ଜ୍ୟାକଲିନ ଓ ନୋରାଙ୍କ ସମସ୍ତ ଉପହାରକୁ ଜବତ କରିବ ଇଡି

ନୂଆଦିଲ୍ଲୀ: ବଢିବାରେ ଲାଗିଛି ଅଭିନେତ୍ରୀ ଜ୍ୟାକଲିନ ଫର୍ଣ୍ଣାଣ୍ଡିଜଙ୍କ ଅଡୁଆ । ଆର୍ଥିକ ଜାଲିଆତି ଘଟଣାରେ ସୁକେଶ ଚନ୍ଦ୍ରଶେଖରଙ୍କଠାରୁ ଜ୍ୟାକଲିନ ପାଇଥିବା ସମସ୍ତ ଉପହାରକୁ ଜବତ କରିବ ପ୍ରବର୍ତ୍ତନ ନିର୍ଦ୍ଦେଶାଳୟ । ଜ୍ୟାକଲିନଙ୍କୁ ଡିସେମ୍ବର ୨୦୨୦ରୁ ଅଗଷ୍ଟ ୨୦୨୧ ମଧ୍ୟରେ ସୁକେଶ ପ୍ରାୟ ୧୦ କୋଟି ଟଙ୍କାର ଗିଫ୍ଟ ଦେଇଥିଲା ।  ସୁକେଶଙ୍କଠାରୁ ଜ୍ୟାକଲିନ ଦୁଇ ହଳ ହୀରାର ରିଙ୍ଗ, ଦୁଇଟି ଦାମୀ ବ୍ରେସଲେଟ, ୩ଟି ବିର୍କିନ ବ୍ୟାଗ, ଦୁଇଟି ଗୁସି ବ୍ୟାଗ, ଗୋଟିଏ ବହୁରଙ୍ଗୀ ବ୍ରେସଲେଟ ଗିଫ୍ଟ ଆକାରରେ ପାଇଛନ୍ତି ବୋଲି ସ୍ୱୀକାର କରିଛନ୍ତି ।

ଅନ୍ୟପକ୍ଷରେ ସୁକେଶ କହିଛି ଯେ ସେ ଜ୍ୟାକଲିନଙ୍କୁ ୧୫ ହଳ କାନଫୁଲ ଓ ରିଙ୍ଗ, ୫ଟି ବିର୍କିନ ବ୍ୟାଗ, ଗୁସିର ବିଭିନ୍ନ ସାମଗ୍ରୀ, କାର୍ଟିୟର ଚୁଡି ଓ ରିଙ୍ଗ, ଟିଫାନି ଆଣ୍ଡ କମ୍ପାନୀର ଏକ ବ୍ରେସଲେଟ, ଅନେକ ରୋଲେକ୍ସ ଘଡି ଦେଇଛନ୍ତି । ଏଥି ସହ ୭ କୋଟି ଟଙ୍କାର ଅଳଙ୍କାର, ଏସ୍ପୁଏଲା ନାମକ ଏକ ଦାମୀ ଘୋଡା, ୪ଟି ପାର୍ସୀ ବିଲେଇ ଉପହାର ଦେଇଥିଲେ । ସୁକେଶଙ୍କ ପତ୍ନୀ ଲୀନା ମାରିଆଙ୍କଠାରୁ ଅଭିନେତ୍ରୀ ନୋରା ଫତେ ଏକ ଦାମୀ ବିଏମଡବ୍ଲୁ କାର୍ ଗିଫ୍ଟ ସ୍ୱରୂପ ପାଇଥିଲେ ବୋଲି ତଦନ୍ତରୁ ଇଡି ଜାଣିବାକୁ ପାଇଛି । ବିଭିନ୍ନ ଉପାୟରେ ଠକେଇ କରାଯାଇଥିବା ଅର୍ଥକୁ ବ୍ୟବହାର କରି ଏହି ଗିଫ୍ଟ ଦିଆଯାଇଥିଲା ବୋଲି ପ୍ରବର୍ତ୍ତନ ନିର୍ଦ୍ଦେଶାଳୟ ସ୍ପଷ୍ଟ କରିଛି ।