବର୍ଷ ଡିସେମ୍ବର ମାସରେ ଏହି ଟାସ୍କ ଫୋର୍ସ ତା’ର ରିପୋର୍ଟ ଦାଖଲ କରିଥିଲା ।

ସମିତି ବିବାହର ବୟସ ୨୧ ବର୍ଷ କରିବା ପାଇଁ ୧୬ଟି ବିଶ୍ୱ ବିଦ୍ୟାଳୟର ଯୁବପୀଢ଼ିଙ୍କ ଫିଡବ୍ୟାକ୍ ନେଇଥିଲେ । ୧୫ଟି NGO ସାରା ଦେଶର କୋଣ ଅନୁକୋଣରେ ରହୁଥିବା ଲୋକଙ୍କ ନିକଟରେ ପହଞ୍ଚିଥିଲେ । ରିପୋର୍ଟରୁ ଜଣାପଡ଼ିଲାଯେ, ବିବାହରେ ବିଳମ୍ବ କରିବା ଦ୍ୱାରା ପରିବାର, ମହିଳା, ଶିଶୁ ଏବଂ ସମାଜ ଉପରେ ସକରାତ୍ମକ ପ୍ରଭାବ ପଡ଼ିଥାଏ । ଏହା ସହିତ ମହିଳାଙ୍କ ସ୍ୱାସ୍ଥ୍ୟାବସ୍ଥା ଉପରେ ମଧ୍ୟ ସକରାତ୍ମକ ପ୍ରଭାବ ପଡ଼ିଥାଏ ।

https://fb.watch/a6ENAMQICx/

ମୋଦି ସରକାର ଏକାଧିକ କାରଣକୁ ନଜରରେ ରଖି ଝିଅଙ୍କ ବିବାହ ବୟସ ବଢ଼ାଇବାକୁ ନିଷ୍ପତ୍ତି ନେଇଛନ୍ତି । ଶୀଘ୍ର ବିବାହ ହେତୁ ଗର୍ଭଧାରଣ ଦ୍ୱାରା ମହିଳା ଏବଂ ଶିଶୁ ଉଭୟଙ୍କ ପୋଷଣ, ସମ୍ପୂର୍ଣ୍ଣ ସ୍ୱାସ୍ଥ୍ୟ ଏବଂ ମାନସିକ ସ୍ୱାସ୍ଥ୍ୟ ଉପରେ ପ୍ରଭାବ ପଡ଼ିଥାଏ । ଶିଶୁ ମୃତ୍ୟୁ ହାର, ମାତୃ ମୃତ୍ୟୁ ହାର ଏବଂ ମହିଳା ସଶକ୍ତିକରଣ ଉପରେ ପ୍ରଭାବ ପଡ଼ିଥାଏ । ଶୀଘ୍ର ବିବାହ ଦ୍ୱାରା ମହିଳାଙ୍କ ଶିକ୍ଷା ଏବଂ ଜୀବିକା ପାଇଁ ଅବସର ମିଳିନଥାଏ । ଏହି ନିଷ୍ପତ୍ତି ଦ୍ୱାରା ବାଲ୍ୟ ବିବାହ ଉପରେ ଅଧିକ କଟକଣା ଜାରି କରାଯାଇପାରିବ । ରିପୋର୍ଟ କହୁଛି ୨୦୧୫-୧୬ରେ ବାଲ୍ୟ ବିବାହ ହାର ୨୭ ପ୍ରତିଶତ ଥିଲା, ଯାହା ୨୦୧୯-୨୦ରେ ୨୩ ପ୍ରତିଶତରେ ପହଞ୍ଚିଛି । ବାସ୍ତବରେ ସରକାର ଦେଶରୁ ବାଲ୍ୟ ବିବାହକୁ ସମ୍ପୂର୍ଣ୍ଣ ବନ୍ଦ କରିବାକୁ ଲକ୍ଷ୍ୟ ରଖିଛନ୍ତି ।

