ଅସୁସ୍ଥ ଅଛନ୍ତି ଆରଜେଡି ମୁଖ୍ୟ ଲାଲୁ ପ୍ରସାଦ ଯାଦବ; ଦିଲ୍ଲୀ ଏମସରେ ଭର୍ତ୍ତି

ନୂଆଦିଲ୍ଲୀ: ଅସୁସ୍ଥ ଅଛନ୍ତି ରାଷ୍ଟ୍ରୀୟ ଜନତା ଦଳର ଅଧ୍ୟକ୍ଷ ତଥା ବିହାରର ପୂର୍ବତନ ମୁଖ୍ୟମନ୍ତ୍ରୀ ଲାଲୁ ପ୍ରସାଦ ଯାଦବ । ଗତକାଲି ଅଚାନକ ଲାଲୁ ପ୍ରସାଦ ଯାଦବଙ୍କ ସ୍ବାସ୍ଥ୍ୟବସ୍ଥା ବିଗିଡି ଯାଇଥିଲା । ଯାହା ଫଳରେ ତାଙ୍କୁ ଦିଲ୍ଲୀ ଏମସରେ ଭର୍ତ୍ତି କରାଯାଇଛି । ସୂଚନା ଅନୁସାରେ ସେ ଜ୍ବର ଓ ଦୁର୍ବଳତା କାରଣରୁ ତାଙ୍କ ହସ୍ପିଟାଲରେ ଭର୍ତ୍ତି କରାଯାଇଛି । ତେବେ ଏମସରେ ଏକ ଡାକ୍ତରୀ ଦଳ ଲାଲୁଙ୍କ ଚିକିତ୍ସା କରୁଛନ୍ତି । ବିହାର ଉପନିର୍ବାଚନ ପରେ ସ୍ବାସ୍ଥ୍ୟଗତ କାରଣରୁ ଲାଲୁ ଯାଦବ ବିହାର ପାଟନାରୁ ଦିଲ୍ଲୀ ଆସିଥିଲେ । କିନ୍ତୁ କିଛି ଦିନ ପରେ ଚାରେ ଘୋଟାଲା କେସ୍ ପାଇଁ କୋର୍ଟରେ ହାଜିର ହେବା ପାଇଁ ପୁଣି ଥରେ ପାଟନା ଆସିଥିଲେ ।

୨୨ ନଭେମ୍ବରରେ ଦିଲ୍ଲୀରୁ ପାଟନାରେ ପହଞ୍ଚିଥିଲେ ଲାଲୁ ପ୍ରସାଦ ଯାଦବ ଏବଂ ୨୩ ନଭେମ୍ବରରେ ସିବିଆଇ କୋର୍ଟରେ ହାଜିର ହୋଇଥିଲେ । ତେବେ କୋର୍ଟରେ ହାଜିର ହେବା ପରେ ଆରଜେଡି କାର୍ଯ୍ୟାଳୟରେ ଆୟୋଜିତ ଏକ ସଭାରେ ଯୋଗ ଦେଇ କର୍ମୀମାନଙ୍କୁ ଉଦବୋଧନ ଦେଇଥିଲେ । ଏହି ସମୟରେ ସେ ଏକ ଜିପ୍ ଚଲାଉଥିବାର ଭିଡିଓ ସୋସିଆଲ ମିଡିଆରେ ବେଶ୍ ଭାଇରାଲ ହୋଇଥିଲା ।