ଗୋଟିଏ ଗୋଇଠାରେ ଲୁଟେରା ଚିତକାତ

ଭୁବନେଶ୍ବର: ମହଙ୍ଗା ପଡ଼ିଲା ମୋବାଇଲ ଲୁଟ ଉଦ୍ୟମ । ଯୁବକଙ୍କ ଗୋଇଠାରେ ବାଇକ୍ ସହ ତଳେ ପଡ଼ିଲେ ଦୁଇ ଲୁଟେରା । ଜଣେ ମାରିଲା ଚମ୍ବଟ । ଅନ୍ୟ ଜଣଙ୍କୁ ଧରି ପୋଲିସ ଜିମା ଦେଲେ ଲୋକେ । ଘଟଣା ଭୁବନେଶ୍ବର କ୍ୟାପିଟାଲ ଥାନା ଯଜ୍ଞେଶ୍ବର ମନ୍ଦିର ନିକଟରେ ।

ଗତକାଲି ମନ୍ଦିର ସମ୍ମୁଖରେ ଜଣେ ଯୁବକ ତାଙ୍କ ମୋବାଇଲରେ ସେଲଫି ନେଉଥିବା ବେଳେ ଏକ ବାଇକରେ ଦୁଇ ଲୁଟେରା ଆସି ଝାମ୍ପ ମାରିଥିଲେ । ଏହି ସମୟରେ ଯୁବକ ଜଣଙ୍କ ଲୁଟେରାଙ୍କ ବାଇକକୁ ଏକ ଗୋଇଠା ମାରିଥିଲେ । ଫଳରେ ଦୁଇ ଲୁଟେରା ବାଇକ୍ ସହ ତଳେ ପଡ଼ି ଯାଇଥିଲେ । ସେମାନଙ୍କ ମଧ୍ୟରୁ ଜଣେ ଉଠି ଖସି ପଳାଇବାକୁ ସକ୍ଷମ ହୋଇଥିବା ବେଳେ ଅନ୍ୟ ଜଣଙ୍କୁ ମନ୍ଦିର ପାଖରେ ଉପସ୍ଥିତ ଲୋକେ କାବୁ କରି ନେଇଥିଲେ ।

ଖବର ପାଇ ପୋଲିସ ଘଟଣା ସ୍ଥଳରେ ପହଞ୍ଚି ଲୁଟେରାକୁ ଗିରଫ କରିବା ସହ ବାଇକ୍ ଜବତ କରିଛି । ଲୁଟ ବେଳେ ଧରା ପଡ଼ିବା ଭୟରେ ଲୁଟେରା ଦ୍ବୟ ବାଇକ ନମ୍ବର ପ୍ଲେଟରେ ଗାମୁଛା ଗୁଡ଼ାଇ ଥିବା ଦେଖିବାକୁ ମିଳିଥିଲା ।