ଅନ୍ୟ ଏକ କାରଣ ହୋଇପାରେ ଜନସଂଖ୍ୟା ନିୟନ୍ତ୍ରଣ । କାରଣ ବିବାହ ବୟସ ବଢ଼ିବା ଦ୍ୱାରା ଉଚ୍ଚ ଶିକ୍ଷା ପାଇବାକୁ ସମୟ ମିଳିବ ଏବଂ ଚାକିରି କରିବାକୁ ମଧ୍ୟ । ଏହାଦ୍ୱାରା ମହିଳାଟି ବିଳମ୍ବରେ ମା’ ହେବ । ଯାହା ଜନସଂଖ୍ୟା ନିୟନ୍ତ୍ରଣରେ ସାହାଯ୍ୟ କରିବ । କିନ୍ତୁ ସରକାରଙ୍କ କହିବା ହେଉଛି ଏହା ଜନସଂଖ୍ୟା ନିୟନ୍ତ୍ରଣ ପାଇଁ ନୁହେଁ ମହିଳା ସଶକ୍ତିକରଣ ପାଇଁ ଏକ ପଦକ୍ଷେପ ।

ତେବେ କିଛି ଲୋକ ଏହି ନିଷ୍ପତ୍ତିକୁ ସମର୍ଥନ କରୁଥିବା ବେଳେ କିଛି ଏହାକୁ ନେଇ ଆଲୋଚନା କରୁଛନ୍ତି । ମହିଳା ବା ଶିଶୁ ଆୟୋଗ, ପରିବାର ନିୟୋଜନର ବିଶେଷଜ୍ଞଙ୍କ ସମେତ କିଛି ଲୋକଙ୍କ କହିବା ହେଉଛି ଏହି କାନୁନ୍ ଦ୍ୱାରା ଦେଶର ଏକ ବୃହତ୍ ଅଂଶ ନିୟମ ଉଲଙ୍ଘନ ବା ବେଆଇନ୍ ଭାବରେ ବିବାହ କରିବାକୁ ବାଧ୍ୟ ହେବେ । ସେମାନଙ୍କ କହିବା ହେଉଛି ମହିଳାଙ୍କ ନ୍ୟୁନତମ ବୟସ ୧୮ ଥାଇ ମଧ୍ୟ ନିୟମ ଉଲଙ୍ଘନ ହେଉଛି, ଏବେ ୨୧ ହୋଇଗଲେ ଅଧିକ ନିୟମ ଉଲଙ୍ଘନ ହେବ । କିଛି ଲୋକଙ୍କ କହିବା ହେଉଛି ଯଦି ବିବାହ ବୟସ ୨୧ ତେବେ ଭୋଟ୍ ଦେବା ବୟସ ମଧ୍ୟ ୨୧ କରାଯାଉ । ଆଇପିଏସ୍ ଏମ୍ ନାଗେଶ୍ୱର ରାଓଙ୍କ କହିବା ହେଉଛି ଯଦି ଜଣେ ୧୮ ବର୍ଷରେ ସରକାର ଚୟନ କରିପାରିବ ତେବେ ବିବାହ ପାଇଁ କାହିଁକି ନିଷ୍ପତ୍ତି ନେଇପାରିବ ନାହିଁ ।

ଆଉ କେହି କହୁଛନ୍ତିଯେ, ଏୟି ନିୟମ କେବଳ ପେପର ହିଁ ରହିଯିବ, ବେଆଇନ୍ ଭାବରେ ବିବାହ ଜାରି ରହିବ । ବାଲ୍ୟ ବିବାହକୁ ନିୟନ୍ତ୍ରଣ କରିବା ପାଇଁ ଭିନ୍ନ କିଛି ଉପାୟ ଆପଣାଇବାକୁ ହେବ ।
ଅନ୍ୟପଟେ ସେଣ୍ଟର ଫର ଲ ଆଣ୍ଡ୍ ପଲିସି ରିସର୍ଚ୍ଚ ଏବଂ ସୁପ୍ରିମକୋର୍ଟର ସିନିୟର ଆଡଭୋକେଟ୍ ଜାଏନା କୋଠାରୀଙ୍କ କହିବା ହେଉଛି ଝିଅ ଏବଂ ପୁଅଙ୍କ ବିବାହରେ କୌଣସି ତାରତମ୍ୟ ରହିବା ଅନୁଚିତ୍ ।