ଲୋକସଭାରେ ମୃତ ଚାଷୀଙ୍କ ତାଲିକା ଦେଲେ ରାହୁଲ

ନୂଆଦିଲ୍ଲୀ: ଚାଷୀ ପ୍ରସଙ୍ଗରେ ସଂସଦରେ ହଙ୍ଗାମା । ଲୋକସଭାରେ ଚାଷୀ ଆନ୍ଦୋଳନ ଓ ଆନ୍ଦୋଳନ ସମୟରେ ଚାଷୀ ମୃତ୍ୟୁକୁ ନେଇ କେନ୍ଦ୍ର ସରକାରଙ୍କୁ ଟାର୍ଗେଟ କରିଛନ୍ତି କଂଗ୍ରେସ ନେତା ରାହୁଲ ଗାନ୍ଧୀ  । ରାହୁଲ ଗାନ୍ଧୀ ଲୋକସଭାରେ କୃଷି ଆନ୍ଦୋଳନକୁ ନେଇ ପ୍ରଶ୍ନ ଉଠାଇଛନ୍ତି । ସେ କହିଛନ୍ତି କି ନଭେମ୍ବର ୩୦ରେ କୃଷି ମନ୍ତ୍ରୀ ସଂସଦରେ କହିଥିଲେ କି କୃଷି ଆନ୍ଦୋଳନରେ କେତେ ଜଣ ଚାଷୀ ପ୍ରାଣ ହରାଇଛନ୍ତି ତାହାର ତଥ୍ୟ ଆମ ପାଖରେ ନାହିଁ । କୃଷି ମନ୍ତ୍ରୀଙ୍କ ଏପରି ବୟାନ ପରେ ଆଜି ରାହୁଲ ଗାନ୍ଧୀ କହିଥିଲେ କି ଯଦି ସରକାରଙ୍କ ପାଖରେ ତଥ୍ୟ ନାହିଁ ତେବେ କୃଷି ଆନ୍ଦୋଳନରେ କେତେ ଜଣ କୃଷକ ମୃତ୍ୟୁ ବରଣ କରିଛନ୍ତି ତାହାର ତାଲିକା ଆମଠାରୁ ନିଅନ୍ତୁ । କୃଷି ଆନ୍ଦୋଳନରେ ପ୍ରାଣ ହରାଇଥିବା ସମସ୍ତ ଚାଷୀଙ୍କ ତାଲିକା ଆମେ ରଖିଛୁ ବୋଲି କହିଛନ୍ତି ରାହୁଲ ଗାନ୍ଧୀ ।

Around 700 farmers died in farmers' agitation. PM apologised to the nation & farmers of the nation. He accepted that he made a mistake. On 30th Min Agri Min was asked a ques – how many farmers died in the agitation? He said he doesn't have any data: Congress MP Rahul Gandhi in LS pic.twitter.com/ztL4wm0C0h

— ANI (@ANI) December 7, 2021

ରାହୁଲ ଗାନ୍ଧୀ କହିଛନ୍ତି କି ପଞ୍ଜାବ ସରକାର ୪୦୦ ମୃତ ଚାଷୀଙ୍କ ପରିବାରକୁ ୫ଲକ୍ଷ ଲେଖାଏଁ ସହାୟତା ରାଶି ପ୍ରଦାନ କରିଛନ୍ତି । ଏହାସହ ୧୫୨ ଚାଷୀଙ୍କ ପରିବାର ଲୋକଙ୍କୁ ସରକାରୀ ଚାକିରି ମଧ୍ୟ ଦେଇଛନ୍ତି ପଞ୍ଜାବ ସରକାର । ଏହା ବ୍ୟତୀତ କୃଷି ଆନ୍ଦୋଳନରେ ହରିଆଣାର ୭୦ ଚାଷୀ ମଧ୍ୟ ମୃତ୍ୟୁବରଣ କରିଛନ୍ତି । କିନ୍ତୁ ଆପଣଙ୍କ ସରକାର କହୁଛି କି ଆପଣଙ୍କ ପାଖରେ ଏହାର ତାଲିକା ନାହିଁ । ମୁଁ ଚାହୁଁଛି କି ମୃତ୍ୟୁ ବରଣ କରିଥିବା ସମସ୍ତ କୃଷକଙ୍କ ପରିବାରକୁ ସରକାରୀ ଚାକିରି ପ୍ରଦାନ କରନ୍ତୁ ବୋଲି କହିଛନ୍ତି କଂଗ୍ରେସ ନେତା ରାହୁଲ ଗାନ୍ଧୀ ।

ଆଜି ସଂସଦର ଶୂନ୍ୟକାଳରେ ରାହୁଲ କୃଷି ଆନ୍ଦୋଳନରେ ପ୍ରାଣ ହରାଇଥିବା ମୃତ ଚାଷୀଙ୍କୁ ସହାୟତା ଦେବା ପାଇଁ ପ୍ରଶ୍ନ ଉଠାଇଥିଲେ ଏବଂ ଲୋକସଭାରେ ରାହୁଲ ୫୦୦ କୃଷକଙ୍କ ଏକ ତାଲିକା ପ୍ରଦାନ କରିଥିଲେ ଯେଉଁ ଚାଷୀମାନେ କୃଷି ଆନ୍ଦୋଳନରେ ପ୍ରାଣ ହରାଇଥିଲେ ।