ଅଶାଳୀନ ଆଚରଣ ପଡ଼ିଲା ମହଙ୍ଗା, ରଦ୍ଦ ହେଲା ଓକିଲଙ୍କ ଲାଇସେନ୍ସ

ନୂଆଦିଲ୍ଲୀ: ଭର୍ଚୁଆଲରେ ଶୁଣାଣି ବେଳେ ନୈତିକତା ଭୁଲିଗଲେ ଓକିଲ । ଦେଖାଇଲେ ଅଶାଳୀନ ଆଚରଣ । ଦୃଷ୍ଟିକଟୁ ଅଙ୍ଗଭଙ୍ଗୀ ଲାଗି ତାଙ୍କୁ ରଦ୍ଦ କରାଯାଇଛି । ଏପରିକି ସେ ଆଉ ଓକିଲାତି କରିପାରିବେ ନାହିଁ ବୋଲି କୁହାଯାଇଛି । ମାଡ୍ରାସ ହାଇକୋର୍ଟରେ କାର୍ଯ୍ୟରତ ଜଣେ ଓକିଲ ଆର.ଡି.ସନ୍ଥନା କ୍ରିଷ୍ଣନଙ୍କ ବିରୋଧରେ ଜାରି କରାଯାଇଛି ପରଓ୍ୱାନା । ଦେଶର କୌଣସି କୋର୍ଟ, ଟ୍ରିବ୍ୟୁନାଲ ଏବଂ ସମଧରଣର ପ୍ରତିଷ୍ଠାନରେ ଓକିଲାତି କରିପାରିବେ ନାହିଁ ବୋଲି ତାମିଲନାଡୁ ଓ ପୁଡୁଚେରୀ ବାର୍ କାଉନସିଲ ପକ୍ଷରୁ ନିଷ୍ପତ୍ତି ନିଆଯାଇଛି ।

ଏପରିକି ତାଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିବା ଲାଗି କ୍ରାଇମବ୍ରାଞ୍ଚ ଓ ସିଆଇଡିଙ୍କୁ ସୁପାରିସ କରିଛନ୍ତି ଦୁଇ ବିଚାରପତି ପିଏନ ପ୍ରକାଶ ଓ ଆର.ଏଚ ହେମଲତା । ଏହା ସହ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ସକାଶେ ଏହି ଦୁଇ ବିଚାରପତି ବାର୍ କାଉନସିଲକୁ ମଧ୍ୟ ଅନୁରୋଧ କରିଛନ୍ତି । ଏକ ମାମଲାରେ ଶୁଣାଣି ଜଣେ ବିଚାରପତି କରୁଥିବାବେଳେ ଭର୍ଚୁଆଲରେ ମହିଳାଙ୍କ ପ୍ରତି ଉକ୍ତ ଓକିଲ ଅଶାଳୀନ ଆଚରଣ ଦେଖାଇବା ସହ ବିଭିନ୍ନ କଦର୍ଯ୍ୟ ଅଙ୍ଗଭଙ୍ଗୀ ପ୍ରଦର୍ଶନ କରିଥିଲେ ।